ਨੌਰਥ ਕੋਰੀਆ ਦੀ ਬੜ੍ਹਕ ਮਗਰੋਂ ਅਮਰੀਕਾ ਪਿਆ ਨਰਮ

ਵਾਸ਼ਿੰਗਟਨ: ਅਮਰੀਕਾ ਤੇ ਉੱਤਰੀ ਕੋਰੀਆ ਵਿਚਾਲੇ ਚੱਲ ਰਹੀ ਤਕਰਾਰ ਦੌਰਾਨ ਵਾਈਟ ਹਾਊਸ ਨੇ ਪਿਯੋਂਗਯਾਂਗ ‘ਤੇ ਅਮਰੀਕਾ ਵੱਲੋਂ ਜੰਗ ਦੇ ਐਲਾਨ ਕਰਨ ਵਾਲੇ ਦਾਅਵਿਆਂ ਨੂੰ ਖਾਰਜ ਕਰਦੇ ਹੋਏ ਕਿਹਾ ਹੈ ਕਿ ਇਸ ਬਾਰੇ ਚੱਲ ਰਹੀਆਂ ਗੱਲਾਂ ਠੀਕ ਨਹੀਂ। ਵਾਈਟ ਹਾਊਸ ਦੀ ਪ੍ਰੈੱਸ ਸੈਕਟਰੀ ਸਾਰਾ ਸੈਂਡਰਸ ਨੇ ਕਿਹਾ, “ਬਿਲਕੁਲ ਨਹੀਂ, ਅਸੀਂ ਉੱਤਰ ਕੋਰੀਆ ਖਿਲਾਫ ਜੰਗ ਦਾ ਐਲਾਨ ਨਹੀਂ ਕੀਤਾ। ਇਹ ਗੱਲ ਬਿਲਕੁਲ ਗਲਤ ਹੈ।”ਉੱਤਰੀ ਕੋਰੀਆ ਦੇ ਵਿਦੇਸ਼ ਮੰਤਰੀ ਰੀ ਯੋਂਗ ਹੋ ਨੇ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਪੰਪ ‘ਤੇ ਉਨ੍ਹਾਂ ਦੇ ਮੁਲਕ ਖਿਲਾਫ ਜੰਗ ਦਾ ਐਲਾਨ ਕਰਨ ਦਾ ਇਲਜ਼ਾਮ ਲਾਇਆ ਸੀ। ਰੀ ਯੋਂਗ ਕੱਲ੍ਹ ਨਿਊਯਾਰਕ ‘ਚ ਸਨ। ਉਨ੍ਹਾਂ ਇਹ ਵੀ ਕਿਹਾ ਕਿ ਪਿਯੋਂਗਯਾਂਗ ਅਮਰੀਕੀ ਜੰਗੀ ਜਹਾਜ਼ਾਂ ਨੂੰ ਡੇਗ ਕੇ ਆਪਣੀ ਰੱਖਿਆ ਕਰਨ ਲਈ ਤਿਆਰ ਹੈ। ਉਨ੍ਹਾਂ ਨਿਊਯਾਰਕ ‘ਚ ਕਿਹਾ ਸੀ, “ਪੂਰੀ ਦੁਨੀਆ ਨੂੰ ਸਾਫ ਤੌਰ ‘ਤੇ ਇਹ ਯਾਦ ਰੱਖਣਾ ਚਾਹੀਦਾ ਹੈ ਕਿ ਪਹਿਲਾਂ ਅਮਰੀਕਾ ਨੇ ਸਾਡੇ ਮੁਲਕ ਖਿਲਾਫ ਜੰਗ ਦਾ ਐਲਾਨ ਕੀਤਾ ਹੈ।”ਸਾਰਾ ਨੇ ਕਿਹਾ, “ਕਿਸੇ ਵੀ ਮੁਲਕ ਵੱਲੋਂ ਕਿਸੇ ਹੋਰ ਮੁਲਕ ਦੇ ਜਹਾਜ਼ਾਂ ਨੂੰ ਡੇਗਣਾ ਠੀਕ ਨਹੀਂ, ਭਾਵੇਂ ਉਹ ਕੌਮਾਂਤਰੀ ਸਰਹੱਦ ‘ਚ ਹੋਣ। ਉਨ੍ਹਾਂ ਇੱਕ ਸਵਾਲ ਦੇ ਜਵਾਬ ‘ਚ ਕਿਹਾ ਕਿ ਸਾਡਾ ਮਕਸਦ ਹੁਣ ਵੀ ਉਹੀ ਹੈ। ਅਸੀਂ ਚਾਹੁੰਦੇ ਹਾਂ ਕਿ ਕੋਰਿਆਈ ਮਹਾਦੀਪ ਪ੍ਰਮਾਣੂ ਹਥਿਆਰਾਂ ਤੋਂ ਮੁਕਤ ਰਵੇ। ਸਾਡਾ ਇਸੇ ਵੱਲ ਧਿਆਨ ਹੈ। ਅਸੀਂ ਅਜਿਹਾ ਜ਼ਿਆਦਾਤਰ ਆਰਥਿਕ ਤੇ ਰਾਜਨੀਤਕ ਦਬਾਅ ‘ਚ ਕਰਾਂਗੇ।”