ਸਪੋਰਟਸ ਡੈਸਕ, ਨਵੀਂ ਦਿੱਲੀ : Mohammed Shami 50 Wickets : ਮੁਹੰਮਦ ਸ਼ਮੀ ਨੇ ਵਾਨਖੇੜੇ ਮੈਦਾਨ ‘ਤੇ ਸੈਮੀਫਾਈਨਲ ਮੈਚ ‘ਚ ਨਿਊਜ਼ੀਲੈਂਡ ਦੇ ਬੱਲੇਬਾਜ਼ਾਂ ‘ਤੇ ਤਬਾਹੀ ਮਚਾਈ। ਸ਼ਮੀ ਆਪਣੀ ਸ਼ਾਨਦਾਰ ਲਾਈਨ ਅਤੇ ਲੈਂਥ ਦੇ ਦਮ ‘ਤੇ ਕੀਵੀ ਬੱਲੇਬਾਜ਼ਾਂ ਨੂੰ ਸਿਤਾਰੇ ਦਿਖਾ ਰਹੇ ਹਨ।
ਸ਼ਮੀ ਨੇ ਇੱਕੋ ਓਵਰ ਵਿੱਚ ਕੇਨ ਵਿਲੀਅਮਸਨ ਅਤੇ ਟਾਮ ਲੈਥਮ ਨੂੰ ਪੈਵੇਲੀਅਨ ਭੇਜ ਕੇ ਇੱਕ ਖਾਸ ਮੁਕਾਮ ਹਾਸਲ ਕਰ ਲਿਆ ਹੈ। ਸ਼ਮੀ ਨੇ ਵਨਡੇ ਵਿਸ਼ਵ ਕੱਪ ‘ਚ ਵਿਕਟਾਂ ਦਾ ਅਰਧ ਸੈਂਕੜਾ ਪੂਰਾ ਕਰ ਲਿਆ ਹੈ। ਇਸ ਦੇ ਨਾਲ ਹੀ ਸ਼ਮੀ ਨੇ ਮਿਸ਼ੇਲ ਸਟਾਰਕ ਦੇ ਵੱਡੇ ਰਿਕਾਰਡ ਨੂੰ ਵੀ ਤੋੜ ਦਿੱਤਾ ਹੈ।
ਸ਼ਮੀ ਨੇ ਰਚਿਆ ਇਤਿਹਾਸ
ਦਰਅਸਲ, ਮੁਹੰਮਦ ਸ਼ਮੀ ਵਿਸ਼ਵ ਕੱਪ ਦੇ ਇਤਿਹਾਸ ਵਿੱਚ ਸਭ ਤੋਂ ਤੇਜ਼ 50 ਵਿਕਟਾਂ ਲੈਣ ਵਾਲੇ ਗੇਂਦਬਾਜ਼ ਬਣ ਗਏ ਹਨ। ਉਨ੍ਹਾਂ ਨੇ ਇਸ ਮਾਮਲੇ ‘ਚ ਮਿਸ਼ੇਲ ਸਟਾਰਕ ਨੂੰ ਪਿੱਛੇ ਛੱਡ ਦਿੱਤਾ ਹੈ। ਸ਼ਮੀ ਨੇ ਇਹ ਉਪਲਬਧੀ ਸਿਰਫ 17ਵੀਂ ਪਾਰੀ ‘ਚ ਹਾਸਲ ਕੀਤੀ, ਜਦਕਿ ਸਟਾਰਕ ਨੂੰ ਇਸ ਉਪਲੱਬਧੀ ‘ਤੇ ਪਹੁੰਚਣ ਲਈ 19 ਪਾਰੀਆਂ ਦਾ ਸਮਾਂ ਲੱਗਾ।
ਇਸ ਦੇ ਨਾਲ ਹੀ ਲਸਿਥ ਮਲਿੰਗਾ ਨੇ ਵਿਸ਼ਵ ਕੱਪ ਦੇ 25ਵੇਂ ਮੈਚ ਵਿੱਚ ਆਪਣੀਆਂ 50 ਵਿਕਟਾਂ ਪੂਰੀਆਂ ਕਰ ਲਈਆਂ। ਇੰਨਾ ਹੀ ਨਹੀਂ ਸ਼ਮੀ ਨੇ ਸਭ ਤੋਂ ਘੱਟ ਗੇਂਦਾਂ ‘ਤੇ 50 ਵਿਕਟਾਂ ਵੀ ਲਈਆਂ ਹਨ। ਸ਼ਮੀ ਨੇ 795 ਗੇਂਦਾਂ ‘ਚ ਵਿਕਟਾਂ ਦਾ ਅਰਧ ਸੈਂਕੜਾ ਪੂਰਾ ਕੀਤਾ ਹੈ, ਜਦਕਿ ਸਟਾਰਕ ਨੇ 941 ਗੇਂਦਾਂ ‘ਤੇ ਗੇਂਦਬਾਜ਼ੀ ਕਰਕੇ ਇਹ ਉਪਲਬਧੀ ਹਾਸਲ ਕੀਤੀ ਹੈ।
