ਮੰਦਸੌਰ ‘ਚ ਕਿਸਾਨਾਂ ਦਾ ਅੰਦੋਲਨ ਹੋਇਆ ਬੇਕਾਬੂ ਕਈ ਬਸਾਂ ਨੂੰ ਲਾਈ ਅੱਗ

ਮੰਦਸੌਰ,: ਮੱਧ ਪ੍ਰਦੇਸ਼ ਵਿਚ ਕਿਸਾਨ ਅੰਦੋਲਨ ਦੇ ਲਗਾਤਾਰ ਛੇਵੇਂ ਦਿਨ ਵੀ ਹਿੰਸਾ ਦਾ ਦੌਰ ਜਾਰੀ ਰਿਹਾ। ਇਕ ਦਿਨ ਪਹਿਲਾਂ ਗੋਲੀਬਾਰੀ ਵਿਚ ਛੇ ਕਿਸਾਨਾਂ ਦੀ ਮੌਤ ਹੋ ਗਈ ਸੀ। ਅੱਜ ਰੋਹ ਵਿਚ ਆਏ ਕਿਸਾਨਾਂ ਨੇ ਜ਼ਿਲ੍ਹੇ ਦੇ ਬਰਖੇੜਾ ਇਲਾਕੇ ਵਿਚ ਐਸਪੀ ਅਤੇ ਕੁਲੈਕਟਰ ਨਾਲ ਧੱਕਾਮੁੱਕੀ ਕੀਤੀ, ਕਲੈਕਟਰ ਦੇ ਸਿਰ ‘ਤੇ ਸੱਟ ਮਾਰ ਦਿਤੀ ਤੇ ਉਸ ਦੇ ਕਪੜੇ ਵੀ ਪਾਟ ਗਏ। ਦੇਵਾਸ ਵਿਚ ਚਾਰਟਰਡ ਬੱਸ ਸਮੇਤ ਕਈ ਬਸਾਂ ਨੂੰ ਅੱਗ ਲਾ ਦਿਤੀ ਗਈ ਤੇ ਸਵਾਰੀਆਂ ਨੇ ਭੱਜ ਕੇ ਜਾਨ ਬਚਾਈ। ਇਕ ਹੋਰ ਘਟਨਾ ‘ਚ, ਗੋਲੀਬਾਰੀ ਵਿਚ ਮਾਰੇ ਗਏ ਇਕ ਸ਼ਖ਼ਸ ਦੇ ਅੰਤਮ ਸਸਕਾਰ ਤੋਂ ਬਾਅਦ ਭੀੜ ਪੁਲਿਸ ਵਲ ਦੌੜੀ ਤੇ ਪੁਲਿਸ ਦੇ ਕਈ ਜਵਾਨ ਜਾਨ ਬਚਾਉਣ ਲਈ ਭੱਜੇ। ਥਾਣੇ ਦੇ ਬਾਹਰ 600 ਜਵਾਨ ਅਤੇ ਏਨੇ ਹੀ ਕਿਸਾਨ ਆਹਮੋ-ਸਾਹਮਣੇ ਹੋ ਗਏ। ਪੱਤਰਕਾਰਾਂ ਦੀ ਵੀ ਮਾਰਕੁੱਟ ਕੀਤੀ ਗਈ। ਜ਼ਿਲ੍ਹੇ ਵਿਚ ਫ਼ਿਲਹਾਲ ਕਰਫ਼ੀਊ ਲੱਗਾ ਹੋਇਆ ਹੈ।