ਨਵੀਂ ਦਿੱਲੀ, ਸਪੋਰਟਸ ਡੈਸਕ : ਭਾਰਤੀ ਟੀਮ ਦੇ ਮੱਧਕ੍ਰਮ ਦੇ ਬੱਲੇਬਾਜ਼ ਸੂਰਿਆਕੁਮਾਰ ਯਾਦਵ ਨੇ ਮੁੰਬਈ ‘ਚ ਆਪਣਾ ਅਨੋਖਾ ਅਵਤਾਰ ਦਿਖਾਇਆ। ਸੂਰਿਆਕੁਮਾਰ ਯਾਦਵ ਦਾ ਇਹ ਅਵਤਾਰ ਅਜਿਹਾ ਸੀ ਕਿ ਮੁੰਬਈ ਦੇ ਆਮ ਲੋਕ ਵੀ ਆਪਣੇ ਸਟਾਰ ਕ੍ਰਿਕਟਰ ਨੂੰ ਪਛਾਣ ਨਹੀਂ ਸਕੇ। ਵੱਡੀ ਗੱਲ ਇਹ ਹੈ ਕਿ ਰਵਿੰਦਰ ਜਡੇਜਾ ਵੀ ਆਪਣੇ ਸਾਥੀ ਖਿਡਾਰੀ ਨੂੰ ਨਹੀਂ ਪਛਾਣ ਸਕੇ।
ਬੀਸੀਸੀਆਈ ਨੇ ਸੂਰਿਆਕੁਮਾਰ ਯਾਦਵ ਦੀ ਵੀਡੀਓ ਸ਼ੇਅਰ ਕੀਤੀ ਹੈ, ਜਿਸ ਵਿਚ ਦਿਸ ਰਿਹਾ ਹੈ ਕਿ ਭਾਰਤੀ ਬੱਲੇਬਾਜ਼ ਕੈਮਰਾਮੈਨ ਬਣ ਕੇ ਆਮ ਲੋਕਾਂ ਨਾਲ ਗੱਲ ਕਰਦਾ ਨਜ਼ਰ ਆ ਰਿਹਾ ਹੈ। ਸੂਰਿਆ ਇਸ ‘ਚ ਕਹਿੰਦੇ ਨਜ਼ਰ ਆ ਰਹੇ ਹਨ ਕਿ ਮੈਂ ਪੂਰੀ ਸ਼ਰਟ ਇਸ ਲਈ ਪਾਈ ਹੋਈ ਹੈ, ਤਾਂ ਜੋ ਮੇਰਾ ਟੈਟੂ ਨਜ਼ਰ ਨਾ ਆਵੇ। ਪ੍ਰਦੂਸ਼ਣ ਤੋਂ ਬਚਣ ਲਈ ਚਿੱਟੇ ਰੰਗ ਦਾ ਮਾਸਕ ਪਾਇਆ ਲਾਇਆ ਹੋਇਆ ਸੀ। ਇਸ ਤੋਂ ਇਲਾਵਾ ਉਸ ਨੇ ਚਿਹਰਾ ਲੁਕਾਉਣ ਲਈ ਕਾਲੇ ਸਨਗਲਾਸ ਅਤੇ ਕਾਲੀ ਟੋਪੀ ਪਾਈ ਹੋਈ ਸੀ।
ਜਡੇਜਾ ਨੇ ਵੀ ਨਹੀਂ ਪਛਾਣਿਆ
ਸੂਰਿਆ ਦੇ ਨਾਲ ਪੂਰੀ ਵੀਡੀਓ ਟੀਮ ਉਸ ਦੇ ਹੋਟਲ ਦੇ ਕਮਰੇ ਤੋਂ ਬਾਹਰ ਆਈ, ਜਦੋਂਕਿ ਸੂਰਿਆ ਕੋਲ ਹੀ ਰਵਿੰਦਰ ਜਡੇਜਾ ਦਾ ਕਮਰਾ ਸੀ। ਜਦੋਂ ਜਡੇਜਾ ਆਪਣੇ ਕਮਰੇ ਤੋਂ ਬਾਹਰ ਆਇਆ ਤਾਂ ਉਹ ਪਛਾਣ ਨਹੀਂ ਸਕਿਆ ਕਿ ਉਹ ਵਿਅਕਤੀ ਸੂਰਿਆਕੁਮਾਰ ਯਾਦਵ ਹੈ। ਫਿਰ ਜਡੇਜਾ ਨੇ ਸਲਾਹ ਵੀ ਦਿੱਤੀ ਕਿ ਕੈਪ ਉਲਟੀ ਰੱਖ, ਜੇ ਮੈਂ ਏਨੀ ਨੇੜਿਓਂ ਨਹੀਂ ਪਛਾਣ ਸਕਿਆ ਤਾਂ ਕੋਈ ਕਿਵੇਂ ਪਛਾਣੇਗਾ। ਪੂਰੀ ਟੀਮ ਹੱਸ ਪਈ ਅਤੇ ਸੂਰਿਆ ਫਿਰ ਆਮ ਲੋਕਾਂ ਨਾਲ ਗੱਲਬਾਤ ਕਰਨ ਲਈ ਬਾਹਰ ਚਲਾ ਜਾਂਦਾ ਹੈ।
