ਦਸਤਾਵੇਜ਼ ਨਹੀਂ ਤਾਂ ਕੀ ਲੋਕਾਂ ਨੂੰ ਦੇਸ਼ ‘ਚੋਂ ਕੱਢ ਦੇਵੋਗੇ : ਮਾਇਆਵਤੀ

ਨਵੀਂ ਦਿੱਲੀ:-ਅਸਾਮ ‘ਚ ਨਾਗਰਿਕਤਾ ਦੀ ਪਛਾਣ ਮੰਨੇ ਜਾਣ ਵਾਲੇ ਰਾਸ਼ਟਰੀ ਨਾਗਰਿਕ ਰਜਿਸਟਰ (ਐੱਨ ਆਰ ਸੀ) ਦਾ ਦੂਸਰਾ ਡਰਾਫ਼ਟ ਜਾਰੀ ਹੋਣ ਤੋਂ ਬਾਅਦ ਇਸ ‘ਤੇ ਰਾਜਨੀਤੀ ਤੇਜ਼ ਹੋ ਗਈ ਹੈ। ਸਰਕਾਰ ਵੱਲੋਂ ਇਸ ‘ਤੇ ਬਚਾਅ ਕੀਤਾ ਜਾ ਰਿਹਾ ਹੈ ਤਾਂ ਉਥੇ ਹੀ ਵਿਰੋਧੀ ਧਿਰ ਨੇ ਪੂਰੀ ਤਰ੍ਹਾਂ ਹਮਲਾਵਰ ਰਵੱਈਆ ਅਪਣਾਇਆ ਹੋਇਆ ਹੈ। ਐੱਨ ਆਰ ਸੀ ਦੇ ਮੁੱਦੇ ‘ਤੇ ਬਸਪਾ ਸੁਪਰੀਮੋ ਮਾਇਅਵਤੀ ਨੇ ਵੀ ਸਰਕਾਰ ਨੂੰ ਘੇਰਿਆ ਹੈ।
ਮੰਗਲਵਾਰ ਨੂੰ ਬਿਆਨ ਜਾਰੀ ਕਰਦੇ ਹੋਏ ਮਾਇਅਵਤੀ ਨੇ ਕਿਹਾ ਕਿ ਅਸਾਮ ‘ਚ 40 ਲੱਖ ਲੋਕਾਂ ਦੀ ਨਾਗਰਿਕਤਾ ਨੂੰ ਰੱਦ ਕੀਤਾ ਗਿਆ ਹੈ। ਜੇਕਰ ਇਹ ਲੋਕ ਪਿਛਲੇ ਕਾਫ਼ੀ ਸਮੇਂ ਤੋਂ ਉਥੇ ਰਹਿ ਰਹੇ ਹਨ ਅਤੇ ਆਪਣੇ ਕਾਗਜ਼ ਪੱਤਰ ਨਹੀਂ ਦੇ ਸਕੇ ਤਾਂ ਫਿਰ ਕੀ ਤੁਸੀਂ ਉਨ੍ਹਾਂ ਨੂੰ ਦੇਸ਼ ‘ਚੋਂ ਕੱਢਣ ਦੇਵੋਗੇ। ਜਾਣਕਾਰੀ ਹੈ ਕਿ ਸਿਰਫ਼ ਮਾਇਅਵਤੀ ਹੀ ਨਹੀਂ, ਬਲਕਿ ਵਿਰੋਧੀ ਧਿਰ ਦੇ ਕਈ ਨੇਤਾਵਾਂ ਨੇ ਇਸ ਮੁੱਦੇ ‘ਤੇ ਸਰਕਾਰ ਦਾ ਵਿਰੋਧ ਕੀਤਾ ਹੈ।
ਮੰਗਲਵਾਰ ਨੂੰ ਇਸ ਮੁੱਦੇ ‘ਤੇ ਰਾਜ ਸਭਾ ‘ਚ ਵੀ ਚਰਚਾ ਹੋਈ। ਸਪਾ ਸਾਂਸਦ ਰਾਮਗੋਪਾਲ ਯਾਦਵ ਨੇ ਇਸ ਚਰਚਾ ਦੌਰਾਨ ਕਿਹਾ ਕਿ ਜਿਨ੍ਹਾਂ ਕੋਲ ਸਬੂਤ ਹਨ, ਉਨ੍ਹਾਂ ਦੇ ਵੀ ਨਾਂਅ ਲਿਸਟ ‘ਚੋਂ ਕੱਟੇ ਗਏ ਹਨ।
