ਨੋਟ ਬੰਦੀ: ਦਿੱਲੀ ਵਿੱਚ ਨੋਟ ਨਾ ਬਦਲਣ ਕਾਰਨ ਅਰਧ ਨਗਨ ਹੋਈ ਔਰਤ

ਨਵੀਂ ਦਿੱਲੀ:-ਪੁਰਾਣੇ ਬੰਦ ਹੋਏ ਨੋਟ ਨਾ ਬਦਲਣ ਤੋਂ ਖਿਝੀ ਇਕ ਗਰੀਬ ਔਰਤ ਨੇ ਅੱਜ ਇੱਥੇ ਆਰਬੀਆਈ ਦੇ ਖੇਤਰੀ ਦਫ਼ਤਰ ਸਾਹਮਣੇ ਅਰਧ ਨਗਨ ਹੋ ਕੇ ਰੋਸ ਮੁਜ਼ਾਹਰਾ ਕੀਤਾ। ਆਪਣੇ ਬੱਚੇ ਨਾਲ ਪੁੱਜੀ ਇਸ ਔਰਤ ਨੇ ਪੁਰਾਣੇ ਨੋਟ ਬਦਲਣ ਲਈ ਵਾਰ ਵਾਰ ਬੈਂਕ ਅੰਦਰ ਜਾਣ ਦੀ ਕੋਸ਼ਿਸ਼ ਕੀਤੀ ਪਰ ਸੁਰੱਖਿਆ ਗਾਰਡਾਂ ਨੇ ਉਸ ਨੂੰ ਜਾਣ ਨਹੀਂ ਦਿੱਤਾ। ਰੋਸ ਵਜੋਂ ਉਹ ਆਰਬੀਆਈ ਦੇ ਪ੍ਰਵੇਸ਼ ਦੁਆਰ ਸਾਹਮਣੇ ਧਰਨੇ ਉਤੇ ਬੈਠ ਗਈ। ਜਦੋਂ ਗਾਰਡਾਂ ਨੇ ਉਸ ਨੂੰ ਜ਼ਬਰਦਸਤੀ ਹਟਾਉਣਾ ਚਾਹਿਆ ਤਾਂ ਔਰਤ ਨੇ ਆਪਣੇ ਕੱਪੜੇ ਉਤਾਰ ਦਿੱਤੇ ਅਤੇ ਉਹ ਅਰਧ ਨਗਨ ਅਵਸਥਾ ਵਿੱਚ ਗੇਟ ਸਾਹਮਣੇ ਬੈਠ ਗਈ। ਬਾਅਦ ਵਿੱਚ ਗਾਰਡਾਂ ਨੇ ਪੁਲੀਸ ਸੱਦ ਲਈ। ਪੁਲੀਸ ਇਸ ਔਰਤ ਤੇ ਉਸ ਦੇ ਬੱਚੇ ਨੂੰ ਲੈ ਗਈ। ਇਹ ਘਟਨਾ ਸੰਸਦ ਭਵਨ ਤੋਂ ਬਿਲਕੁਲ ਨੇੜੇ ਵਾਪਰੀ। ਇਸ ਦੌਰਾਨ ਨੋਟ ਬਦਲਵਾਉਣ ਆਏ ਲੋਕਾਂ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ ਨੂੰ ਆਪਣੇ ਵਾਅਦਿਆਂ ਤੋਂ ਭੱਜਣਾ ਨਹੀਂ ਚਾਹੀਦਾ।