ਭਾਰਤੀ ਫ਼ੌਜ ਨੇ ਅਹਿਮ ਚੋਟੀਆਂ ’ਤੇ ਬਣਾਇਆ ਦਾਬਾ

ਨਵੀਂ ਦਿੱਲੀ, 10 ਸਤੰਬਰ
ਭਾਰਤੀ ਫ਼ੌਜ ਨੇ ਪੂਰਬੀ ਲੱਦਾਖ ’ਚ ਪੈਂਗੌਂਗ ਝੀਲ ਨੇੜਲੇ ਇਲਾਕਿਆਂ ’ਚ ਆਪਣਾ ਦਬਦਬਾ ਬਣਾ ਲਿਆ ਹੈ। ਉਂਜ ਭਾਰਤ ਅਤੇ ਚੀਨ ਦੇ ਬ੍ਰਿਗੇਡ ਕਮਾਂਡਰਾਂ ਅਤੇ ਕਮਾਂਡਿੰਗ ਅਫ਼ਸਰਾਂ ਵਿਚਕਾਰ ਖਿੱਤੇ ’ਚ ਤਣਾਅ ਘਟਾਉਣ ਲਈ ਚੁਸ਼ੂਲ ’ਚ ਵੱਖਰੇ ਤੌਰ ’ਤੇ ਗੱਲਬਾਤ ਹੋਈ। ਸੂਤਰਾਂ ਨੇ ਕਿਹਾ ਕਿ ਵਾਰਤਾ ਦੌਰਾਨ ਦੋਵੇਂ ਮੁਲਕਾਂ ’ਚ ਹਾਲਾਤ ਨਰਮ ਬਣਾਉਣ ’ਤੇ ਧਿਆਨ ਕੇਂਦਰਤ ਕੀਤਾ ਗਿਆ। ਸਰਕਾਰੀ ਸੂਤਰਾਂ ਨੇ ਕਿਹਾ ਕਿ ਫਿੰਗਰ 4 ਵਾਲੇ ਚੀਨੀ ਕਬਜ਼ੇ ਵਾਲੇ ਇਲਾਕੇ ’ਤੇ ਬਾਜ ਨਜ਼ਰ ਰੱਖਣ ਲਈ ਰਣਨੀਤਕ ਤੌਰ ’ਤੇ ਅਹਿਮ ਚੋਟੀਆਂ ’ਤੇ ਵਾਧੂ ਫ਼ੌਜ ਤਾਇਨਾਤ ਕੀਤੀ ਗਈ ਹੈ। ਚੀਨ ਨੇ ਪੈਂਗੌਂਗ ਝੀਲ ਦੇ ਉੱਤਰੀ ਕੰਢੇ ’ਤੇ ਫਿੰਗਰ 4 ਅਤੇ 8 ’ਤੇ ਕਬਜ਼ਾ ਕੀਤਾ ਹੋਇਆ ਹੈ ਜਦਕਿ ਭਾਰਤੀ ਫ਼ੌਜੀ ਰਿਜ਼ਾਂਗ-ਲਾ ਅਤੇ ਰੇਕਿਨ-ਲਾ ਇਲਾਕਿਆਂ ’ਚ ਡਟੇ ਹੋਏ ਹਨ।