ਅੰਮ੍ਰਿਤਸਰ, (ਸੁਖਵਿੰਦਰਜੀਤ ਸਿੰਘ ਬਹੋੜੂ) : ਖ਼ਾਲਿਸਤਾਨ ਸੰਘਰਸ਼ ਦੇ ਮੋਢੀ ਅਤੇ ਖ਼ਾਲਿਸਤਾਨ ਦੇ ‘ਰਾਸ਼ਟਰਪਤੀ’ ਵਜੋਂ ਜਾਣੇ ਜਾਂਦੇ ਡਾ. ਗੁਰਮੀਤ ਸਿੰਘ ਔਲਖ ਨਮਿਤ ਅਰਦਾਸ ਸਮਾਗਮ ਗੁਰਦੁਆਰਾ ਸਿੰਘ ਸਭਾ ਫ਼ੇਅਰਫ਼ੈਕਸ, ਅਮਰੀਕਾ ਵਿਖੇ ਹੋਇਆ। ਉਹ ਕੈਂਸਰ ਦੀ ਗੰਭੀਰ ਬੀਮਾਰੀ ਤੋਂ ਪੀੜਤ ਸਨ ਤੇ ਉਨ੍ਹਾਂ ਦਾ 21 ਜੂਨ 2017 ਨੂੰ ਅਮਰੀਕਾ ਵਿਖੇ ਦੇਹਾਂਤ ਹੋਇਆ ਸੀ। ਸੰਨ 1969 ‘ਚ ਅਪਣੇ ਜੱਦੀ ਪਿੰਡ ਮਜੀਠਾ ਤੋਂ ਅਮਰੀਕਾ ਗਏ ਡਾ. ਗੁਰਮੀਤ ਸਿੰਘ ਔਲਖ 1984 ਬਾਅਦ ਤੋਂ ਕਦੇ ਭਾਰਤ ਨਹੀਂ ਆਏ। ਉਨ੍ਹਾਂ ਦਾ ਨਾਂਅ ਕਾਲੀ ਸੂਚੀ ਵਿਚ ਦਰਜ ਸੀ ਅਤੇ ਲੰਬੇ ਸਮੇਂ ਤੋਂ ਖ਼ਾਲਿਸਤਾਨ ਸੰਘਰਸ਼ ਲਈ ਘੋਲ ਕਰ ਰਹੇ ਸਨ।
ਉਨ੍ਹਾਂ ਦੀ ਅੰਤਮ ਅਰਦਾਸ ‘ਚ ਸਿੱਖ ਯੂਥ ਆਫ਼ ਅਮਰੀਕਾ ਤੇ ਪ੍ਰਤੀਨਿਧ, ਸਿੱਖ ਫਾ ਜਸਟਿਸ, ਖ਼ਾਲਿਸਤਾਨ ਮਾਮਲਿਆਂ ਸਬੰਧੀ ਕੇਂਦਰ, ਦਲ ਖ਼ਾਲਸਾ ਯੂ ਐਸ ਏ, ਅਕਾਲੀ ਦਲ (ਅੰਮ੍ਰਿਤਸਰ) ਸਮੇਤ ਵੱਖ ਵੱਖ ਸਿੱਖ ਸੰਗਠਨਾਂ ਦੇ ਆਗੂਆਂ ਸ਼ਮੂਲੀਅਤ ਕੀਤੀ। ਡਾ. ਔਲਖ ਦੀ ਪਤਨੀ ਚਰਨਜੀਤ ਕੌਰ, ਬੇਟੀ ਅਰਤਿੰਦਰ ਕੌਰ, ਬੇਟੇ ਉਰਮਿੰਦਰ ਸਿੰਘ ਔਲਖ ਤੇ ਬਿਕਰਮਜੀਤ ਸਿੰਘ ਔਲਖ ਨਾਲ ਉਕਤ ਸੰਗਠਨਾਂ ਨੇ ਦੁੱਖ ਸਾਂਝਾ ਕੀਤਾ। ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਦਲ ਖ਼ਾਲਸਾ ਦੇ ਬੁਲਾਰੇ ਕੰਵਰਪਾਲ ਸਿੰਘ ਨੇ ਦਸਿਆ ਕਿ ਉਨ੍ਹਾਂ ਦੀ ਪਾਰਟੀ ਦੇ ਸੀਨੀਅਰ ਆਗੂ ਹਰਚਰਨਜੀਤ ਸਿੰਘ ਧਾਮੀ ਪੰਜਾਬ ਤੋਂ ਡਾ. ਔਲਖ ਦੇ ਅਰਦਾਸ ਸਮਾਗਮ ‘ਚ ਗਏ ਸਨ। ਉਨ੍ਹਾਂ ਨੇ ਵੱਖ ਵੱਖ ਮੁਲਕਾਂ ਤੋਂ ਪੁੱਜੀਆਂ ਸ਼ਖ਼ਸੀਅਤਾਂ ਦੀ ਮੌਜੂਦਗੀ ‘ਚ ਹਾਜ਼ਰੀਨ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਡਾ. ਗੁਰਮੀਤ ਸਿੰਘ ਔਲਖ ਸਿੱਖ ਸੰਘਰਸ਼ ਲਈ ਪਾਏ ਗਏ ਯੋਗਦਾਨ ਨੂੰ ਸਿੱਖ ਕੌਮ ਹਮੇਸ਼ਾ ਯਾਦ ਰੱਖੇਗੀ।