ਕੈਂਸਰ ਪੀੜਤਾਂ ਲਈ ‘ਸਿੱਖ ਮੋਟਰ ਸਾਇਕਲ ਕਲੱਬ’ ਵੱਲੋਂ ਫੰਡ ਰੇਜਿੰਗ ਯਾਤਰਾ ਅਰੰਭ

-12 ਹਜ਼ਾਰ ਕਿਲੋਮੀਟਰ ਦਾ ਸਫਰ ਤਹਿ ਕਰੇਗੀ 25 ਮੈਂਬਰੀ ਟੀਮ

ਵੈਨਕੂਵਰ:-(ਬਰਾੜ-ਭਗਤਾ ਭਾਈ ਕਾ) ਬ੍ਰਿਟਿਸ਼ ਕੋਲੰਬੀਆ ਸੂਬੇ ਤੋਂ ‘ਸਿੱਖ ਮੋਟਰ ਸਾਇਕਲ ਕਲੱ’ ਕੈਨੇਡਾ ਨਾਂ ਦੀ ਸੰਸਥਾ ਦੇ ਮੋਟਰ ਸਾਇਕਲ ਸਵਾਰਾਂ ਵੱਲੋਂ ਸਰੀ ਦੇ ਕੈਂਸਰ ਹਸਪਤਾਲ ਲਈ ਇਸ ਨਾਮੁਰਾਦ ਕੈਂਸਰ ਦੀ ਬਿਮਾਰੀ ਦੇ ਪੀੜਤਾਂ ਲਈ ਫੰਡ ਇਕੱਤਰ ਕਰਨ ਵਾਸਤੇ ਕੈਨੇਡਾ ਦੇ ਪ੍ਰਮੁੱਖ ਸ਼ਹਿਰਾਂ ਦੀ ਯਾਤਰਾ ਅਰੰਭ ਕੀਤੀ ਹੈ। ਜ਼ਿਕਰਯੋਗ ਹੈ ਕਿ ਇਹ ਕਾਰਜ ਸ਼ਰੂ ਹੋਣ ਤੋਂ ਪਹਿਲਾਂ ਪਰਮਿੰਦਰ ਚੌਹਾਨ ਨੇ 10 ਹਜ਼ਾਰ ਡਾਲਰ ਫੰਡ ਵਿੱਚ ਪਾ ਕੇ ਯਾਤਰਾ ਦੀ ਸ਼ਰੂਆਤ ਕੀਤੀ। 25 ਮੈਂਬਰੀ ਮੋਟਰ ਸਾਇਕਲ ਸਵਾਰਾਂ ਦੀ ਇਹ ਟੀਮ 13 ਮੋਟਰਸਾਇਕਲਾਂ ਅਤੇ 3 ਵੈਨਾਂ ‘ਤੇ ਸਵਾਰ ਹੋ ਕੇ ਦੋ ਗਰੁੱਪਾਂ ਰਾਹੀਂ ਖਾਣ ਪੀਣ, ਪਹਿਨਣ, ਸਫ਼ਰ ਕਰਨ ਸਮੇਂ ਅਤੇ ਨਿੱਤ ਵਰਤੋਂ ‘ਚ ਆਉਣ ਵਾਲੇ ਸਾਜੋ ਸਮਾਨ ਨਾਲ ਲੈਸ ਹੋ ਕੇ ਸਰੀ ਦੇ ਗੁਰਦੁਆਰਾ ਸਾਹਿਬ ਦਸਮੇਸ਼ ਦਰਬਾਰ ਤੋਂ ਚੱਲ ਕੇ ਕੈਨੇਡਾ ਦੇ ਵੱਡੇ ਸ਼ਹਿਰਾਂ ਕੈਲਗਰੀ, ਵਿੰਨੀਪੈਗ, ਔਟਵਾ, ਮੌਂਟਰੀਅਲ, ਟੋਰਾਂਟੋ, ਸਸਕਾਟੂਨ, ਐਡਮਿੰਟਨ ਹੁੰਦੀ ਹੋਈ 12000 ਕਿਲੋਮੀਟਰ ਦਾ ਸਫ਼ਰ ਤਹਿ ਕਰਕੇ 15 ਦਿਨਾਂ ਬਾਅਦ ਵਾਪਸ ਸਰੀ ਪਹੁੰਚੇਗੀ। ਫੰਡ ਰੇਜਿੰਗ ਮੋਟਰ ਸਾਇਕਲ ਇਹ ਸਵਾਰ 6 ਜੁਲਾਈ ਨੂੰ ਔਟਵਾ ਵਿਖੇ ਕੈਨੇਡਾ ਦੀ ਪਾਰਲੀਮੈਂਟ ‘ਚ ਵੀ ਜਾਣਗੇ ਜਿੱਥੇ ਉਹ ਆਪਣੇ ਇਸ ਮਿਸ਼ਨ ਦੀ ਪੂਰੀ ਜਾਣਕਾਰੀ ਦੇਣਗੇ ਅਤੇ ਓੱਥੋਂ ਦੇ ਲੋਕਲ ਕੈਂਸਰ ਸੁਸਾਇਟੀ ਦੇ ਪ੍ਰਬੰਧਕਾਂ ਨਾਲ ਗੱਲਬਾਤ ਕਰਨਗੇ। 10 ਜੁਲਾਈ ਨੂੰ ਟੋਰਾਂਟੋ ਦੇ ਮਾਲਟਨ ਗੁਰੂ ਘਰ ਵਿਖੇ ਦਸਤਾਰ ਵਰਕਸ਼ਾਪ ‘ਚ ਵੀ ਹਿੱਸਾ ਲੈਣਗੇ।

ਬੀæਸੀæ ਦੇ ਸ਼ਹਿਰ ਐਬਟਸਫੋਰਡ ਤੋਂ ਇਸ ਟੀਮ ਨੂੰ ਮੈਂਬਰ ਪਾਰਲੀਮੈਂਟ ਜਤੀ ਸਿੱਧੂ ਨੇ ਆਪਣੇ ਕੋਟੇ ਵਿੱਚੋਂ ਕੈਂਸਰ ਪੀੜਤਾਂ ਲਈ ਫੰਡ ਦੇ ਕੇ ਰਵਾਨਾ ਕੀਤਾ। ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਸਿਟੀ ਕੌਂਸਲਰ ਮੋਹ ਗਿੱਲ, ਇੰਡੋ-ਕੈਨੇਡੀਅਨ ਯੂਥ ਕਲੱਬ ਦੇ ਪ੍ਰਧਾਨ ਗੁਰਚਰਨ ਸਿੰਘ ਧਾਲੀਵਾਲ, ਗੁਰਦੁਆਰਾ ਸਾਹਿਬ ਬਾਬਾ ਬੰਦਾ ਬਹਾਦਰ ਦੇ ਮੁੱਖ ਸੇਵਾਦਾਰ ਕੁਲਵਿੰਦਰ ਸਿੰਘ ਬਾਠ, ਸਕੱਤਰ ਕਰਨੈਲ ਸਿੰਘ ਟੁੱਟ, ਅਤੇ ਦੀਪਕ ਸ਼ਰਮਾ ਉਚੇਚੇ ਤੌਰ ‘ਤੇ ਹਾਜ਼ਰ ਸਨ।