ਮੁੰਬਈ ਦੇ ਲੋਕਾਂ ਨਾਲ ਗੱਲਬਾਤ
ਵੀਡੀਓ ‘ਚ ਦੇਖਿਆ ਜਾ ਰਿਹਾ ਹੈ ਕਿ ਸੂਰਿਆ ਨਰੀਮਨ ਪੁਆਇੰਟ ‘ਤੇ ਜਾ ਕੇ ਆਮ ਲੋਕਾਂ ਨਾਲ ਗੱਲਬਾਤ ਕਰਦਾ ਹੈ। ਸੂਰਿਆ ਨੇ ਆਪਣੇ ਹੱਥ ਵਿੱਚ ਕੈਮਰਾ ਫੜਿਆ ਹੋਇਆ ਹੈ ਅਤੇ ਉਹ ਲੋਕਾਂ ਨੂੰ ਪੁੱਛ ਰਿਹਾ ਹੈ ਕਿ ਤੁਹਾਡਾ ਮੁੰਬਈ ਦਾ ਪਸੰਦੀਦਾ ਕ੍ਰਿਕਟਰ ਕੌਣ ਹੈ। ਆਮ ਲੋਕ ਵੀ ਉਨ੍ਹਾਂ ਨੂੰ ਭਰਵਾਂ ਹੁੰਗਾਰਾ ਦੇ ਰਹੇ ਹਨ। ਸੂਰਿਆ ਨੇ ਆਪਣੀ ਬੱਲੇਬਾਜ਼ੀ ਨੂੰ ਲੈ ਕੇ ਪ੍ਰਸ਼ੰਸਕਾਂ ਤੋਂ ਸਵਾਲ ਵੀ ਪੁੱਛੇ ਅਤੇ ਉਨ੍ਹਾਂ ਨੇ ਬਹੁਤ ਵਧੀਆ ਜਵਾਬ ਦਿੱਤੇ। ਆਖ਼ਰਕਾਰ, ਸੂਰਿਆ ਨੇ ਇੱਕ ਮਹਿਲਾ ਪ੍ਰਸ਼ੰਸਕ ਨੂੰ ਆਪਣੀ ਪਛਾਣ ਦੱਸੀ ਅਤੇ ਉਸ ਨਾਲ ਫੋਟੋ ਕਲਿੱਕ ਕਰਵਾ ਕੇ ਆਪਣਾ ਦਿਨ ਬਣਾਇਆ। ਇਸ ਤੋਂ ਬਾਅਦ ਸੂਰਿਆ ਆਪਣੇ ਹੋਟਲ ਵਾਪਸ ਆ ਗਿਆ। ਵੀਡੀਓ ਦੇ ਅੰਤ ਵਿਚ ਸੂਰਿਆ ਨੇ ਕਿਹਾ ਕਿ ਵਿਸ਼ਵ ਕੱਪ ਦੌਰਾਨ ਮੁੰਬਈ ਦੇ ਲੋਕਾਂ ਨਾਲ ਗੱਲਬਾਤ ਕਰਕੇ ਬਹੁਤ ਮਜ਼ਾ ਆਇਆ। ਉਮੀਦ ਹੈ ਕਿ ਅਸੀਂ ਆਪਣਾ ਅਗਲਾ ਮੈਚ ਵੀ ਇਸੇ ਤਰ੍ਹਾਂ ਜਿੱਤਾਂਗੇ।
ਭਾਰਤ ਦਾ ਮੁਕਾਬਲਾ ਸ਼੍ਰੀਲੰਕਾ ਨਾਲ
ਭਾਰਤੀ ਟੀਮ ਵੀਰਵਾਰ ਨੂੰ ਮੁੰਬਈ ਦੇ ਵਾਨਖੇੜੇ ਸਟੇਡੀਅਮ ‘ਚ ਆਪਣੇ ਲੀਗ ਪੜਾਅ ਦੇ ਸੱਤਵੇਂ ਮੈਚ ‘ਚ ਸ਼੍ਰੀਲੰਕਾ ਦਾ ਸਾਹਮਣਾ ਕਰੇਗੀ। ਸੂਰਿਆਕੁਮਾਰ ਯਾਦਵ ਨੂੰ ਇਸ ਮੈਚ ‘ਚ ਪਲੇਇੰਗ 11 ‘ਚ ਮੌਕਾ ਮਿਲਣ ਦੀ ਉਮੀਦ ਹੈ ਕਿਉਂਕਿ ਹਾਰਦਿਕ ਪਾਂਡਿਆ ਸੱਟ ਕਾਰਨ ਟੀਮ ਤੋਂ ਬਾਹਰ ਹੈ। ਸੂਰਿਆ ਆਪਣੇ ਘਰੇਲੂ ਮੈਦਾਨ ‘ਤੇ ਸ਼ਾਨਦਾਰ ਪਾਰੀ ਖੇਡ ਕੇ ਇਸ ਮੈਚ ਨੂੰ ਯਾਦਗਾਰ ਬਣਾਉਣਾ ਚਾਹੇਗਾ।
