ਭਾਰਤ (ਰਮਨਦੀਪ ਸਿੰਘ ਭਾਗੂ)
ਭਾਰਤ ‘ਚ ਜ਼ਿੰਦਗੀ ਤੇ ਇੱਜ਼ਤ ਕਿੰਨੀ ਸਸਤੀ ਹੋ ਗਈ ਹੈ ਇਸ ਦਾ ਇੱਕ ਨਮੂਨਾ ਨੈਸ਼ਨਲ ਕ੍ਰਾਈਮ ਰਿਕਾਰਡ ਬਿਓਰੋ ਵੱਲੋਂ ਜਾਰੀ ਕੀਤੇ ਅੰਕੜਿਆਂ ਤੋਂ ਬਾਖੂਬੀ ਹੋ ਜਾਂਦਾ ਹੈ। ਇਹ ਅੰਕੜੇ ਦੱਸਦੇ ਨੇ ਕਿ ਦੇਸ਼ ਅੰਦਰ ਨਾ ਤਾਂ ਇਨਸਾਨ ਦੀ ਜ਼ਿੰਦਗੀ ਦੀ ਕੋਈ ਕੀਮਤ ਹੈ ਤੇ ਨਾ ਹੀ ਔਰਤ ਦੀ ਇੱਜ਼ਤ ਦੀ ਹੈ।
ਇਸ ਰਿਪੋਰਟ ਤੋਂ ਮੁਤਾਬਿਕ ਦੇਸ਼ ਅੰਦਰ 1,44,125 ਸਜ਼ਾਯਾਫ਼ਤਾ ਕੈਦੀ ਹਨ ਪਰ ਇਹਨਾਂ ‘ਚ ਵੱਡੀ ਗਿਣਤੀ ਉਹਨਾਂ ਦੀ ਹੈ ਜਿਹਨਾਂ ਨੇ ਜਾਂ ਤਾਂ ਕਤਲ ਕੀਤੇ ਹਨ ਜਾਂ ਫਿਰ ਔਰਤਾਂ ਨਾਲ ਰੇਪ ਕੀਤਾ ਹੈ। ਇਸ ਵਕਤ ਦੇਸ਼ ਦੀਆਂ ਜੇਲ੍ਹਾਂ ਅੰਦਰ 72,210 ਸਜ਼ਾਯਾਫ਼ਤਾ ਕੈਦੀ ਕਤਲ ਦੇ ਕੇਸਾਂ ਅਧੀਨ ਸਜ਼ਾ ਕੱਟ ਰਹੇ ਹਨ। 13,464 ਕੈਦੀ ਰੇਪ ਦੇ ਮਾਮਲਿਆਂ ਦੇ ਦੋਸ਼ੀ ਹਨ ਜੋ ਆਪਣੇ ਕੀਤੇ ਗੁਨਾਹਾਂ ਦੀ ਸਜ਼ਾ ਭੁਗਤ ਰਹੇ ਹਨ। IPC ਕ੍ਰਾਈਮ ਤਹਿਤ 2,58,883 ਕੈਦੀ ਅੰਡਰ ਟ੍ਰਾਇਲ ਹਨ, ਇਹਨਾਂ ‘ਚੋਂ 1,64,945 (63ਫੀਸਦ) ਉਹ ਕੈਦੀ ਹਨ ਜਿਹਨਾਂ ਨੇ ਮਨੁੱਖੀ ਸਰੀਰ ਨੂੰ ਨੁਕਸਾਨ ਪਹੁੰਚਿਆ ਹੈ ਯਾਨੀ ਕਤਲ, ਕਤਲ ਦੀ ਕੋਸ਼ਿਸ਼ ਜਾਂ ਰੇਪ ਦੇ ਮਾਮਲੇ ਹਨ। ਔਰਤਾਂ ਖਿਲਾਫ ਹੋਏ ਅਪਰਾਧਾਂ ਦੇ ਕੇਸਾਂ ‘ਚ 34,368 (59.8ਫੀਸਦ) ਕੈਦੀ ਰੇਪ ਦੇ ਮਾਮਲਿਆਂ ‘ਚ ਅੰਡਰ ਟ੍ਰਾਇਲ ਹਨ, ਜਦਕਿ 13,287 (23.1 ਫੀਸਦ) ਦਾਜ ਲਈ ਕੀਤੇ ਕਤਲ ਦੇ ਕੇਸਾਂ ‘ਚ ਬੰਦ ਹਨ। ਇਸੇ ਤਰ੍ਹਾਂ ਪ੍ਰਾਪਰਟੀ ਫਰਾਡ ਦੇ ਕੇਸਾਂ ‘ਚ 74,713 (28.9ਫੀਸਦ) ਅੰਡਰ ਟ੍ਰਾਇਲ ਕੈਦੀ ਜੇਲ੍ਹਾਂ ‘ਚ ਬੰਦ ਹਨ।
