ਸਿਟੀ ਆਫ਼ ਸਰੀ ਅਤੇ ਪ੍ਰੋਲੋਜਿਸ ਨੇ ਕੈਂਬਲ ਹਾਈਟਸ ਦੇ ਵੱਡੇ ਵਿਕਾਸ ਲਈ ਪ੍ਰਸਤਾਵਿਤ ਲੀਜ਼ ਨੂੰ ਅੱਗੇ ਵਧਾਇਆ

ਸਰੀ, ਬੀ.ਸੀ. – ਸਿਟੀ ਆਫ਼ ਸਰੀ ਅਤੇ ਪ੍ਰੋਲੋਜਿਸ (Prologis), ਜੋ ਲੋਜਿਸਟਿਕਸ ਰੀਅਲ ਐਸਟੇਟ ਖੇਤਰ ਵਿੱਚ ਇੱਕ ਗਲੋਬਲ ਲੀਡਰ ਕੰਪਨੀ ਹੈ, ਦਰਮਿਆਨ ਇੱਕ ਪ੍ਰਸਤਾਵਿਤ ਲੰਬੇ ਸਮੇਂ ਦੀ ਲੀਜ਼ ਸਬੰਧੀ ਉੱਚ ਪੱਧਰੀ ਵਿਚਾਰ-ਵਟਾਂਦਰੇ ਕਰ ਰਹੇ ਹਨ। ਇਹ ਪ੍ਰੋਜੈਕਟ ਵੱਡੇ ਪੱਧਰ ‘ਤੇ ਨਿਵੇਸ਼ ਨੂੰ ਉਤਸ਼ਾਹਿਤ ਕਰੇਗਾ, ਸੈਂਕੜੇ ਸਥਾਨਕ ਰੋਜ਼ਗਾਰ ਦੇ ਮੌਕੇ ਪੈਦਾ ਕਰੇਗਾ ਅਤੇ ਬ੍ਰਿਟਿਸ਼ ਕੋਲੰਬੀਆ ਵਿੱਚ ਸਰੀ ਦੀ ਆਰਥਿਕ ਕੇਂਦਰ ਵਜੋਂ ਸਥਿਤੀ ਨੂੰ ਹੋਰ ਮਜ਼ਬੂਤ ਕਰੇਗਾ।

ਸੋਮਵਾਰ ਨੂੰ, ਸਿਟੀ ਕੌਂਸਲ ਨੇ ਕੈਂਬਲ ਹਾਈਟਸ ਵਿੱਚ ਸਥਿਤ ਸਿਟੀ ਦੀ ਮਲਕੀਅਤ ਵਾਲੀ 36 ਏਕੜ ਜ਼ਮੀਨ ਦੀ ਪ੍ਰਸਤਾਵਿਤ ਲੀਜ਼ ਨੂੰ ਅੱਗੇ ਵਧਾਉਣ ਲਈ ਮਨਜ਼ੂਰੀ ਦੇ ਦਿੱਤੀ। ਇਹ ਮਨਜ਼ੂਰੀ ਖ਼ਾਸ ਜਾਂਚ-ਪੜਤਾਲ (Due Diligence), ਅੰਤਿਮ ਸਮਝੌਤਿਆਂ ‘ਤੇ ਦਸਤਖ਼ਤ ਅਤੇ ਲੀਜ਼ ਦੀਆਂ ਸਾਰੀਆਂ ਲੋੜੀਂਦੀਆਂ ਸ਼ਰਤਾਂ ਪੂਰੀਆਂ ਹੋਣ ਦੇ ਅਧੀਨ ਹੈ। ਸੈਨ ਫ੍ਰਾਂਸਿਸਕੋ ਅਧਾਰਿਤ ਪ੍ਰੋਲੋਜਿਸ, ਜੋ ਪਿਛਲੇ ਦੋ ਦਹਾਕਿਆਂ ਤੋਂ ਵੱਧ ਸਮੇਂ ਤੋਂ ਕੈਨੇਡਾ ਵਿੱਚ ਕੰਮ ਕਰ ਰਹੀ ਹੈ, ਇਸ ਸਥਾਨ ‘ਤੇ ਇੱਕ ਵੱਡੇ ਲੋਜਿਸਟਿਕਸ ਵਿਕਾਸ ਪ੍ਰੋਜੈਕਟ ਦੀ ਯੋਜਨਾ ਦਾ ਮੁਲਾਂਕਣ ਕਰ ਰਹੀ ਹੈ।

