ਕੋਰੋਨਾ ਨੇ ਮੁੜ ਵਧਾਈ ਚਿੰਤਾ; ਕੈਨੇਡਾ ਤੋਂ ਨਿਕਲਿਆ ਨਵਾਂ ਵੇਰੀਐਂਟ PJ.2.1 ਕਈ ਦੇਸ਼ਾਂ ‘ਚ ਫੈਲਿਆ, ਜਾਣੋ ਕਿੰਨਾ ਹੈ ਖ਼ਤਰਨਾਕ
ਨਿਊਯਾਰਕ: ਕੋਰੋਨਾ ਵਾਇਰਸ ਦੇ ਨਵੇਂ ਵੇਰੀਐਂਟ PJ.2.1 ਨੇ ਦੁਨੀਆ ਭਰ ਵਿੱਚ ਮੁੜ ਤੋਂ ਚਿੰਤਾਵਾਂ ਵਧਾ ਦਿੱਤੀਆਂ ਹਨ। ਮਈ 2026 ਵਿੱਚ ਪਹਿਲੀ ਵਾਰ ਕੈਨੇਡਾ ਦੇ ਓਨਟਾਰੀਓ ਸੂਬੇ ਵਿੱਚ ਪਾਇਆ ਗਿਆ ਇਹ ਵੇਰੀਐਂਟ ਹੁਣ ਅਮਰੀਕਾ, ਯੂਰਪ, ਆਸਟ੍ਰੇਲੀਆ, ਨਿਊਜ਼ੀਲੈਂਡ ਅਤੇ ਏਸ਼ੀਆ ਦੇ ਕੁਝ ਹਿੱਸਿਆਂ ਤੱਕ ਪਹੁੰਚ ਗਿਆ ਹੈ। ਇਸ ਦੇ ਤੇਜ਼ੀ ਨਾਲ ਫੈਲਣ ਕਾਰਨ ਵਿਗਿਆਨੀ ਅਲਰਟ ਹੋ ਗਏ ਹਨ ਅਤੇ ਕੋਰੋਨਾ ਦੀ ਇੱਕ ਹੋਰ ਲਹਿਰ ਦਾ ਡਰ ਪੈਦਾ ਹੋ ਗਿਆ ਹੈ।
'ਜਰਨਲ ਆਫ ਇਨਫੈਕਸ਼ਨ' ਵਿੱਚ ਪ੍ਰਕਾਸ਼ਿਤ ਸ਼ੁਰੂਆਤੀ ਖੋਜ ਮੁਤਾਬਕ, PJ.2.1 ਵੇਰੀਐਂਟ ਦੇ ਸਪਾਈਕ ਪ੍ਰੋਟੀਨ ਵਿੱਚ ਵੱਡੇ ਪੱਧਰ 'ਤੇ ਬਦਲਾਅ (ਮਿਊਟੇਸ਼ਨ) ਵੇਖੇ ਗਏ ਹਨ। ਅਜਿਹੇ ਵਾਇਰਸ ਨੂੰ 'ਸਾਲਟੇਸ਼ਨ ਵੇਰੀਐਂਟ' ਕਿਹਾ ਜਾਂਦਾ ਹੈ, ਜਿਸ ਵਿੱਚ ਇੱਕੋ ਸਮੇਂ ਕਈ ਆਨੁਵੰਸ਼ਿਕ ਬਦਲਾਅ ਹੁੰਦੇ ਹਨ। ਲੈਬ ਟੈਸਟਾਂ ਤੋਂ ਪਤਾ ਲੱਗਾ ਹੈ ਕਿ ਇਸ ਦੀ ਤੇਜ਼ੀ ਨਾਲ ਫੈਲਣ ਦੀ ਮੁੱਖ ਵਜ੍ਹਾ ਵੈਕਸੀਨ ਦੀ ਐਂਟੀਬਾਡੀ ਨੂੰ ਚਕਮਾ ਦੇਣਾ ਨਹੀਂ, ਸਗੋਂ ਮਨੁੱਖੀ ਸੈੱਲਾਂ ਦੇ ACE2 ਰਿਸੈਪਟਰ ਨਾਲ ਇਸਦਾ ਬਹੁਤ ਮਜ਼ਬੂਤੀ ਨਾਲ ਜੁੜਨਾ ਹੈ, ਜਿਸ ਕਾਰਨ ਇਹ ਸਰੀਰ ਵਿੱਚ ਆਸਾਨੀ ਨਾਲ ਦਾਖਲ ਹੋ ਜਾਂਦਾ ਹੈ।
ਸਭ ਤੋਂ ਵੱਡਾ ਸਵਾਲ ਇਹ ਸੀ ਕਿ ਕੀ ਮੌਜੂਦਾ ਵੈਕਸੀਨ ਇਸ ਨਵੇਂ ਵੇਰੀਐਂਟ 'ਤੇ ਅਸਰਦਾਰ ਹੈ? ਸ਼ੁਰੂਆਤੀ ਅਧਿਐਨ ਨੇ ਰਾਹਤ ਦਿੱਤੀ ਹੈ ਕਿ ਜਿਨ੍ਹਾਂ ਲੋਕਾਂ ਨੇ ਨਵੇਂ ਵੇਰੀਐਂਟਸ ਮੁਤਾਬਕ ਤਿਆਰ ਕੀਤੀ ਗਈ ਵੈਕਸੀਨ ਲਈ ਸੀ, ਉਨ੍ਹਾਂ ਦੇ ਸਰੀਰ ਵਿੱਚ ਬਣੀਆਂ ਐਂਟੀਬਾਡੀਜ਼ PJ.2.1 ਨੂੰ ਬੇਅਸਰ ਕਰਨ ਵਿੱਚ ਕਾਮਯਾਬ ਰਹੀਆਂ ਹਨ। ਹਾਲਾਂਕਿ ਹਰ ਵਿਅਕਤੀ ਦੀ ਇਮਿਊਨਿਟੀ ਵੱਖਰੀ ਹੁੰਦੀ ਹੈ, ਇਸ ਲਈ ਵਿਗਿਆਨੀ ਇਸ ਵੇਰੀਐਂਟ 'ਤੇ ਲਗਾਤਾਰ ਨਜ਼ਰ ਰੱਖ ਰਹੇ ਹਨ।
