ਹਿਲੇਰੀ ਦੀ ਮਹਫਿਲ ‘ਚ ਗੁਲਾਬੀ ਪੱਗ ਵਾਲੇ ‘ਸਰਦਾਰ ਜੀ ‘ਤੇ ਟਿੱਕੀਆਂ ਸਭ ਦੀਆਂ ਨਜ਼ਰਾਂ

ਫਿਲਾਡੇਲਫੀਆ— ਅਮਰੀਕਾ ਦੇ ਫਿਲਾਡੇਲਫੀਆ ਵਿਖੇ ਡੈਮੋਕ੍ਰੇਟਿਕ ਪਾਰਟੀ ਵੱਲੋਂ ਰਾਸ਼ਟਰਪਤੀ ਉਮੀਦਵਾਰ ਹਿਲੇਰੀ ਕਲਿੰਟਨ ਦੀ ਚੋਣ ਮੁਹਿੰਮ ਨੂੰ ਹੁਲਾਰਾ ਦੇਣ ਵਾਲੀ ਮਹਫਿਲ ਯਾਨੀ ਕਿ ਡੈਮੋਕ੍ਰੇਟਿਕ ਪਾਰਟੀ ਦੀ ਨੈਸ਼ਨਲ ਕਨਵੈਂਸ਼ਨ ਚੱਲ ਰਹੀ ਸੀ ਕਿ ਸਾਰਿਆਂ ਦੀਆਂ ਨਜ਼ਰਾਂ ਗੁਲਾਬੀ ਪੱਗ ਵਾਲੇ ‘ਸਰਦਾਰ ਜੀ’ ‘ਤੇ ਟਿਕ ਗਈਆਂ ਅਤੇ ਬਿਨਾਂ ਕੁਝ ਬੋਲੇ ਇਹ ਸਰਦਾਰ ਜੀ ਹਿਲੇਰੀ ਦੀ ਮਹਿਫਿਲ ਨੂੰ ਲੁੱਟ ਕੇ ਚੱਲਦੇ ਬਣੇ। ਅਸਲ ਵਿਚ ਇੱਥੇ ਗੱਲ ਹੋ ਰਹੀ ਹੈ ਭਾਰਤੀ ਮੂਲ ਦੇ ਅਮਰੀਕੀ ਮੇਜਰ ਕਮਲਜੀਤ ਸਿੰਘ ਕਲਸੀ ਦੀ, ਜੋ ਹਿਲੇਰੀ ਦੀ ਮਹਫਿਲ ਵਿਚ ਗੁਲਾਬੀ ਪੱਗ ਬੰਨ੍ਹ ਕੇ ਪਹੁੰਚੇ ਸਨ।

ਜ਼ਿਕਰਯੋਗ ਹੈ ਕਿ ਕਲਸੀ ਵੀਰਵਾਰ ਨੂੰ ਰਿਟਾਇਡ ਜਨਰਲ ਜੌਹਨ ਐਲਨ ਨਾਲ ਸਟੇਜ ‘ਤੇ ਅਮਰੀਕੀ ਫੌਜੀਆਂ ਦੇ ਇਕ ਸਮੂਹ ਨਾਲ ਪਹੁੰਚੇ ਸਨ। ਐਲਨ ਨੇ ਜਿਵੇਂ ਹੀ ਸਟੇਜ ਨੂੰ ਸੰਬੋਧਨ ਕਰਨਾ ਸ਼ੁਰੂ ਕੀਤਾ ਤਾਂ ਲੋਕਾਂ ਦੀਆਂ ਨਜ਼ਰਾਂ ਐਲਨ ਨਾਲੋਂ ਜ਼ਿਆਦਾ ਉਨ੍ਹਾਂ ਦੇ ਪਿੱਛੇ ਖੜ੍ਹੇ ਕਲਸੀ ‘ਤੇ ਟਿਕ ਗਈਆਂ। ਐਲਨ ਨੇ ਹਿਲੇਰੀ ਦਾ ਸਮਰਥਨ ਕੀਤਾ ਅਤੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਉਸ ਨੂੰ ਵੋਟਾਂ ਪਾ ਕੇ ਜਿਤਾਉਣ ਅਤੇ ਨਫਰਤ ਤੇ ਦੁਸ਼ਮਣਾਂ ਨੂੰ ਹਰਾ ਦੇਣ।ਮੇਜਰ ਕਮਲਜੀਤ ਸਿੰਘ ਕਲਸੀ ਅਮਰੀਕੀ ਆਰਮੀ ਵਿਚ 15 ਸਾਲਾਂ ਤੋਂ ਐਮਰਜੈਂਸੀ ਰੂਮ ਡਾਕਟਰ ਦੇ ਤੌਰ ‘ਤੇ ਸੇਵਾਵਾਂ ਦੇ ਰਹੇ ਹਨ। ਇਨ੍ਹਾਂ ‘ਚੋਂ ਕਈ ਸਾਲ ਉਨ੍ਹਾਂ ਨੇ ਅਫਗਾਨਿਸਤਾਨ ਵਰਗੇ ਖਤਰਨਾਕ ਇਲਾਕੇ ਵਿਚ ਬਿਤਾਏ। 2009 ਵਿਚ ਕਲਸੀ ਉਹ ਪਹਿਲੇ ਸਿੱਖ ਬਣੇ, ਜਿਨ੍ਹਾਂ ਨੂੰ ਅਮਰੀਕੀ ਫੌਜ ਵਿਚ ਦਾੜ੍ਹੀ ਰੱਖਣ ਅਤੇ ਦਸਤਾਰ ਸਜਾਉਣ ਦੀ ਆਗਿਆ ਦਿੱਤੀ ਗਈ।