ਪ੍ਰੋਜੈਕਟ ਦੇ ਪੂਰਾ ਹੋਣ ਉਪਰੰਤ, ਇਸ ਪ੍ਰਸਤਾਵਿਤ ਲੀਜ਼ ਨਾਲ ਸਿਟੀ ਨੂੰ ਇਸ ਜਾਇਦਾਦ ਤੋਂ ਹੋਣ ਵਾਲੀ ਸਾਲਾਨਾ ਆਮਦਨ ਲਗਭਗ ਦੁੱਗਣੀ ਹੋਣ ਦੀ ਉਮੀਦ ਹੈ, ਜਿਸ ਨਾਲ ਨਿਵਾਸੀਆਂ ਲਈ ਲੰਬੇ ਸਮੇਂ ਦਾ ਮਹੱਤਵਪੂਰਨ ਲਾਭ ਪੈਦਾ ਹੋਵੇਗਾ।

ਸਰੀ ਦੀ ਮੇਅਰ ਬਰੈਂਡਾ ਲੌਕ ਨੇ ਕਿਹਾ, “ਜਦੋਂ ਪ੍ਰੋਲੋਜਿਸ ਵਰਗੀ ਵਿਸ਼ਵ ਪੱਧਰੀ ਕੰਪਨੀ ਸਰੀ ਨੂੰ ਚੁਣਦੀ ਹੈ, ਤਾਂ ਇਹ ਸਾਡੇ ਸ਼ਹਿਰ ਵਿੱਚ ਮੌਜੂਦ ਮੌਕਿਆਂ ਬਾਰੇ ਇੱਕ ਮਜ਼ਬੂਤ ਸੰਦੇਸ਼ ਦਿੰਦੀ ਹੈ। ਇਹ ਪ੍ਰਸਤਾਵਿਤ ਨਿਵੇਸ਼ ਸਰੀ ਦੀ ਰਣਨੀਤਕ ਸਥਿਤੀ, ਮਜ਼ਬੂਤ ਆਵਾਜਾਈ ਸੰਬੰਧਾਂ ਅਤੇ ਕਾਰੋਬਾਰ ਲਈ ਉੱਤਮ ਥਾਂ ਵਜੋਂ ਇਸ ਦੀ ਸਾਖ਼ ਨੂੰ ਦਰਸਾਉਂਦਾ ਹੈ। ਇਹ ਸਥਾਨਕ ਰੋਜ਼ਗਾਰ ਪੈਦਾ ਕਰੇਗਾ, ਸਾਡੀ ਅਰਥਵਿਵਸਥਾ ਨੂੰ ਮਜ਼ਬੂਤ ਕਰੇਗਾ ਅਤੇ ਸਾਡੇ ਸ਼ਹਿਰ ਦੇ ਭਵਿੱਖ ਨੂੰ ਹੋਰ ਮਜ਼ਬੂਤ ਭਵਿੱਖ ਬਣਾਉਣ ਵਿੱਚ ਸਹਾਇਕ ਹੋਵੇਗਾ।”

ਪ੍ਰੋਲੋਜਿਸ, ਜਿਸ ਦੇ ਗਾਹਕਾਂ ਵਿੱਚ ਲੂਲੂਲੈਮਨ (Lululemon), ਐਮਾਜ਼ੋਨ (Amazon), ਵਾਲਮਾਰਟ (Walmart), ਹੋਮ ਡਿਪੋ (Home Depot) ਅਤੇ ਕੋਕਾ-ਕੋਲਾ (Coca-Cola) ਵਰਗੀਆਂ ਪ੍ਰਸਿੱਧ ਕੰਪਨੀਆਂ ਸ਼ਾਮਲ ਹਨ, ਲਗਭਗ 721,000 ਵਰਗ ਫੁੱਟ ਉਦਯੋਗਿਕ ਸਪੇਸ ਦੇ ਵਿਕਾਸ ‘ਤੇ ਵਿਚਾਰ ਕਰ ਰਹੀ ਹੈ। ਇਸ ਸਪੇਸ ਵਿੱਚ ਲੋਜਿਸਟਿਕਸ, ਵੇਅਰਹਾਊਸਿੰਗ, ਡਿਸਟ੍ਰੀਬਿਊਸ਼ਨ, ਦਫ਼ਤਰ ਅਤੇ ਪਾਰਕਿੰਗ ਦੀਆਂ ਸਹੂਲਤਾਂ ਸ਼ਾਮਲ ਹੋ ਸਕਦੀਆਂ ਹਨ।

