ਸਰਕਾਰ ਕੋਲ ਭੀੜ ਹੱਥੋਂ ਹੁੰਦੇ ਕਤਲਾਂ ਦੇ ਅੰਕੜੇ ਮੌਜੂਦ ਹੀ ਨਹੀਂ

* 15 ਸਾਲ ਵਿੱਚ ਬਲਾਤਕਾਰ ਦੇ ਕੇਸ 1700 ਫ਼ੀਸਦੀ ਵਧ ਗਏ
ਨਵੀਂ ਦਿੱਲੀ,- ਭਾਰਤ ਵਿੱਚ ਭਾਵੇਂ ਭੀੜ ਹੱਥੋਂ ਹੁੰਦੇ ਕਤਲਾਂ ਦਾ ਰੌਲਾ ਪੈਂਦਾ ਰਹੇ, ਪਰ ਹੈਰਾਨੀ ਵਾਲੀ ਗੱਲ ਹੈ ਕਿ ਭੀੜ ਹੱਥੋਂ ਹੁੰਦੇ ਕਤਲਾਂ ਬਾਰੇ ਕੋਈ ਅੰਕੜੇ ਸਰਕਾਰੀ ਏਜੰਸੀਆਂ ਦੇ ਕੋਲ ਹੈ ਹੀ ਨਹੀਂ।ਇਸ ਸੰਬੰਧ ਵਿੱਚ ਨੈਸ਼ਨਲ ਕ੍ਰਾਈਮ ਰਿਕਾਰਡ ਬਿਊਰੋ (ਐਨ ਸੀ ਆਰ ਬੀ) ਦਾ ਕਹਿਣਾ ਹੈ ਕਿ 2017 ਦੇ ਅੰਕੜੇ ਜਦੋਂ ਜਾਰੀ ਕੀਤੇ ਜਾਣਗੇ ਤਾਂ ਉਨ੍ਹਾਂ ਵਿਚ ਭੀੜ ਵੱਲੋਂ ਕਤਲ ਦੀਆਂ ਘਟਨਾਵਾਂ ਦਾ ਜ਼ਿਕਰ ਰਹੇਗਾ। ਇਸ ਦੌਰਾਨ ਨਾਬਾਲਗ ਲੋਕਾਂ ਅਤੇ ਬੱਚਿਆਂ ਦੇ ਵਿਰੁਧ ਯੌਨ ਹਿੰਸਾ ਦੇ ਕੇਸ ਕਿੰਨੇ ਵਧੇ ਹਨ, ਇਸ ਦਾ ਪਤਾ ਏਥੋਂ ਚੱਲਦਾ ਹੈ ਕਿ ਬੀਤੇ 15 ਸਾਲਾਂ ਵਿਚ ਬੱਚੀਆਂ ਨਾਲ ਬਲਾਤਕਾਰ ਦੀਆਂ ਘਟਨਾਵਾਂ ਕਰੀਬ 1700 ਫ਼ੀਸਦੀ ਵਧ ਗਈਆਂ ਹਨ।
ਮਿਲੀ ਜਾਣਕਾਰੀ ਅਨੁਸਾਰ ਭਾਰਤ12 ਰਾਜਾਂ ਵਿਚ 2000 ਤੋਂ ਲੈ ਕੇ 2012 ਦੇ ਵਿਚਕਾਰ ਡੈਣ ਦੱਸ ਦੇ ਭੀੜ ਨੇ 2097 ਔਰਤਾਂ ਦੇ ਕਤਲ ਕੀਤੇ ਸਨ। ਸਾਲ 2011 ਜਨਵਰੀ ਤੋਂ 2017 ਜੂਨ ਦੇ ਵਿਚਾਲੇ ਭੀੜ ਹੱਥੋਂ ਕਤਲ ਦੇ ਕੇਸ 20 ਫ਼ੀਸਦੀ ਵਧ ਗਏ ਅਤੇ ਸਾਲ 2017 ਦੇ ਪਹਿਲੇ ਛੇ ਮਹੀਨਿਆਂ ਵਿੱਚ 20 ਹਮਲੇ ਗਊ ਹੱਤਿਆ ਦੀ ਅਫ਼ਵਾਹ ਉੱਤੇ ਹੋਏ। ਇਹ 2016 ਦੇ ਨਾਲੋਂ 75 ਫ਼ੀਸਦੀ ਵੱਧ ਸਨ। ਦੇਸ਼ ਦੇ 10 ਰਾਜਾਂ ਵਿਚ 2018 ਵਿਚ ਭੀੜ ਦੀ ਮਾਰਕੁੱਟ ਵਿਚ ਮੌਤ ਦੇ 14 ਕੇਸ ਦਰਜ ਹੋਏ ਹਨ, ਜਿਨ੍ਹਾਂ ਵਿਚ 31 ਲੌਕਾਂ ਦੀ ਮੌਤ ਹੋਈ ਸੀ ਅਤੇ 14 ਵਿਚੋਂ 11 ਕੇਸ ਵਿਚ ਅਫਵਾਹ ਬੱਚਾ ਚੋਰੀ ਦੀ ਸੀ, ਪਰ ਅਜਿਹੇ ਅੰਕੜਿਆਂ ਦਾ ਕੋਈ ਸਰਕਾਰ ਰਿਕਾਰਡ ਨਹੀਂ ਹੈ।