ਚੰਡੀਗੜ੍ਹ : ਜਲੰਧਰ ਦੇ ਟਾਂਡਾ ਦੇ ਪਿੰਡ ਘੁੱਲਾ ਵਿੱਚ ਬੀਤੇ ਦਿਨ ਕਰਜ਼ੇ ਤੋਂ ਸਤਾਏ ਜਹਿਰ ਨਿਗਲਣ ਵਾਲੇ ਕਿਸਾਨ ਪੁੱਤਰ ਪਿਤਾ ਵਿੱਚੋਂ ਪਿਤਾ ਦੀ ਮੌਤ ਹੋ ਗਈ। ਮ੍ਰਿਤਿਕ ਦੀ ਪਹਿਚਾਣ ਸੁਖਵਿੰਦਰ ਸਿੰਘ ਪੁੱਤਰ ਸ਼ੋਕੀਨ ਸਿੰਘ ਦੇ ਰੂਪ ਵਿੱਚ ਹੋਈ ਹੈ। ਜਦਕਿ ਉਸਦਾ ਨੌਜਵਾਨ ਪੁੱਤਰ ਜਸਪ੍ਰੀਤ ਸਿੰਘ ਜਲੰਧਰ ਦੇ ਹਸਪਤਾਲ ਵਿੱਚ ਇਲਾਜ ਅਧੀਨ ਹੈ।
ਜਾਣਕਾਰੀ ਮੁਤਾਬਿਕ ਪਿਤਾ ਪੁੱਤਰ ਛੋਟੇ ਕਿਸਾਨ ਹਨ ਅਤੇ ਓਹਨਾ ਉੱਤੇ ਲਗਭਗ 4 ਲੱਖ ਦਾ ਕਰਜ਼ਾ ਸੀ। ਘਰ ਦੇ ਮਾਲੀ ਹਲਾਤਾਂ ਅਤੇ ਕਰਜ਼ ਦੀਆ ਦੁਸ਼ਵਾਰੀਆਂ ਕਾਰਨ ਦੋਨੋ ਪਿਤਾ ਪੁੱਤਰ ਪ੍ਰੇਸ਼ਾਨ ਰਹਿੰਦੇ ਸਨ। ਜਿਸਦੇ ਚਲਦਿਆ ਬੀਤੇ ਦਿਨੀ ਦੋਨਾਂ ਨੇ ਹੱਮਸਲਾਹ ਹੋਕੇ ਜਹਿਰ ਨਿਗਲ ਲਿਆ ਸੀ। ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।
ਫ਼ਿਰੋਜ਼ਪੁਰ ਦੇ ਕਸਬਾ ਮੱਲਾਂਵਾਲਾ ਵਿੱਚ ਪੈਂਦੇ ਪਿੰਡ ਖੱਚਰਵਾਲਾ ‘ਚ ਕਿਸਾਨ ਗੁਰਦੇਵ ਸਿੰਘ (35) ਨੇ ਜ਼ਹਿਰੀਲੀ ਦਵਾਈ ਪੀ ਕੇ ਆਤਮਹੱਤਿਆ ਕਰ ਲਈ। ਉਸ ਦੀ ਪਤਨੀ ਪਰਮਜੀਤ ਕੌਰ ਮੁਤਾਬਕ ਉਸ ਤੇ ਕਰੀਬ 11-12 ਲੱਖ ਰੁਪਏ ਕਰਜ਼ਾ ਸੀ। ਪਰਮਜੀਤ ਕੌਰ ਮੁਤਾਬਕ ਉਸ ਦਾ ਪਤੀ ਰਾਤ ਅੱਠ ਵਜੇ ਦੇ ਕਰੀਬ ਖੇਤਾਂ ‘ਚ ਗੇੜਾ ਮਾਰਨ ਵਾਸਤੇ ਘਰੋਂ ਨਿਕਲਿਆ ਸੀ। ਜਦ ਉਹ ਘਰ ਆਇਆ ਤਾਂ ਉਸ ਦੀ ਤਬੀਅਤ ਖ਼ਰਾਬ ਸੀ। ਤੁਰੰਤ ਐਂਬੂਲੈਂਸ ਨੂੰ ਫ਼ੋਨ ਕੀਤਾ ਗਿਆ ਪਰ ਉਹ ਸਮੇਂ ਸਿਰ ਨਾ ਪੁੱਜੀ। ਰਾਹ ਵਿੱਚ ਐਂਬੂਲੈਂਸ ਮਿਲ ਗਈ ਜਿਸ ਵਿੱਚ ਮੌਜੂਦ ਸਟਾਫ਼ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ।
ਸੰਗਰੂਰ ਦੇ ਨੇੜਲੇ ਪਿੰਡ ਬਾਲੀਆਂ ਵਿੱਚ ਕਰਜ਼ੇ ਤੋਂ ਪ੍ਰੇਸ਼ਾਨ ਕਿਸਾਨ ਰਣਜੀਤ ਸਿੰਘ (45) ਨੇ ਪਾਣੀ ਵਾਲੀ ਡੂੰਘੀ ਖੇਲ ‘ਚ ਛਾਲ ਮਾਰ ਕੇ ਖੁਦਕੁਸ਼ੀ ਕਰ ਲਈ। ਸਿਰਫ਼ ਡੇਢ ਏਕੜ ਜ਼ਮੀਨ ਦੇ ਮਾਲਕ ਰਣਜੀਤ ਸਿੰਘ ‘ਤੇ ਕਰੀਬ ਤਿੰਨ ਲੱਖ ਰੁਪਏ ਦਾ ਕਰਜ਼ਾ ਸੀ। ਮ੍ਰਿਤਕ ਕਿਸਾਨ ਦੇ ਪਿਤਾ ਗੁਰਦੇਵ ਸਿੰਘ ਨੇ ਦੱਸਿਆ ਕਿ ਰਣਜੀਤ ਸਿੰਘ ਕਰਜ਼ੇ ਅਤੇ ਮੱਝਾਂ ਦੇ ਨੁਕਸਾਨ ਕਾਰਨ ਮਾਨਸਿਕ ਤੌਰ ‘ਤੇ ਪ੍ਰੇਸ਼ਾਨ ਸੀ। ਪਰਿਵਾਰ ਨੂੰ ਦੁਪਹਿਰ ਵੇਲੇ ਖੁਦਕੁਸ਼ੀ ਕਰਨ ਦਾ ਪਤਾ ਲੱਗਿਆ ਜਦੋਂ ਸਕੂਲੋਂ ਆਈ ਲੜਕੀ ਨੇ ਆਪਣੇ ਚਾਚੇ ਦੀ ਲਾਸ਼ ਪਾਣੀ ਵਾਲੀ ਖੇਲ ‘ਚ ਦੇਖੀ। ਲਾਸ਼ ਦਾ ਭਲਕੇ ਪੋਸਟਮਾਰਟਮ ਹੋਵੇਗਾ। ਥਾਣਾ ਸਦਰ ਪੁਲੀਸ ਸੰਗਰੂਰ ਦੇ ਮੁਖੀ ਰਣਜੀਤ ਸਿੰਘ ਨੇ ਦੱਸਿਆ ਕਿ ਬਿਆਨ ਦਰਜ ਕਰਨ ਤੋਂ ਬਾਅਦ ਕਾਰਵਾਈ ਅਮਲ ਵਿੱਚ ਲਿਆਂਦੀ ਜਾਵੇਗੀ।
