ਹੁਣ 73 ਸਾਲਾ ਡੋਨਾਲਡ ਟਰੰਪ ਅਗਲੇ ਮਹੀਨੇ ਸੈਨੇਟ ’ਚ ਸੁਣਵਾਈ ਦਾ ਸਾਹਮਣਾ ਕਰ ਸਕਦੇ ਹਨ। ਅਮਰੀਕਾ ਦੀ ਹਾਊਸ ਆੱਫ਼ ਜੁਡੀਸ਼ੀਅਰੀ ਨੇ ਦੱਸਿਆ ਕਿ ਹਾਊਸ ਆੱਫ਼ ਰੀਪ੍ਰੈਜ਼ੈਂਟੇਟਿਵ ਨੇ ਸੰਯੁਕਤ ਰਾਜ ਅਮਰੀਕਾ ਦੇ 45ਵੇਂ ਰਾਸ਼ਟਰਪਤੀ ਡੋਨਾਲਡ ਟਰੰਪ ਉੱਤੇ ਮਹਾਂਦੋਸ਼ ਲਾਉਣ ਦੇ ਪ੍ਰਸਤਾਵ ਦੇ ਹੱਕ ਵਿੱਚ ਵੋਟਿੰਗ ਕੀਤੀ ਹੈ। ਦੋਸ਼ ਹੈ ਕਿ ਉਨ੍ਹਾਂ ਆਪਣੇ ਸੌੜੇ ਹਿਤਾਂ ਲਈ ਸੱਤਾ ਦੀ ਦੁਰਵਰਤੋਂ ਕੀਤੀ ਹੈ।
ਇੱਥੇ ਵਰਨਣਯੋਗ ਹੈ ਕਿ ਅਮਰੀਕਾ ’ਚ ਪ੍ਰਤੀਨਿਧ ਸਦਨ ਨੂੰ ਬਿਲਕੁਲ ਉਵੇਂ ਹੀ ਹੇਠਲਾ ਸਦਨ ਵੀ ਆਖਿਆ ਜਾਂਦਾ ਹੈ; ਜਿਵੇਂ ਕਿ ਭਾਰਤ ਦੀ ਲੋਕ ਸਭਾ ਲਈ ਇਹ ਨਾਂਅ ਵਰਤਿਆ ਜਾਂਦਾ ਹੈ। ਅਮਰੀਕਾ ਦੇ ਹੇਠਲੇ ਸਦਨ ’ਚ ਪ੍ਰਸਤਾਵ ਪਾਸ ਹੋ ਜਾਣ ਤੋਂ ਬਾਅਦ ਹੁਣ ਉੱਪਰਲੇ ਸਦਨ ਸੈਨੇਟ ਵਿੱਚ ਸ੍ਰੀ ਟਰੰਪ ਨੂੰ ਮੁਕੱਦਮੇ ਦਾ ਸਾਹਮਣਾ ਕਰਨਾ ਪਵੇਗਾ।
ਇੱਥੇ ਵਰਨਣਯੋਗ ਹੈ ਕਿ ਸੈਨੇਟ ਵਿੱਚ ਸ੍ਰੀ ਟਰੰਪ ਦੀ ਪਾਰਟੀ ਰੀਪਬਲਿਕਨ ਨੂੰ ਬਹੁਮੱਤ ਹਾਸਲ ਹੈ; ਇੰਝ ਅਮਰੀਕੀ ਰਾਸ਼ਟਰਪਤੀ ਵਿਰੁੱਧ ਇਹ ਮਤਾ ਉੱਪਰਲੇ ਸਦਨ ਵਿੱਚ ਨਾਕਾਮ ਰਹਿ ਸਕਦਾ ਹੈ।
ਸ੍ਰੀ ਟਰੰਪ ਉੱਤੇ ਮਹਾਂਦੋਸ਼ ਦੀ ਕਾਰਵਾਈ ਸ਼ੁਰੂ ਕਰਨ ਦੇ ਮਾਮਲੇ ’ਤੇ ਸੰਸਦ ਦੇ ਹੇਠਲੇ ਸਦਨ ਵਿੱਚ ਬੁੱਧਵਾਰ ਨੂੰ ਲਗਭਗ 10 ਘੰਟਿਆਂ ਤੱਕ ਬਹਿਸ ਚੱਲੀ।
ਹੇਠਲੇ ਸਦਨ ਦੇ ਸਪੀਕਰ ਨੈਂਸੀ ਪੈਲੋਸੀ ਹਨ। ਉਹੀ ਇਸ ਪ੍ਰਸਤਾਵ ਨੂੰ ਅੱਗੇ ਵਧਾਉਣ ਲਈ ਮੋਹਰੀ ਹੋ ਕੇ ਕੰਮ ਕਰਦੇ ਰਹੇ ਹਨ।
