ਜਾਅਲੀ ਕਾਗਜ਼ਾਤ ਬਣਾਉਣ ਦੇ ਦੋਸ਼ ‘ਚ ਚਾਰ ਖਿਲਾਫ਼ ਕੇਸ ਦਰਜ

ਅਮਰਜੀਤ ਸਿੰਘ ਵੇਹਗਲ, ਜਲੰਧਰ : ਪਿੰਡ ਲਿੱਧੜਾਂ ‘ਚ ਸਥਿਤ ਜ਼ਮੀਨ ਦੇ ਜਾਅਲੀ ਕਾਗਜ਼ਾਤ ਬਣਾਉਣ ਦੇ ਦੋਸ਼ ‘ਚ ਪੁਲਿਸ ਵੱਲੋਂ ਚਾਰ ਵਿਅਕਤੀਆਂ ਖਿਲਾਫ਼ ਕੇਸ ਦਰਜ ਕਰਕੇ ਦੋ ਵਿਅਕਤੀਆਂ ਨੂੰ ਕਾਬੂ ਕੀਤਾ ਹੈ। ਥਾਣਾ ਮਕਸੂਦਾਂ ਦੇ ਮੁਖੀ ਸਿਕੰਦਰ ਸਿੰਘ ਨੇ ਦੱਸਿਆ ਕਿ ਅਰਜੁਨ ਸਿੰਘ ਵਾਸੀ ਪਿੰਡ ਲਿੱਧੜਾਂ ਨੇ ਪਿੰਡ ‘ਚ ਸਥਿਤ ਜ਼ਮੀਨ ਬਿ੍ਜ ਮੋਹਨ ਵਾਸੀ ਨਵਾਂਸ਼ਹਿਰ ਨੂੰ ਵੇਚਣੀ ਸੀ ਪਰ ਅਰਜੁਨ ਸਿੰਘ ਦੀ ਮੌਤ ਹੋ ਗਈ ਸੀ। ਖ਼ਰੀਦੀ ਜ਼ਮੀਨ ‘ਤੇ ਬਿ੍ਜ ਮੋਹਨ ਦਾ ਕੋਈ ਆਉਣ-ਜਾਣ ਨਾ ਹੋਣ ਕਰ ਕੇ ਕਰਨੈਲ ਸਿੰਘ, ਮਲਕੀਤ ਸਿੰਘ ਵੱਲੋਂ ਆਪਣੇ ਦੋ ਹੋਰ ਸਾਥੀਆਂ ਸਮੇਤ ਅਰਜੁਨ ਸਿੰਘ ਨੂੰ ਜਿਊਂਦਾ ਦੱਸ ਕੇ ਤਕਰੀਬਨ 7 ਕਨਾਲ ਜ਼ਮੀਨ ‘ਤੇ ਅਦਾਲਤ ਤੋਂ ਸਟੇਅ ਲੈ ਲਿਆ ਤੇ ਇਸ ਬਾਰੇ ਜਦੋਂ ਬਿ੍ਜ ਮੋਹਨ ਨੂੰ ਭਿਣਕ ਪਈ ਤਾਂ ਇਸ ਦੀ ਸ਼ਿਕਾਇਤ ਐੱਸਐੱਸਪੀ ਨੂੰ ਦਿੱਤੀ ਗਈ ਸੀ। ਜਾਂਚ ਮਗਰੋਂ ਥਾਣਾ ਮਕਸੂਦਾਂ ‘ਚ 4 ਵਿਅਕਤੀਆਂ ਖਿਲਾਫ ਮਾਮਲਾ ਦਰਜ ਕਰ ਕੇ ਥਾਣਾ ਮਕਸੂਦਾਂ ਦੀ ਪੁਲਿਸ ਵੱਲੋਂ ਕਰਨੈਲ ਸਿੰਘ ਵਾਸੀ ਬਜੋਲਾ ਜ਼ਿਲ੍ਹਾ ਕਪੂਰਥਲਾ, ਮਲਕੀਤ ਸਿੰਘ ਵਾਸੀ ਈਸ਼ਰਵਾਲ ਥਾਣਾ ਪਤਾਰਾ ਨੂੰ ਕਾਬੂ ਕੀਤਾ ਗਿਆ ਹੈ। ਥਾਣਾ ਮੁਖੀ ਸਿਕੰਦਰ ਸਿੰਘ ਨੇ ਦੱਸਿਆ ਕਿ ਫੜੇ ਗਏ ਵਿਅਕਤੀਆਂ ਨੂੰ ਅਦਾਲਤ ‘ਚ ਪੇਸ਼ ਕਰਕੇ ਰਿਮਾਂਡ ‘ਤੇ ਲਿਆ ਗਿਆ ਤੇ ਦੋ ਫਰਾਰ ਵਿਅਕਤੀਆਂ ਦੀ ਗਿ੍ਫਤਾਰੀ ਲਈ ਛਾਪੇਮਾਰੀ ਕੀਤੀ ਜਾ ਰਹੀ ਹੈ।