ਸੀਰੀਆ ‘ਚ ਕਤਲੋਗਾਰਤ ਜਾਰੀ, 15 ਹੋਰ ਬੱਚਿਆਂ ਦੀ ਮੌਤ

ਬੇਰੂਤ: ਸੀਰੀਆ ਵਿੱਚ ਕਤਲੋਗਾਰਤ ਦਾ ਦੌਰ ਜਾਰੀ ਹੈ। ਤਾਜ਼ਾ ਘਟਨਾ ਵਿੱਚ ਪੂਰਬੀ ਘਿਓਟਾ ਵਿੱਚ ਇੱਕ ਸਕੂਲ ਨੂੰ ਨਿਸ਼ਾਨਾ ਬਣਾਇਆ ਗਿਆ। ਸਕੂਲ ‘ਤੇ ਕੀਤੇ ਹਵਾਈ ਹਮਲੇ ਵਿੱਚ 15 ਬੱਚਿਆਂ ਤੇ ਦੋ ਔਰਤਾਂ ਦੀ ਮੌਤ ਹੋ ਗਈ। ਇਹ ਸਾਰੇ ਬੰਬਾਰੀ ਤੋਂ ਬਚਣ ਲਈ ਸਕੂਲ ਦੇ ਬੇਸਮੈਂਟ ਵਿੱਚ ਛੁਪੇ ਹੋਏ ਸੀ।

‘ਸੀਰੀਅਨ ਔਬਜ਼ਰਵੇਟਰੀ ਫਾਰ ਹਿਊਮਨ ਰਾਈਟਸ’ ਨੇ ਦੱਸਿਆ ਕਿ ਘਿਓਟਾ ਵਿੱਚ ਵਿਦਰੋਹੀਆਂ ਦੇ ਕਬਜ਼ੇ ਵਾਲੇ ਮੁੱਖ ਖੇਤਰੀ ਅਰਬੀਨ ਵਿੱਚ ਹਵਾਈ ਹਮਲਾ ਹੋਇਆ। ਇੱਥੇ ਸਰਕਾਰੀ ਫੌਜੀ ਪਿਛਲੇ ਇੱਕ ਮਹੀਨੇ ਤੋਂ ਹਮਲੇ ਕਰ ਰਹੇ ਹਨ।

ਬ੍ਰਿਟੇਨ ਸਥਿਤ ਨਿਗਰਾਨੀ ਸੰਸਥਾ ਦੇ ਮੁਖੀ ਰਮੀ ਅਬਦੇਲ ਰਹਿਮਾਨ ਨੇ ਕਿਹਾ ਕਿ ਹਵਾਈ ਹਮਲੇ ਦੌਰਾਨ ਤਿੰਨ ਮਜ਼ਾਈਲਾਂ ਸਕੂਲ ਉੱਪਰ ਡਿੱਗੀਆਂ। ਇਸ ਦੇ ਬੇਸਮੈਂਟ ਵਿੱਚ ਬੱਚੇ ਛੁਪੇ ਹੋਏ ਸੀ। ਉਨ੍ਹਾਂ ਦੱਸਿਆ ਕਿ ਮਰਨ ਵਾਲਿਆਂ ਦੀ ਗਿਣਤੀ ਵਧ ਸਕਦੀ ਹੈ। ਬਚਾਅ ਦਸਤੇ ਮਲਬਾ ਹਟਾ ਰਹੇ ਹਨ।