ਬੀਜੇਪੀ ਸਾਂਸਦ ਦਾ ਦਾਅਵਾ, ‘ਲੋਕ ਸਭਾ ਚੋਣਾਂ ‘ਚ ਸਾਡੇ 90 ਫੀਸਦੀ ਉਮੀਦਵਾਰ ਹਾਰਨਗੇ!’

ਚੰਡੀਗੜ੍ਹ: ਭਾਰਤੀ ਜਨਤਾ ਪਾਰਟੀ ਦੇ ਆਪਣੇ ਹੀ ਨੇਤਾ ਨੇ ਪਾਰਟੀ ‘ਤੇ ਨਿਸ਼ਾਨਾ ਸਾਧਿਆ ਹੈ। ਬੀਜੇਪੀ ਦੇ ਸੀਨੀਅਰ ਨੇਤਾ ਤੇ ਕੁਰੂਕਸ਼ੇਤਰ ਤੋਂ ਸੰਸਦ ਮੈਂਬਰ ਰਾਜ ਕੁਮਾਰ ਸੈਣੀ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਪਾਰਟੀ ਕੋਲ ਨਾ ਤਾਂ ਨੀਅਤ ਹੈ ਤੇ ਨਾ ਹੀ ਸਹੀ ਨੀਤੀ।ਉਨ੍ਹਾਂ ਦਾ ਮੰਨਣਾ ਹੈ ਕਿ ਆਉਣ ਵਾਲੀਆਂ ਚੋਣਾਂ ‘ਚ ਬੀਜੇਪੀ ਦੀ ਟਿਕਟ ਤੋਂ ਚੋਣ ਲੜਨ ਵਾਲੇ 90 ਫੀਸਦੀ ਸਿਆਸੀ ਨੇਤਾ ਹਾਰ ਜਾਣਗੇ। ਰਾਜ ਕੁਮਾਰ ਸੈਣੀ ਨੇ ਇਹ ਗੱਲ ਵਿਧਾਨ ਸਭਾ ਤੇ ਲੋਕ ਸਭਾ ਦੋਵੇਂ ਚੋਣਾਂ ਦੋਨਾਂ ਲਈ ਕਹੀ ਹੈ। ਸੈਣੀ ਨੇ ਆਪਣੇ ਇਲਾਕੇ ‘ਚ ਲੋਕਤੰਤਰ ਬਚਾਓ ਰੈਲੀ ਦੌਰਾਨ ਇਹ ਗੱਲ ਕਹੀ ਹੈ।ਦਰਅਸਲ ਸੈਣੀ ਪਿਛਲੇ ਸਮੇਂ ਤੋਂ ਆਪਣੀ ਪਾਰਟੀ ‘ਤੇ ਲਗਾਤਾਰ ਹਮਲੇ ਕਰਦੇ ਆ ਰਹੇ ਹਨ। ਇਸ ਦੌਰਾਨ ਉਨ੍ਹਾਂ ਇੰਡੀਅਨ ਨੈਸ਼ਨਲ ਲੋਕ ਦਲ ਦੀ ਵੀ ਆਲੋਚਨਾ ਕਰਦਿਆਂ ਕਿਹਾ ਕਿ ਜਿਹੜੀ ਪਾਰਟੀ ਦੇ ਲੀਡਰਾਂ ‘ਤੇ ਭ੍ਰਿਸ਼ਟਾਚਾਰ ਦੇ ਗੰਭੀਰ ਦੋਸ਼ ਹਨ, ਉਹ ਸੱਤਾ ‘ਚ ਆਉਣ ਦਾ ਸੁਫਨਾ ਦੇਖ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਬੇਰੋਜ਼ਗਾਰੀ ਦੀ ਸਮੱਸਿਆ ਭਾਸ਼ਣਾਂ ਨਾਲ ਨਹੀਂ ਖਤਮ ਹੋਣ ਵਾਲੀ। ਇਸ ਦੇ ਲਈ ਜ਼ਮੀਨੀ ਪੱਧਰ ‘ਤੇ ਕੰਮ ਕਰਨ ਦੀ ਲੋੜ ਹੈ।