ਪ੍ਰੋਲੋਜਿਸ ਦੇ ਵਾਈਸ ਪ੍ਰੈਜ਼ੀਡੈਂਟ ਅਤੇ ਇਨਵੈਸਟਮੈਂਟ ਅਫ਼ਸਰ ਮੈਟ ਬਰੌਕ (Matt Brock) ਨੇ ਕਿਹਾ, “ਸਰੀ ਇੱਕ ਮਹੱਤਵਪੂਰਨ ਮਾਰਕਿਟ ਹੈ, ਜਿੱਥੇ ਮਜ਼ਬੂਤ ਬੁਨਿਆਦੀ ਢਾਂਚਾ, ਸ਼ਾਨਦਾਰ ਆਵਾਜਾਈ ਸਹੂਲਤਾਂ ਅਤੇ ਤੇਜ਼ੀ ਨਾਲ ਵਧਦਾ ਕਾਰੋਬਾਰੀ ਭਾਈਚਾਰਾ ਮੌਜੂਦ ਹੈ। ਅਸੀਂ ਇਸ ਪ੍ਰੋਜੈਕਟ ਨੂੰ ਅੱਗੇ ਵਧਾਉਣ ਲਈ ਸਿਟੀ ਨਾਲ ਮਿਲ ਕੇ ਕੰਮ ਕਰਨ ਦੀ ਉਮੀਦ ਕਰਦੇ ਹਾਂ।”

ਪ੍ਰਸਤਾਵਿਤ ਸਮਝੌਤੇ ਤੋਂ 62 ਸਾਲਾਂ ਦੀ ਮਿਆਦ ਦੌਰਾਨ ਲੀਜ਼ ਅਤੇ ਜਾਇਦਾਦ ਟੈਕਸ (Property Tax) ਰਾਹੀਂ ਮਿਲਾਕੇ 1 ਬਿਲੀਅਨ ਡਾਲਰ ਤੋਂ ਵੱਧ ਦੀ ਆਮਦਨ ਹੋਣ ਦਾ ਅਨੁਮਾਨ ਹੈ। ਇਸ ਦੌਰਾਨ ਵੀ ਸਿਟੀ ਜ਼ਮੀਨ ਦੀ ਮਲਕੀਅਤ ਆਪਣੇ ਕੋਲ ਰੱਖੇਗੀ ਅਤੇ ਲੀਜ਼ ਖ਼ਤਮ ਹੋਣ ਤੋਂ ਬਾਅਦ ਵੀ ਇਹ ਜਨਤਕ ਸੰਪਤੀ ਭਵਿੱਖ ਦੀਆਂ ਪੀੜ੍ਹੀਆਂ ਲਈ ਸੁਰੱਖਿਅਤ ਰਹੇਗੀ।

ਕੈਂਬਲ ਹਾਈਟਸ ਮੈਟਰੋ ਵੈਨਕੂਵਰ ਦੇ ਪ੍ਰਮੁੱਖ ਉਦਯੋਗਿਕ ਅਤੇ ਕਾਰੋਬਾਰੀ ਪਾਰਕਾਂ ਵਿੱਚੋਂ ਇੱਕ ਹੈ ਅਤੇ ਖੇਤਰ ਵਿੱਚ ਬਾਕੀ ਰਹਿ ਗਈਆਂ ਉਦਯੋਗਿਕ ਵਿਕਾਸ ਦੇ ਮਹੱਤਵਪੂਰਨ ਮੌਕਿਆਂ ਵਿੱਚੋਂ ਇੱਕ ਮੰਨਿਆ ਜਾਂਦਾ ਹੈ। ਬੀਡੀ (Beedie) ਅਤੇ ਟੋਓਟਾ (Toyota) ਵਰਗੀਆਂ ਕੰਪਨੀਆਂ ਦੇ ਨਿਵੇਸ਼ ਇਸ ਗੱਲ ਦਾ ਸਬੂਤ ਹਨ ਕਿ ਇਹ ਇਲਾਕਾ ਸਰੀ ਵਿੱਚ ਇੱਕ ਵੱਡੇ ਰੋਜ਼ਗਾਰ ਕੇਂਦਰ ਵਜੋਂ ਤੇਜ਼ੀ ਨਾਲ ਵਿਕਸਿਤ ਹੋ ਰਿਹਾ ਹੈ।