ਸਰੀ, ਬੀ.ਸੀ. – ਹਾਲ ਹੀ ਵਿੱਚ ਕੁਝ ਸਥਾਨਕ ਮੀਡੀਆ ਵਿੱਚ ਸਿਟੀ ਆਫ਼ ਸਰੀ ਦੀ ਜਾਇਦਾਦ ਖ਼ਰੀਦਣ ਦੀ ਪ੍ਰਕਿਰਿਆ ਬਾਰੇ ਕੁੱਝ ਗ਼ਲਤ ਜਾਣਕਾਰੀ ਪ੍ਰਕਾਸ਼ਿਤ ਕੀਤੀ ਗਈ ਹੈ, ਜਿਸ ਬਾਰੇ ਸਿਟੀ ਵੱਲੋਂ ਤੱਥ ਸਾਂਝੇ ਕੀਤੇ ਜਾ ਰਹੇ ਹਨ ਤਾਂ ਜੋ ਸਰੀ ਦੇ ਨਿਵਾਸੀਆਂ ਨੂੰ ਇਹ ਜਾਣਕਾਰੀ ਸਹੀ ਢੰਗ ਨਾਲ ਮਿਲ ਸਕੇ, ਕਿ ਮਿਊਂਸੀਪਲ ਜ਼ਮੀਨ ਦੀ ਖ਼ਰੀਦ ਦਾ ਮੁਲਾਂਕਣ, ਗੱਲਬਾਤ ਅਤੇ ਮਨਜ਼ੂਰੀ ਕਿਵੇਂ ਕੀਤੀ ਜਾਂਦੀ ਹੈ।
ਪਿਛਲੇ ਇੱਕ ਸਾਲ ਦੌਰਾਨ, ਸਿਟੀ ਨੇ ਸੁਤੰਤਰ ਤੌਰ ‘ਤੇ ਕੀਤੇ ਮੁਲਾਂਕਣ (Independent Appraisals) ਮਾਰਕਿਟ ਵਿਸ਼ਲੇਸ਼ਣ ਅਤੇ ਗੱਲਬਾਤ ਰਾਹੀਂ ਜ਼ਮੀਨ ਦੀ ਖ਼ਰੀਦ ‘ਤੇ ਲਗਭਗ 23 ਮਿਲੀਅਨ ਡਾਲਰ ਦੇ ਵਾਧੂ ਖ਼ਰਚ ਤੋਂ ਬਚਾਅ ਕਰਕੇ ਸਫਲਤਾਪੂਰਵਕ ਸੌਦੇ ਕੀਤੇ ਹਨ । ਜੋ ਜਾਇਦਾਦ ਨਾਲ ਸੰਬੰਧਿਤ ਸੋਚ-ਵਿਚਾਰ ਕਰਕੇ ਫ਼ੈਸਲੇ ਲੈਣ ਵਿੱਚ ਸਹਾਇਕ ਹੋਏ ਹਨ ਅਤੇ ਸਰੀ ਦੀ ਲੰਬੇ ਸਮੇਂ ਦੇ ਬੁਨਿਆਦੀ ਢਾਂਚੇ, ਪਾਰਕਾਂ ਅਤੇ ਕਮਿਊਨਿਟੀ ਸਹੂਲਤਾਂ ਦੀਆਂ ਲੋੜਾਂ ਨੂੰ ਪੂਰਾ ਕਰਨ ਵਿੱਚ ਮਦਦ ਕਰਦੇ ਹਨ ।
ਸਿਟੀ ਬਾਜ਼ਾਰ ਮੁੱਲ ਨਿਰਧਾਰਿਤ ਕਰਨ ਅਤੇ ਫ਼ੈਸਲੇ ਲੈਣ ਲਈ ਸੁਤੰਤਰ ਮੁਲਾਂਕਣਾਂ ਦੀ ਵਰਤੋਂ ਕਰਦੀ ਹੈ। ਹਾਲਾਂਕਿ, ਇਨ੍ਹਾਂ ਨੂੰ ਸਿਰਫ਼ ਇੱਕ ਮਾਪਦੰਡ (Benchmark) ਵਜੋਂ ਵਰਤਿਆ ਜਾਂਦਾ ਹੈ, ਜਿਸ ਤੋਂ ਬਾਅਦ ਜਾਇਦਾਦ ਮਾਲਕਾਂ ਜਾਂ ਉਨ੍ਹਾਂ ਦੇ ਅਧਿਕਾਰਤ ਨੁਮਾਇੰਦਿਆਂ ਨਾਲ ਸਿੱਧੀ ਗੱਲਬਾਤ ਕਰਕੇ ਟੈਕਸਦਾਤਾਵਾਂ ਲਈ ਸਭ ਤੋਂ ਵਧੀਆ ਮੁੱਲ ਯਕੀਨੀ ਬਣਾਇਆ ਜਾਂਦਾ ਹੈ।
ਇਸ ਪ੍ਰਕਿਰਿਆ ਵਿੱਚ ਸਿਟੀ ਦੇ ਕਈ ਵਿਭਾਗਾਂ ਜਿਵੇਂ ਕਿ ਵਾਤਾਵਰਨ, ਇੰਜੀਨੀਅਰਿੰਗ, ਕਾਨੂੰਨੀ ਅਤੇ ਵਿੱਤੀ ਟੀਮਾਂ ਵੱਲੋਂ ਸਮੀਖਿਆ ਵੀ ਸ਼ਾਮਲ ਹੁੰਦੀ ਹੈ। ਇਸ ਤੋਂ ਇਲਾਵਾ, ਕਿਸੇ ਵੀ ਜਾਇਦਾਦ ਦੀ ਖ਼ਰੀਦ ਨੂੰ ਅੰਤਿਮ ਰੂਪ ਦੇਣ ਤੋਂ ਪਹਿਲਾਂ ਸਿਟੀ ਕੌਂਸਲ ਦੀ ਮਨਜ਼ੂਰੀ ਲਾਜ਼ਮੀ ਹੁੰਦੀ ਹੈ।
ਹਾਲ ਹੀ ਵਿੱਚ ਜ਼ਮੀਨੀ ਲੈਣ-ਦੇਣ ਦਾ ਸੰਖੇਪ, ਜਿਸ ਵਿੱਚ ਮੁਲਾਂਕਣ ਕੀਮਤਾਂ, ਗੱਲਬਾਤ ਰਾਹੀਂ ਤੈਅ ਕੀਤੀਆਂ ਖ਼ਰੀਦ ਕੀਮਤਾਂ, ਮੁਲਾਂਕਣ ਕਰਨ ਵਾਲੀਆਂ ਫ਼ਰਮਾਂ ਅਤੇ ਹਰ ਖ਼ਰੀਦ ਦਾ ਉਦੇਸ਼ ਸ਼ਾਮਲ ਹੈ, ਇਸ ਨਾਲ ਨੱਥੀ ਕੀਤਾ ਗਿਆ ਹੈ।