MOHAMMED SHAMI BECOMES THE FASTEST TO TAKE 50 WICKETS IN 48 YEARS WORLD CUP HISTORY…!!! pic.twitter.com/rRCziPVGRY
— Mufaddal Vohra (@mufaddal_vohra) November 15, 2023
ਇੱਕ ਓਵਰ ਵਿੱਚ ਬਦਲ ਗਈ ਖੇਡ
ਨਿਊਜ਼ੀਲੈਂਡ ਦੀ ਟੀਮ 220 ਦੇ ਸਕੋਰ ‘ਤੇ ਦੋ ਵਿਕਟਾਂ ਗੁਆ ਕੇ ਮਜ਼ਬੂਤ ਸਥਿਤੀ ‘ਚ ਨਜ਼ਰ ਆ ਰਹੀ ਸੀ। ਕਪਤਾਨ ਕੇਨ ਵਿਲੀਅਮਸਨ ਅਤੇ ਡੈਰਿਲ ਮਿਸ਼ੇਲ ਪੂਰੀ ਤਰ੍ਹਾਂ ਕ੍ਰੀਜ਼ ‘ਤੇ ਮੌਜੂਦ ਸਨ। ਮਿਸ਼ੇਲ ਆਪਣੇ ਸੈਂਕੜੇ ਦੇ ਨੇੜੇ ਸੀ ਜਦਕਿ ਵਿਲੀਅਮਸਨ ਨੇ ਅਰਧ ਸੈਂਕੜਾ ਜੜਿਆ ਸੀ।
ਭਾਰਤੀ ਟੀਮ ਬੈਕ ਫੁੱਟ ‘ਤੇ ਨਜ਼ਰ ਆ ਰਹੀ ਸੀ, ਅਜਿਹੇ ‘ਚ ਕਪਤਾਨ ਰੋਹਿਤ ਨੇ ਗੇਂਦ ਮੁਹੰਮਦ ਸ਼ਮੀ ਦੇ ਹੱਥਾਂ ‘ਚ ਸੌਂਪ ਦਿੱਤੀ। ਸ਼ਮੀ ਨੇ ਆਉਂਦਿਆਂ ਹੀ ਆਪਣਾ ਜਾਦੂ ਦਿਖਾਇਆ ਅਤੇ ਇੱਕ ਹੀ ਓਵਰ ਵਿੱਚ ਦੋ ਵਿਕਟਾਂ ਲੈ ਕੇ ਭਾਰਤ ਨੂੰ ਮੈਚ ਵਿੱਚ ਵਾਪਿਸ ਲਿਆਂਦਾ। ਸ਼ਮੀ ਨੇ ਪਹਿਲਾਂ ਵਿਲੀਅਮਸਨ ਦੀ 69 ਦੌੜਾਂ ਦੀ ਪਾਰੀ ਦਾ ਅੰਤ ਕੀਤਾ, ਫਿਰ ਉਸ ਨੇ ਬਿਨਾਂ ਖਾਤਾ ਖੋਲ੍ਹੇ ਟਾਲ ਲੈਥਮ ਨੂੰ ਪੈਵੇਲੀਅਨ ਦਾ ਰਸਤਾ ਦਿਖਾਇਆ। ਖ਼ਬਰ ਲਿਖੇ ਜਾਣ ਤੱਕ ਸ਼ਮੀ ਨੇ 8 ਓਵਰਾਂ ਦੇ ਸਪੈੱਲ ‘ਚ 48 ਦੌੜਾਂ ਦੇ ਕੇ ਚਾਰ ਵਿਕਟਾਂ ਹਾਸਲ ਕੀਤੀਆਂ ਹਨ।
