ਅਮਰੀਕੀ ਖੁਫੀਆ ਏਜੰਸੀ ‘ਐੱਨਐੱਸਏ’ ਦਾ ਅੰਦਰੂਨੀ ਨੈੱਟਵਰਕ ਹੋਇਆ ਠੱਪ, ਅਧਿਕਾਰੀਆਂ ਨੇ ਦੱਸਿਆ ਰੁਟੀਨ ਰੱਖ-ਰਖਾਅ ਦਾ ਹਿੱਸਾ
ਵਾਸ਼ਿੰਗਟਨ: ਅਮਰੀਕਾ ਦੀ ਰਾਸ਼ਟਰੀ ਸੁਰੱਖਿਆ ਏਜੰਸੀ (NSA) ਵੱਲੋਂ ਗੁਪਤ ਜਾਣਕਾਰੀ ਦੇ ਆਦਾਨ-ਪ੍ਰਦਾਨ ਲਈ ਵਰਤਿਆ ਜਾਣ ਵਾਲਾ ਅੰਦਰੂਨੀ ਨੈੱਟਵਰਕ ਮੰਗਲਵਾਰ ਨੂੰ ਠੱਪ ਹੋ ਗਿਆ। ਏਜੰਸੀ ਨੇ ਇਸ ਰੁਕਾਵਟ ਦਾ ਕਾਰਨ "ਨਿਯਮਿਤ ਰੱਖ-ਰਖਾਅ" (ਰੁਟੀਨ ਮੇਨਟੇਨੈਂਸ) ਨੂੰ ਦੱਸਿਆ ਹੈ। ਇਸ ਸਮੱਸਿਆ ਕਾਰਨ ਕੁਝ ਸਮੇਂ ਲਈ 'ਐੱਨਐੱਸਏਨੈੱਟ' ਦਾ ਕੰਮਕਾਜ ਪ੍ਰਭਾਵਿਤ ਹੋਇਆ, ਪਰ ਏਜੰਸੀ ਨੇ ਸਪੱਸ਼ਟ ਕੀਤਾ ਕਿ ਰਾਸ਼ਟਰੀ ਸੁਰੱਖਿਆ ਨਾਲ ਜੁੜੇ ਅਹਿਮ ਆਪਰੇਸ਼ਨ ਪੂਰੀ ਤਰ੍ਹਾਂ ਕੰਮ ਕਰ ਰਹੇ ਹਨ।
ਪਿਛਲੇ ਇੱਕ ਹਫ਼ਤੇ ਦੌਰਾਨ ਅਮਰੀਕਾ ਵਿੱਚ ਤਕਨਾਲੋਜੀ ਨਾਲ ਜੁੜੀਆਂ ਕਈ ਵੱਡੀਆਂ ਦਿੱਕਤਾਂ ਸਾਹਮਣੇ ਆਈਆਂ ਹਨ, ਜਿਨ੍ਹਾਂ ਵਿੱਚ ਉਡਾਣਾਂ ਦਾ ਰੁਕਣਾ ਅਤੇ ਬੈਂਕਿੰਗ ਪ੍ਰਣਾਲੀ ਵਿੱਚ ਖਰਾਬੀ ਸ਼ਾਮਲ ਹੈ। ਐਪਲ ਦੀਆਂ ਸੇਵਾਵਾਂ ਵੀ ਕੁਝ ਸਮੇਂ ਲਈ ਪ੍ਰਭਾਵਿਤ ਹੋਈਆਂ ਸਨ। ਹਾਲਾਂਕਿ, ਅਮਰੀਕੀ ਪ੍ਰਸ਼ਾਸਨ ਨੇ ਸਪੱਸ਼ਟ ਕੀਤਾ ਹੈ ਕਿ ਇਹ ਘਟਨਾਵਾਂ ਕੋਈ ਸਾਈਬਰ ਹਮਲਾ ਨਹੀਂ ਹਨ, ਸਗੋਂ ਸਰਕਾਰੀ ਅਤੇ ਨਿੱਜੀ ਕੰਪਨੀਆਂ ਵੱਲੋਂ ਆਪਣੀਆਂ ਪੁਰਾਣੀਆਂ ਕੰਪਿਊਟਰ ਪ੍ਰਣਾਲੀਆਂ ਨੂੰ ਅਪਡੇਟ ਕਰਨ ਕਾਰਨ ਪੈਦਾ ਹੋ ਰਹੀਆਂ ਤਕਨੀਕੀ ਸਮੱਸਿਆਵਾਂ ਹਨ।



