ਕਦੇ ਵੀ ਹਾਂ ‘ਚ ਨਾ ਦਿਓ, ਇਸ ਫੋਨ ਕਾਲ ਦਾ ਜਵਾਬ, ਪੈ ਸਕਦੇ ਹੋ ਵੱਡੀ ਮੁਸੀਬਤ ‘ਚ
ਟੋਰਾਂਟੋ— ਜੇਕਰ ਤੁਸੀਂ ਤੁਹਾਨੂੰ ਕੋਈ ਕਾਲ ਆਉਂਦੀ ਹੈ ਅਤੇ ਉਸ ‘ਤੇ ਤੁਹਾਨੂੰ ਪੁੱਛਿਆ ਜਾਂਦਾ ਹੈ ਕਿ ‘ਕੈਨ ਯੂ ਹੀਅਰ ਮੀ’ (ਕੀ ਤੁਸੀਂ ਮੈਨੂੰ ਸੁਣ ਸਕਦੇ ਹੋ) ਤਾਂ ਇਸ ਦਾ ਜਵਾਬ ਕਦੇ ਵੀ ‘ਹਾਂ’ ਵਿਚ ਨਾ ਦਿਓ। ਤੁਹਾਡੇ ਇਸ ਜਵਾਬ ਨੂੰ ਕਿਸੇ ਪ੍ਰੋਡਕਟ ਨੂੰ ਖਰੀਦਣ ਲਈ ਤੁਹਾਡੀ ਸਹਿਮਤੀ ਦੇ ਤੌਰ ‘ਤੇ ਵਰਤਿਆ ਜਾ ਸਕਦਾ ਹੈ ਅਤੇ ਤੁਹਾਡੇ ਤੋਂ ਇਸ ਲਈ ਪੈਸਿਆਂ ਦੀ ਮੰਗ ਕੀਤੀ ਜਾ ਸਕਦੀ ਹੈ। ਇਨਕਾਰ ਕੀਤੇ ਜਾਣ ‘ਤੇ ਸਬੂਤ ਵਜੋਂ ਤੁਹਾਡੇ ਵੱਲੋਂ ਕੀਤੀ ਗਈ ‘ਹਾਂ’ ਦੀ ਆਵਾਜ਼ ਨੂੰ ਤੁਹਾਡੇ ਖਿਲਾਫ ਵਰਤਿਆ ਜਾ ਸਕਦਾ ਹੈ। ਅਸਲ ਵਿਚ ਅਮਰੀਕਾ ਵਿਚ ਇਸ ਤਰ੍ਹਾਂ ਦੇ ਕਈ ਮਾਮਲੇ ਸਾਹਮਣੇ ਆਏ ਹਨ, ਜਿਸ ਵਿਚ ਇਸ ਤਰ੍ਹਾਂ ਦੀ ਘਪਲੇਬਾਜ਼ੀ ਕੀਤੀ ਗਈ। ਅਸਲ ਵਿਚ ਇਹ ਲੋਕ ਤੁਹਾਡੀ ਨਿੱਜੀ ਜਾਣਕਾਰੀ , ਜਿਵੇਂ ਕਿ ਕਰੈਡਿਟ ਕਾਰਡ ਨੰਬਰ ਅਤੇ ਹੋਰ ਜਾਣਕਾਰੀ ਪਹਿਲਾਂ ਹੀ ਹਾਸਲ ਕਰ ਚੁੱਕੇ ਹੁੰਦੇ ਹਨ ਅਤੇ ਤੁਹਾਡੀ ਇਕ ‘ਹਾਂ’ ਇਨ੍ਹਾਂ ਦਾ ਕੰਮ ਹੋਰ ਸੌਖਾ ਕਰ ਦਿੰਦੀ ਹੈ।
ਅਮਰੀਕੀ ਫੈਡਰਲ ਵਪਾਰ ਕਮਿਸ਼ਨ ਨੇ ਲੋਕਾਂ ਨੂੰ ਚਿਤਾਵਨੀ ਦਿੰਦੇ ਹੋਏ ਕਿਹਾ ਕਿ ਕਿਸੇ ਨੂੰ ਵੀ ਫੋਨ ‘ਤੇ ਆਪਣੀ ਨਿੱਜੀ ਜਾਣਕਾਰੀ ਨਾ ਦਿਓ। ਫਿਲਹਾਲ ਅਜੇ ਤੱਕ ਇਹ ਮਾਮਲੇ ਅਮਰੀਕਾ ਵਿਚ ਹੀ ਸਾਹਮਣੇ ਆਏ ਹਨ ਅਤੇ ਕੈਨੇਡਾ ਵਿਚ ਇਸ ਤਰ੍ਹਾਂ ਦੇ ਮਾਮਲੇ ਸਾਹਮਣੇ ਨਹੀਂ ਆਏ ਹਨ ਪਰ ਕੈਨੇਡਾ ਵਾਸੀਆਂ ਨੂੰ ਵੀ ਹਦਾਇਤ ਕੀਤੀ ਗਈ ਹੈ ਕਿ ਉਹ ਇਸ ਤਰ੍ਹਾਂ ਦੀਆਂ ਫੋਨ ਕਾਲਜ਼ ਤੋਂ ਬਚ ਕੇ ਰਹਿਣ ਅਤੇ ਸਾਵਧਾਨੀ ਨਾਲ ਇਨ੍ਹਾਂ ਦਾ ਜਵਾਬ ਦੇਣ।
