ਮੋਦੀ ਦੀ ਪੁਲਸ ਅਫਸਰਾਂ ਨੂੰ ਸਿੰਘਮ ਨਾ ਬਣਨ ਦੀ ਨਸੀਹਤ

ਨਵੀਂ ਦਿੱਲੀ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਹੈਦਰਾਬਾਦ ਦੀ ਸਰਦਾਰ ਵੱਲਭ ਭਾਈ ਪਟੇਲ ਨੈਸ਼ਨਲ ਪੁਲਸ ਅਕੈਡਮੀ ਤੋਂ ਗ੍ਰੈਜੂਏਸ਼ਨ ਕਰਨ ਵਾਲੇ ਇੰਡੀਅਨ ਪੁਲਸ ਸਰਵਿਸ ਦੇ ਪ੍ਰੋਬੇਸ਼ਨਰੀ ਅਫਸਰਾਂ ਦੀ ‘ਦੀਕਸ਼ਾਂਤ ਪਰੇਡ’ ਨੂੰ ਸ਼ੁੱਕਰਵਾਰ ਸੰਬੋਧਨ ਕਰਦਿਆਂ ਤਨਾਅ ‘ਚ ਕੰਮ ਕਰਨ ਵਾਲਿਆਂ ਲਈ ਯੋਗਾ ਤੇ ਪਰਾਣਯਾਮ ਦੀ ਅਹਿਮੀਅਤ ਦੱਸੀ। ਉਨ੍ਹਾ ਕਿਹਾ ਕਿ ਯੋਗਾ ਤੇ ਪਰਾਣਯਾਮ ਕਦੇ ਵੀ ਕੰਮ ਦਾ ਬੋਝ ਮਹਿਸੂਸ ਨਹੀਂ ਕਰਦਾ।
ਕੋਰੋਨਾ ਮਹਾਂਮਾਰੀ, ਖਾਸਕਰ ਲਾਕਡਾਊਨ ਦੌਰਾਨ ਪੁਲਸ ਦੇ ਕੰਮ ਦੀ ਸ਼ਲਾਘਾ ਕਰਦਿਆਂ ਉਨ੍ਹਾ ਕਿਹਾ ਕਿ ਚੰਗੇ ਕੰਮ ਕਰਕੇ ਲੋਕਾਂ ਦੀ ਯਾਦ ਵਿਚ ਖਾਕੀ ਦਾ ਮਾਨਵੀ ਚਿਹਰਾ ਉਕਰਿਆ ਗਿਆ ਹੈ। ਉਨ੍ਹਾ ਨੌਜਵਾਨ ਪੁਲਸ ਅਫਸਰਾਂ ਨੂੰ ਤਾਕਤ ਦਾ ਮੁਜ਼ਾਹਰਾ ਕਰਨ ਦੀ ਥਾਂ ਵਰਦੀ ‘ਤੇ ਮਾਣ ਕਰਨ ਦੀ ਨਸੀਹਤ ਦਿੱਤੀ। ਉਨ੍ਹਾ ਇਹ ਵੀ ਕਿਹਾ ਕਿ ਸਿੰਘਮ ਵਰਗੀਆਂ ਫਿਲਮਾਂ ਦੇਖ ਕੇ ਕੁਝ ਪੁਲਸ ਅਫਸਰ ਆਪਣੇ ਬਾਰੇ ਬਹੁਤ ‘ਉੱਚਾ’ ਸੋਚਣ ਲਗਦੇ ਹਨ। ਉਨ੍ਹਾ ਸਲਾਹ ਦਿੱਤੀ ਕਿ ਉਹ ਅਜਿਹਾ ਨਾ ਕਰਨ, ਕਿਉਂਕਿ ਇਸ ਨਾਲ ਉਨ੍ਹਾਂ ਦਾ ਚੰਗਾ ਕੰਮ ਵੀ ਅਣਗੌਲਿਆ ਜਾਂਦਾ ਹੈ।