ਪੁਲਿਸ ਅਕਾਦਮੀ ਦਾ ਹੈਰਾਨੀ ਜਨਕ ਨਤੀਜਾ, 122 ਵਿਚੋਂ 119 ਆਈ ਪੀ ਐਸ ਅਫ਼ਸਰ ਫੇਲ੍ਹ

* ਸਿਰਫ ਤਿੰਨ ਆਲ ਇੰਡੀਆ ਅਫਸਰ ਪਾਸ ਹੋ ਸਕੇ
ਹੈਦਰਾਬਾਦ, (ਪੋਸਟ ਬਿਊਰੋ)- ਇੰਡੀਅਨ ਪੁਲਿਸ ਸਰਵਿਸ (ਭਾਰਤੀ ਪੁਲਿਸ ਸੇਵਾ) ਲਈ ਚੁਣੇ ਗਏ ਅਤੇ ਸੇਵਾ ਦੇਣ ਦਾ ਜ਼ਰੂਰੀ ਇਮਤਿਹਾਨ ਦੇਣ ਇਸ ਸ਼ਹਿਰ ਵਿੱਚ ਪਹੁੰਚੇ 122 ਟ੍ਰੇਨੀ ਅਫ਼ਸਰਾਂ ਵਿਚੋਂ 119 ਜ਼ਰੂਰੀ ਪ੍ਰੀਖਿਆ ਵਿਚ ਫ਼ੇਲ੍ਹ ਹੋ ਗਏ ਹਨ। ਸਰਦਾਰ ਵੱਲਭਭਾਈ ਪਟੇਨ ਨੈਸ਼ਨਲ ਪੁਲਿਸ ਅਕਾਦਮੀ ਤੋਂ ਗਰੈਜੁਏਸ਼ਨ ਵੇਲੇ ਇਨ੍ਹਾਂ ਅਫ਼ਸਰਾਂ ਦਾ ਇਸ ਪ੍ਰੀਖਿਆ ਵਿਚ ਪਾਸ ਹੋਣਾ ਜ਼ਰੂਰੀ ਹੁੰਦਾ ਹੈ। ਉਨ੍ਹਾਂ ਨੂੰ ਪਾਸ ਹੋਣ ਲਈ ਤਿੰਨ ਮੌਕੇ ਹੋਰ ਦਿਤੇ ਜਾਣਗੇ, ਪਰ ਇਨ੍ਹਾਂ ਨਤੀਜਿਆਂ ਤੋਂ ਹਰ ਕੋਈ ਹੈਰਾਨ ਹੈ। ਫ਼ੇਲ੍ਹ ਹੋਣ ਪਿੱਛੋਂ ਫਿਲਹਾਲ ਇਨ੍ਹਾਂ ਨੂੰ ਗਰੈਜੂਏਟ ਐਲਾਨ ਕਰ ਕੇ ਵੱਖ-ਵੱਖ ਰਾਜਾਂ ਦੇ ਕਾਡਰ ਵਿਚ ਪ੍ਰੋਬੇਸ਼ਨਰ ਬਣਾ ਦਿਤਾ ਗਿਆ ਹੈ, ਪਰ ਤਿੰਨ ਯਤਨਾਂ ਵਿਚ ਹਰ ਸਬਜੈਕਟ ਪਾਸ ਨਾ ਕਰ ਸਕਣ ਦੀ ਸਥਿਤੀ ਵਿਚ ਉਨ੍ਹਾਂ ਨੂੰ ਸੇਵਾ ਤੋਂ ਬਾਹਰ ਕੀਤਾ ਜਾ ਸਕਦਾ ਹੈ।
ਵਰਨਣ ਯੋਗ ਹੈ ਕਿ ਇਸ ਤੋਂ ਪਹਿਲਾਂ ਸਾਲ 2016 ਵਿਚ ਸਿਰਫ਼ ਦੋ ਆਈ ਪੀ ਐਸ ਅਫ਼ਸਰ ਅਕਾਦਮੀ ਤੋਂ ਪਾਸ ਹੋਣ ਤੋਂ ਰਹਿ ਗਏ ਸਨ। ਇਸ ਸਾਲ ਫਾਰਨ ਪੁਲਿਸ ਫੋਰਸ ਦੇ ਅਫਸਰਾਂ ਮਿਲਾ ਕੇ ਕੁੱਲ 136 ਆਈ ਪੀ ਐਸ ਅਫਸਰਾਂ ਵਿਚੋਂ 133 ਜਣੇ ਇਕ ਜਾਂ ਇਕ ਤੋਂ ਜ਼ਿਆਦਾ ਸਬਜੈਕਟ ਵਿਚ ਫ਼ੇਲ੍ਹ ਹੋਏ ਹਨ। ਇਨ੍ਹਾਂ ਵਿਚ ਇੰਡੀਅਨ ਪੀਨਲ ਕੋਡ ਅਤੇ ਕ੍ਰਿਮੀਨਲ ਪ੍ਰਸੀਜਰ ਕੋਡ ਸ਼ਾਮਲ ਹਨ। ਹੈਰਾਨੀ ਵਾਲੀ ਗੱਲ ਇਹ ਹੈ ਕਿ ਫ਼ੇਲ੍ਹ ਹੋਣ ਵਾਲੇ ਅਫ਼ਸਰਾਂ ਵਿਚ ਉਹ ਅਫ਼ਸਰ ਵੀ ਸ਼ਾਮਲ ਹਨ, ਜਿਨ੍ਹਾਂ ਨੂੰ ਪਿਛਲੇ ਸਾਲ ਅਕਤੂਬਰ ਵਿਚ ਹੋਈ ਪਾਸਿੰਗ ਆਊਡ ਪਰੇਡ ਵਿਚ ਮੈਡਲ ਤੇ ਟ੍ਰਾਫ਼ੀ ਮਿਲੇ ਸਨ।