ਸਰਜੀਕਲ ਹਮਲੇ ਦੇ ਸਬੂਤ ਪੇਸ਼ ਕਰਨ ਦੀ ਮੰਗ ਭਖੀ

ਮੁੰਬਈ,: ਮੁੰਬਈ ਕਾਂਗਰਸ ਦੇ ਪ੍ਰਧਾਨ ਸੰਜੇ ਨਿਰੂਪਮ ਨੇ ਸਰਹੱਦ ਪਾਰ ਅਤਿਵਾਦੀ ਟਿਕਾਣਿਆਂ ‘ਤੇ ਫ਼ੌਜ ਦੇ ਸਰਜੀਕਲ ਹਮਲਿਆਂ ਦੀ ਸਚਾਈ ‘ਤੇ ਸਵਾਲ ਉਠਾਉਂਦਿਆਂ ਕਿਹਾ ਹੈ ਕਿ ਕਿਤੇ ਕਾਰਵਾਈ ‘ਫ਼ਰਜ਼ੀ’ ਤਾਂ ਨਹੀਂ ਸੀ। ਉਨ੍ਹਾਂ ਭਾਜਪਾ ਉਤੇ ਇਸ ਮਾਮਲੇ ‘ਚ ਸਿਆਸਤ ਨੂੰ ਕੌਮੀ ਹਿਤ ਤੋਂ ਉਪਰ ਰੱਖਣ ਦਾ ਦੋਸ਼ ਲਾਇਆ। ਉਧਰ, ਕਾਂਗਰਸ ਨੇ ਸੰਜੇ ਦੀ ਟਿਪਣੀ ਤੋਂ ਪਾਸਾ ਤਾਂ ਵੱਟ ਲਿਆ ਪਰ ਆਪ ਵੀ ਇਹ ਕਹਿ ਦਿਤਾ ਕਿ ਸਰਜੀਕਲ ਹਮਲੇ ਬਾਰੇ ਪਾਕਿਸਤਾਨ ਦੇ ‘ਝੂਠ’ ਦਾ ਪਰਦਾ ਫ਼ਾਸ਼ ਹੋਣਾ ਚਾਹੀਦਾ ਹੈ ਯਾਨੀ ਅਸਿੱਧੇ ਤੌਰ ‘ਤੇ ਕਿਹਾ ਕਿ ਸਬੂਤ ਪੇਸ਼ ਕੀਤੇ ਜਾਣ।

ਨਿਰੂਪਮ ਨੇ ਟਵੀਟ ਕੀਤਾ, ”ਹਰ ਭਾਰਤੀ ਪਾਕਿਸਤਾਨ ਵਿਰੁਧ ਸਰਜੀਕਲ ਹਮਲੇ ਚਾਹੁੰਦਾ ਹੈ ਪਰ ਫ਼ਰਜ਼ੀ ਨਹੀਂ ਜਿਵੇਂ ਭਾਜਪਾ ਨੇ ਸਿਰਫ਼ ਸਿਆਸੀ ਫ਼ਾਇਦੇ ਲਈ ਕੀਤਾ ਹੈ। ਕੌਮੀ ਹਿਤ ਦੀ ਬਜਾਏ ਰਾਜਨੀਤੀ।” ਬਾਅਦ ਵਿਚ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਨਿਰੂਪਮ ਨੇ ਕਿਹਾ ਕਿ ਸਰਕਾਰ ਨੂੰ ਸਾਬਤ ਕਰਨਾ ਪਵੇਗਾ ਕਿ ਸਰਜੀਕਲ ਹਮਲੇ ਕੀਤੇ ਗਏ ਸਨ। ਉਨ੍ਹਾਂ ਕਿਹਾ ਕਿ ਕਾਂਗਰਸ ਦਾ ਵੀ ਮੰਨਣਾ ਹੈ ਕਿ ਪਾਕਿਸਤਾਨ ਨੂੰ ਸਜ਼ਾ ਮਿਲਣੀ ਚਾਹੀਦੀ ਹੈ। ਉਧਰ, ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਸਰਜੀਕਲ ਹਮਲੇ ਸਬੰਧੀ ਭਾਜਪਾ ਸਿਆਸਤ ਕਰ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਅਸੀਂ ਜਾਣਦੇ ਹਾਂ ਕਿ ਸਰਜੀਕਲ ਹਮਲਾ ਹੋਇਆ ਹੈ ਪਰ ਭਾਜਪਾ ਡਰ ਕਿਉਂ ਰਹੀ ਹੈ? ਉਨ੍ਹਾਂ ਕਿਹਾ ਕਿ ਪ੍ਰਧਾਨ ਮੰਤਰੀ ਤੇ ਫ਼ੌਜ ਦੀ ਕਾਰਵਾਈ ਦੀ ਸ਼ਲਾਘਾ ਕੀਤੀ ਹੈ ਤੇ ਏਨਾ ਹੀ ਕਿਹਾ ਹੈ Îਕਿ ਸਬੂਤ ਦੇ ਕੇ ਪਾਕਿਸਤਾਨ ਦਾ ਮੂੰਹ ਬੰਦ ਕਰਾਇਆ ਜਾਵੇ। ਫ਼ੌਜ ਨੇ 28 ਅਤੇ 29 ਸਤੰਬਰ ਦੀ ਰਾਤ ਨੂੰ ਪਾਕਿਸਤਾਨ ਦੇ ਕਬਜ਼ੇ ਵਾਲੇ ਕਸ਼ਮੀਰ ਤੋਂ ਘੁਸਪੈਠ ਦੀ ਤਿਆਰੀ ਕਰ ਰਹੇ ਅਤਿਵਾਦੀਆਂ ਨੂੰ ਵੱਡਾ ਨੁਕਸਾਨ ਪਹੁੰਚਾਉਂਦਿਆਂ ਕੰਟਰੋਲ ਰੇਖਾ ਦੇ ਪਾਰ ਸੱਤ ਅਤਿਵਾਦੀ ਟਿਕਾਣਿਆਂ ‘ਤੇ ਸਰਜੀਕਲ ਹਮਲੇ ਕੀਤੇ ਸਨ।