ਮਨੋਰੰਜਨ ਡੈਸਕ, ਨਵੀਂ ਦਿੱਲੀ : ਹਿੰਦੀ ਸਿਨੇਮਾ ਦੀ ਮਸ਼ਹੂਰ ਅਦਾਕਾਰਾ ਸ਼ਿਲਪਾ ਸ਼ੈੱਟੀ ਦੇ ਪਤੀ ਰਾਜ ਕੁੰਦਰਾ ਅਕਸਰ ਆਪਣੀ ਨਿੱਜੀ ਜ਼ਿੰਦਗੀ ਨੂੰ ਲੈ ਕੇ ਸੁਰਖੀਆਂ ‘ਚ ਰਹਿੰਦੇ ਹਨ। ਹਾਲ ਹੀ ‘ਚ ਰਾਜ ਨੇ ਸੋਸ਼ਲ ਮੀਡੀਆ ‘ਤੇ ਇਕ ਪੋਸਟ ਕੀਤੀ ਹੈ, ਜਿਸ ਤੋਂ ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਉਹ ਸ਼ਿਲਪਾ ਤੋਂ ਵੱਖ ਹੋ ਰਹੇ ਹਨ। ਦੇਖੋ ਉਸ ਦੀ ਤਾਜ਼ਾ ਪੋਸਟ। ਰਾਜ ਕੁੰਦਰਾ ਇਨ੍ਹੀਂ ਦਿਨੀਂ ਆਪਣੀ ਆਉਣ ਵਾਲੀ ਫਿਲਮ UT 69 ਨੂੰ ਲੈ ਕੇ ਸੁਰਖੀਆਂ ‘ਚ ਹਨ। ਕੁਝ ਦਿਨ ਪਹਿਲਾਂ ਫਿਲਮ ਦਾ ਟ੍ਰੇਲਰ ਵੀ ਰਿਲੀਜ਼ ਹੋਇਆ ਸੀ, ਜਿਸ ‘ਚ ਰਾਜ ਨਾਲ ਜੇਲ੍ਹ ‘ਚ ਹੋਈ ਹੱਡਬੀਤੀ ਦੀ ਝਲਕ ਦਿਖਾਈ ਗਈ ਸੀ। ਇਸ ਦੌਰਾਨ ਅਦਾਕਾਰ ਨੇ ਸੋਸ਼ਲ ਮੀਡੀਆ ‘ਤੇ ਅਜਿਹੀ ਪੋਸਟ ਸ਼ੇਅਰ ਕੀਤੀ, ਜਿਸ ਨੂੰ ਦੇਖ ਕੇ ਹਰ ਕੋਈ ਹੈਰਾਨ ਰਹਿ ਗਿਆ।

ਕੀ ਅਲੱਗ ਹੋ ਗਏ ਰਾਜ ਕੁੰਦਰਾ ਤੇ ਸ਼ਿਲਪਾ ਸ਼ੈੱਟੀ?

ਦਰਅਸਲ ਰਾਜ ਕੁੰਦਰਾ ਨੇ ਅੱਧੀ ਰਾਤ ਨੂੰ ਆਪਣੇ ਟਵਿੱਟਰ ‘ਤੇ ਇਕ ਟਵੀਟ ਸ਼ੇਅਰ ਕੀਤਾ, ਜਿਸ ਨੇ ਇੰਟਰਨੈੱਟ ‘ਤੇ ਹਲਚਲ ਮਚਾ ਦਿੱਤੀ। ਟਵੀਟ ਵਿਚ ਰਾਜ ਨੇ ਲਿਖਿਆ, ‘ਅਸੀਂ ਅਲੱਗ ਹੋ ਗਏ ਹਾਂ। ਤੁਹਾਨੂੰ ਬੇਨਤੀ ਹੈ ਕਿ ਇਸ ਮੁਸ਼ਕਲ ਦੌਰ ਵਿਚ ਸਾਨੂੰ ਕੁਝ ਸਮਾਂ ਦਿਓ।’ ਇਸ ਦੇ ਨਾਲ ਹੀ ਰਾਜ ਨੇ ਟੁੱਟੇ ਦਿਲ ਅਤੇ ਹੱਥ ਜੋੜ ਕੇ ਇਮੋਜੀ ਵੀ ਬਣਾਈ।

