ਜੈਪੁਰ ਦੀ ਇਸ ਦੁਕਾਨ ‘ਚ ਵਿਕ ਰਹੀ ਹੈ 1.11 ਲੱਖ ਰੁਪਏ ਕਿਲੋ ਵਾਲੀ ਸੋਨੇ-ਚਾਂਦੀ ਦੀ ਮਠਿਆਈ; ਜਾਣੋ ਕੀ ਹੈ ਖ਼ਾਸੀਅਤ
ਜੈਪੁਰ: ਦੀਵਾਲੀ ਦਾ ਤਿਉਹਾਰ ਖੁਸ਼ੀਆਂ, ਰੌਸ਼ਨੀਆਂ ਅਤੇ ਇੱਕ-ਦੂਜੇ ਦਾ ਮੂੰਹ ਮਿੱਠਾ ਕਰਵਾਉਣ ਦਾ ਪ੍ਰਤੀਕ ਮੰਨਿਆ ਜਾਂਦਾ ਹੈ। ਪਰ ਇਸ ਵਾਰ ਜੈਪੁਰ ਦੀ ਇੱਕ ਦੁਕਾਨ ਨੇ ਮਠਿਆਈਆਂ ਵਿੱਚ ਅਜਿਹਾ ਸ਼ਾਹੀ (Luxury) ਤੜਕਾ ਲਗਾਇਆ ਹੈ ਕਿ ਸੁਣਨ ਵਾਲਾ ਹਰ ਕੋਈ ਹੈਰਾਨ ਰਹਿ ਜਾਂਦਾ ਹੈ। ਜੈਪੁਰ ਦੇ ਵੈਸ਼ਾਲੀ ਨਗਰ ਇਲਾਕੇ ਵਿੱਚ ਸਥਿਤ 'ਤਿਉਹਾਰ' (Tyohaar) ਨਾਮ ਦੀ ਮਸ਼ਹੂਰ ਦੁਕਾਨ ਨੇ 24 ਕੈਰੇਟ ਖਾਣਯੋਗ ਸੋਨੇ ਅਤੇ ਚਾਂਦੀ ਨਾਲ ਬਣੀਆਂ ਬੇਹੱਦ ਖ਼ਾਸ ਮਠਿਆਈਆਂ ਬਾਜ਼ਾਰ ਵਿੱਚ ਉਤਾਰੀਆਂ ਹਨ, ਜਿਨ੍ਹਾਂ ਦੀ ਕੀਮਤ 1.11 ਲੱਖ ਰੁਪਏ ਪ੍ਰਤੀ ਕਿਲੋਗ੍ਰਾਮ ਤੱਕ ਰੱਖੀ ਗਈ ਹੈ।
ਇਨ੍ਹਾਂ ਲਗਜ਼ਰੀ ਮਠਿਆਈਆਂ ਵਿੱਚ 'ਸਵਰਨ ਭਸਮ ਪਾਕ' (ਸੋਨੇ ਦੀ ਮਠਿਆਈ) ਅਤੇ 'ਚਾਂਦੀ ਭਸਮ ਪਾਕ' ਵਰਗੀਆਂ ਖ਼ਾਸ ਵੰਨਗੀਆਂ ਸ਼ਾਮਲ ਹਨ। ਦੁਕਾਨ ਦੀ ਸਭ ਤੋਂ ਮਹਿੰਗੀ 'ਸਵਰਨ ਮਠਿਆਈ' ਦੀ ਕੀਮਤ 1,111 ਰੁਪਏ ਪ੍ਰਤੀ ਪੀਸ ਹੈ, ਜਦਕਿ 'ਚਾਂਦੀ ਭਸਮ ਭਾਰਤ' ਨਾਮ ਦੀ ਮਠਿਆਈ 1,150 ਰੁਪਏ ਪ੍ਰਤੀ ਪੀਸ ਦੇ ਹਿਸਾਬ ਨਾਲ ਵਿਕ ਰਹੀ ਹੈ।
ਇਨ੍ਹਾਂ ਮਹਿੰਗੀਆਂ ਮਠਿਆਈਆਂ ਦੀ ਖ਼ਾਸੀਅਤ ਇਹ ਹੈ ਕਿ ਇਨ੍ਹਾਂ ਨੂੰ ਬਣਾਉਣ ਲਈ ਬੇਹੱਦ ਪ੍ਰੀਮੀਅਮ ਅਤੇ ਸਿਹਤਮੰਦ ਚੀਜ਼ਾਂ ਦੀ ਵਰਤੋਂ ਕੀਤੀ ਗਈ ਹੈ। ਇਸ ਵਿੱਚ 24 ਕੈਰੇਟ ਅਸਲੀ ਅਤੇ ਖਾਣਯੋਗ ਸੋਨੇ ਯਾਨੀ 'ਸਵਰਨ ਭਸਮ' ਅਤੇ ਚਾਂਦੀ ਦੀ ਭਸਮ ਦੀ ਵਰਤੋਂ ਕੀਤੀ ਗਈ ਹੈ। ਇਸ ਦੇ ਉੱਪਰ ਸੋਨੇ ਦਾ ਜੋ ਬਰੀਕ ਕੰਮ ਕੀਤਾ ਗਿਆ ਹੈ, ਉਸ ਦਾ ਡਿਜ਼ਾਈਨ ਇੱਕ ਜੈਨ ਮੰਦਰ ਤੋਂ ਪ੍ਰੇਰਿਤ ਹੈ ਅਤੇ ਇਹ ਪੂਰੀ ਤਰ੍ਹਾਂ ਸ਼ੁੱਧ ਢੰਗ ਨਾਲ ਤਿਆਰ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ, ਇਨ੍ਹਾਂ ਮਠਿਆਈਆਂ ਨੂੰ ਬਿਹਤਰੀਨ ਸਵਾਦ ਦੇਣ ਲਈ ਕੇਸਰ ਅਤੇ ਅੱਜ ਦੇ ਸਮੇਂ ਦੇ ਸਭ ਤੋਂ ਮਹਿੰਗੇ ਡਰਾਈ ਫਰੂਟ ਯਾਨੀ ਚਿਲਗੋਜ਼ੇ (Pine nuts) ਦੀ ਭਰਪੂਰ ਵਰਤੋਂ ਕੀਤੀ ਗਈ ਹੈ।
