ਟੋਰਾਂਟੋ,) : ‘ਚਲੋ ਪੰਜਾਬ’ ਮੁਹਿੰਮ ਦੇ ਤਹਿਤ ਕੈਨੇਡਾ ਤੋਂ ਆਮ ਆਦਮੀ ਪਾਰਟੀ ਦੇ ਵਲੰਟੀਅਰ ਅਤੇ ਨੇਤਾ 17 ਜਨਵਰੀ ਦੀ ਇਕ ਵਿਸ਼ੇਸ਼ ਫਲਾਈਟ ਰਾਹੀਂ ਭਾਰਤ ਪਹੁੰਚ ਰਹੇ ਹਨ। ਆਮ ਦੇ ਐਨਆਰਆਈ ਸੈਲ ਦੇ ਕਨਵੀਨਰ ਜਗਤਾਰ ਸਿੰਘ ਸੰਘੇੜਾ ਨੇ ਬੀਤੇ ਸ਼ਨਿੱਚਰਵਾਰ ਨੂੰ ਟੋਰਾਂਟੋ ਵਿਚ ਆਪ ਨੇਤਾਵਾਂ, ਵਰਕਰਾਂ ਅਤੇ ਵਲੰਟੀਅਰਾਂ ਦੇ ਨਾਲ ਗੱਲਬਾਤ ਤੋਂ ਬਾਅਦ ਪੰਜਾਬ ਵਿਧਾਨ ਸਭਾ ਚੋਣਾਂ ਵਿਚ ਆਪ ਦੇ ਐਨਆਰਆਈ ਮੈਂਬਰਾਂ ਦੀ ਰਣਨੀਤੀ ‘ਤੇ ਚਰਚਾ ਕੀਤੀ। ਟੋਰਾਂਟੋ ‘ਚ ਆਯੋਜਤ ਕਨਵੈਨਸ਼ਨ ਤੋਂ ਬਾਅਦ 17 ਜਨਵਰੀ ਨੂੰ ਪੰਜਾਬ ਪੁੱਜਣ ਦਾ ਐਲਾਨ ਵੀ ਕੀਤਾ। ਇਸ ਫਲਾਈਟ ਵਿਚ ਆਪ ਕੈਨੇਡਾ ਦੇ ਕਨਵੀਨਰ ਸੁਰਿੰਦਰ ਮਾਵੀ, ਮੀਡੀਆ ਇੰਚਾਰਜ ਸੁਦੀਪ ਸਿੰਗਲਾ ਅਤੇ ਹੋਰ ਨੇਤਾ ਵੀ ਸ਼ਾਮਲ ਹੋਣਗੇ।
ਪੰਜਾਬ ਪੁੱਜਣ ਤੋਂ ਬਾਅਦ ਆਪ ਦੇ ਐਨਆਰਆਈ ਮੈਂਬਰਾਂ ਨੂੰ ਅਲੱਗ ਅਲੱਗ ਵਿਧਾਨ ਸਭਾ ਸੀਟਾਂ ‘ਤੇ ਭੇਜਿਆ ਜਾਵੇਗਾ। ਆਪ ਕੈਨੇਡਾ ਦੇ ਨੇਤਾਵਾਂ ਅਨੁਸਾਰ ਗਰੇਟਰ ਟੋਰਾਂਟੋ ਏਰੀਆ ਵਿਚ ਆਪ ਪਾਰਟੀ ਦੇ ਮੈਂਬਰਾਂ ਵਿਚ ਪੰਜਾਬ ਜਾਣ ਨੂੰ ਲੈ ਕੇ ਉਤਸ਼ਾਹ ਵਧਣ ਲੱਗਾ ਹੈ। ਕੁਝ ਮੈਂਬਰ ਅਪਣੇ ਪੱਧਰ ‘ਤੇ ਪੰਜਾਬ ਪੁੱਜ ਵੀ ਚੁੱਕੇ ਹਨ ਅਤੇ ਕੁਝ ਛੋਟੇ ਮੋਟੇ ਗਰੁੱਪਾਂ ਵਿਚ ਪੰਜਾਬ ਪੁੱਜਣਾ ਸ਼ੁਰੂ ਹੋ ਗਏ ਹਨ। ਇਸ ਦੇ ਨਾਲ ਹੀ ਕੈਨੇਡਾ ਵਿਚ ਚੋਣਾਂ ਦੇ ਲਈ ਫੰਡ ਜੁਟਾਉਣ ਦੀ ਮੁਹਿੰਮ ਵੀ ਲਗਾਤਾਰ ਜਾਰੀ ਹੈ। ਕੈਨੇਡੀਅਨ ਪੰਜਾਬੀ ਮੀਡੀਆ ਦੇ ਅਨੁਸਾਰ ਪੰਜਾਬ ਵਿਚ ਚੋਣਾਂ ਨੂੰ ਲੈ ਕੇ ਹੁਣ ਇੱਥੇ ਵੀ ਮਾਹੌਲ ਭੱਖਣ ਲੱਗਿਆ ਹੈ ਅਤੇ ਆਉਣ ਵਾਲੇ ਦਿਨਾਂ ਵਿਚ ਕੈਨੇਡਾ ਤੋਂ ਪੰਜਾਬ ਜਾਣ ਵਾਲੇ ਆਪ ਵਰਕਰਾਂ ਦੀ ਗਿਣਤੀ ਹੋਰ ਵਧੇਗੀ।