ਲੋਕ ਦੇ ਰਹੇ ਹਨ ਅਜਿਹੀ ਪ੍ਰਤੀਕਿਰਿਆ

ਇਸ ਪੋਸਟ ਦੇ ਸਾਹਮਣੇ ਆਉਣ ਤੋਂ ਬਾਅਦ ਸਵਾਲ ਉੱਠਣੇ ਸ਼ੁਰੂ ਹੋ ਗਏ ਹਨ ਕਿ ਕੀ ਰਾਜ ਕੁੰਦਰਾ ਅਤੇ ਸ਼ਿਲਪਾ ਸ਼ੈੱਟੀ ਵੱਖ ਹੋ ਗਏ ਹਨ। ਕਈ ਲੋਕ ਇਸ ਨੂੰ ਪ੍ਰਮੋਸ਼ਨ ਦੱਸ ਰਹੇ ਹਨ। ਇਕ ਯੂਜ਼ਰ ਨੇ ਪੁੱਛਿਆ, ‘ਵੱਖ ਹੋਣ ਦਾ ਮਤਲਬ ਤਲਾਕ?’ ਇੱਕ ਨੇ ਕਿਹਾ, ‘ਘਟੀਆ ਨੌਟੰਕੀ।’ ਇਕ ਯੂਜ਼ਰ ਨੇ ਲਿਖਿਆ, ‘ਫਿਲਮ ਪਬਲੀਸਿਟੀ ਲਈ ਕੁਝ ਵੀ ਕਰ ਸਕਦੇ ਹਾਂ।’ ਇਕ ਨੇ ਕਿਹਾ, ‘ਵੱਖ ਹੋਣ ਦਾ ਮਤਲਬ ਹੈ ਰਾਜ ਕੁੰਦਰਾ ਤੋਂ ਮਾਸਕ ਨੂੰ ਵੱਖ ਕਰਨਾ।’ ਇਸੇ ਤਰ੍ਹਾਂ ਕਈ ਲੋਕ ਰਾਜ ਕੁੰਦਰਾ ਨੂੰ ਖੂਬ ਟ੍ਰੋਲ ਕਰ ਰਹੇ ਹਨ।

ਰਾਜ ਕੁੰਦਰਾ ਦੀ ਫਿਲਮ ਕਦੋਂ ਹੋਵੇਗੀ ਰਿਲੀਜ਼?

ਰਾਜ ਕੁੰਦਰਾ ਦੀ ਆਉਣ ਵਾਲੀ ਫਿਲਮ ‘ਯੂਟੀ 69’ ਉਨ੍ਹਾਂ ਦੀ ਜ਼ਿੰਦਗੀ ਦੀ ਕਹਾਣੀ ਬਿਆਨ ਕਰਦੀ ਫਿਲਮ ਹੈ। ਸ਼ਾਹਨਵਾਜ਼ ਅਲੀ ਦੇ ਨਿਰਦੇਸ਼ਨ ‘ਚ ਬਣੀ ਰਾਜ ਦੀ ਫਿਲਮ ਦਾ ਟ੍ਰੇਲਰ ਹਾਲ ਹੀ ‘ਚ ਰਿਲੀਜ਼ ਹੋਇਆ ਹੈ। ਇਹ ਫਿਲਮ 3 ਨਵੰਬਰ 2023 ਨੂੰ ਸਿਨੇਮਾਘਰਾਂ ‘ਚ ਰਿਲੀਜ਼ ਹੋਵੇਗੀ। ਇਸ ਵਿਚ ਰਾਜ ਮੁੱਖ ਹੀਰੋ ਹਨ।