ਸ੍ਰੀ ਯਾਦਵ ਨੇ ਕਿਹਾ ਕਿ ਸੰਵਿਧਾਨ ਮੁਤਾਬਕ ਕਿਸੇ ਨੂੰ ਵੀ ਦੇਸ਼ ‘ਚੋਂ ਕਿਸੇ ਵੀ ਹਿੱਸੇ ‘ਚ ਰਹਿਣ ਦਾ ਮੌਲਿਕ ਅਧਿਕਾਰ ਹੈ, ਜਦਕਿ ਲਿਸਟ ‘ਚੋਂ ਬਿਹਾਰ, ਯੂ ਪੀ ਦੇ ਹਿੰਦੂ ਮੁਸਲਮਾਨ ਸਾਰਿਆਂ ਦੇ ਨਾਂਅ ਕੱਢੇ ਗਏ ਹਨ। ਉਹ ਹੁਣ ਕਿੱਥੇ ਜਾਣਗੇ। ਉਨ੍ਹਾ ਕਿਹਾ ਕਿ ਜਲਦਬਾਜ਼ੀ ‘ਚ ਜੇਕਰ ਕਿਸੇ ਦਾ ਨਾਂਅ ਦਿੱਤਾ ਜਾਵੇਗਾ ਤਾਂ ਉਹ ਕਿੱਥੇ ਜਾਵੇਗਾ, ਕਿਉਂਕਿ ਉਹ ਕੋਈ ਵਿਦੇਸ਼ੀ ਤਾਂ ਹੈ ਨਹੀਂ। ਐੱਨ ਆਰ ਸੀ ਮਾਮਲੇ ‘ਤੇ ਤੇਜ਼ ਰਾਜਨੀਤੀ ਦੇ ਵਿਚਕਾਰ ਹੈਦਰਾਬਾਦ ਤੋਂ ਭਾਜਪਾ ਵਿਧਾਇਕ ਰਾਜਾ ਸਿੰਘ ਦਾ ਇੱਕ ਭੜਕਾਊ ਬਿਆਨ ਸਾਹਮਣੇ ਆਇਆ ਹੈ। ਰਾਜਾ ਸਿੰਘ ਨੇ ਕਿਹਾ ਕਿ ਜੋ ਗੈਰ ਕਾਨੂੰਨੀ ਬੰਗਲਾਦੇਸ਼ੀ ਆਪਣੇ ਦੇਸ਼ ਵਾਪਸ ਨਹੀਂ ਜਾ ਰਹੇ, ਉਨ੍ਹਾਂ ਨੂੰ ਗੋਲੀ ਮਾਰ ਦੇਣੀ ਚਾਹੀਦੀ ਹੈ। ਰਾਜਾ ਸਿੰਘ ਹੈਦਰਾਬਾਦ ਦੀ ਗੋਸ਼ ਮਹਿਲ ਵਿਧਾਨ ਸਭਾ ਸੀਟ ਤੋਂ ਵਿਧਾਇਕ ਹਨ। ਰਾਜਾ ਸਿੰਘ ਤੋਂ ਪਹਿਲਾਂ ਹੀ ਪੱਛਮੀ ਬੰਗਾਲ ਭਾਜਪਾ ਦੇ ਪ੍ਰਧਾਨ ਦਲੀਪ ਘੋਸ਼ ਕਹਿ ਚੁੱਕੇ ਹਨ ਕਿ ਜੇਕਰ ਉਹਨਾ ਦੀ ਸਰਕਾਰ ਆਉਂਦੀ ਹੈ ਤਾਂ ਅਸਾਮ ਦੀ ਤਰ੍ਹਾਂ ਹੀ ਬੰਗਾਲ ‘ਚ ਵੀ ਐੱਨ ਆਰ ਸੀ ਨੂੰ ਲਾਗੂ ਕਰਾਂਗੇ।