ਪੀਟੀਆਈ, ਮੈਸੂਰ : ਭਾਜਪਾ ਦੇ ਲੋਕ ਸਭਾ ਮੈਂਬਰ ਪ੍ਰਤਾਪ ਸਿਮਹਾ ਨੇ ਐਤਵਾਰ ਨੂੰ ਸੰਸਦ ਦੀ ਸੁਰੱਖਿਆ ਉਲੰਘਣਾ ਦੇ ਮੁੱਦੇ ‘ਤੇ ਬੋਲਦਿਆਂ ਕਿਹਾ ਕਿ ਲੋਕ 2024 ਦੀਆਂ ਲੋਕ ਸਭਾ ਚੋਣਾਂ ਦੌਰਾਨ ਫੈਸਲਾ ਕਰਨਗੇ ਕਿ ਉਹ ਦੇਸ਼ ਭਗਤ ਹਨ ਜਾਂ ਦੇਸ਼ਧ੍ਰੋਹੀ।
ਘਟਨਾ ਤੇ ਜਾਂਚ ਸਬੰਧੀ ਕੁਝ ਵੀ ਦੱਸੇ ਬਿਨਾਂ ਉਨ੍ਹਾਂ ਕਿਹਾ ਕਿ ਉਹ ਆਪਣੇ ‘ਤੇ ਲਗਾਏ ਗਏ ਦੇਸ਼ਧ੍ਰੋਹ ਦੇ ਦੋਸ਼ਾਂ ਦਾ ਫੈਸਲਾ ਰੱਬ ਤੇ ਉਨ੍ਹਾਂ ਦੇ ਪ੍ਰਸ਼ੰਸਕਾਂ ‘ਤੇ ਛੱਡਣਗੇ। ਜ਼ਿਕਰਯੋਗ ਹੈ ਕਿ 13 ਦਸੰਬਰ ਨੂੰ ਲੋਕ ਸਭਾ ਚੈਂਬਰ ‘ਚ ਦਾਖ਼ਲ ਹੋਏ ਪ੍ਰਦਰਸ਼ਨਕਾਰੀ ਸਿਮਹਾ ਦੇ ਦਫ਼ਤਰ ਦੀ ਸਿਫ਼ਾਰਿਸ਼ ‘ਤੇ ਜਾਰੀ ਕੀਤੇ ਪਾਸਾਂ ‘ਤੇ ਸੰਸਦ ਵਿੱਚ ਦਾਖ਼ਲ ਹੋਏ ਸਨ।
‘2024 ਦੀਆਂ ਚੋਣਾਂ ‘ਚ ਜਨਤਾ ਦੇਵੇਗੀ ਫੈਸਲਾ’
ਸਿਮਹਾ ਨੇ ਕਿਹਾ, “ਪ੍ਰਤਾਪ ਸਿਮ੍ਹਾ ਦੇਸ਼ਧ੍ਰੋਹੀ ਹਨ ਜਾਂ ਦੇਸ਼ ਭਗਤ, ਮੈਸੂਰ ਦੀਆਂ ਪਹਾੜੀਆਂ ‘ਤੇ ਬੈਠੀ ਦੇਵੀ ਮਾਂ ਚਾਮੁੰਡੇਸ਼ਵਰੀ, ਬ੍ਰਹਮਗਿਰੀ ‘ਤੇ ਬੈਠੀ ਦੇਵੀ ਮਾਂ ਕਾਵੇਰੀ, ਕਰਨਾਟਕ ਭਰ ਦੇ ਮੇਰੇ ਪਾਠਕ ਪ੍ਰਸ਼ੰਸਕ ਜੋ ਪਿਛਲੇ ਵੀਹ ਸਾਲਾਂ ਤੋਂ ਮੇਰੀਆਂ ਰਚਨਾਵਾਂ ਪੜ੍ਹ ਰਹੇ ਹਨ ਤੇ ਮੈਸੂਰ-ਕੋਡਾਗੂ ਦੇ ਲੋਕ ਜਿਨ੍ਹਾਂ ਨੇ ਸਾਢੇ ਨੌਂ ਸਾਲਾਂ ਤੋਂ ਮੇਰਾ ਕੰਮ ਦੇਖਿਆ ਹੈ ਅਤੇ ਦੇਸ਼, ਧਰਮ ਤੇ ਰਾਸ਼ਟਰਵਾਦ ਨਾਲ ਜੁੜੇ ਮੁੱਦਿਆਂ ‘ਤੇ ਮੇਰਾ ਵਿਹਾਰ ਦੇਖਿਆ ਹੈ, ਉਹ ਅਪ੍ਰੈਲ 2024 ‘ਚ ਹੋਣ ਵਾਲੀਆਂ ਲੋਕ ਸਭਾ ਚੋਣਾਂ ‘ਚ ਵੋਟਾਂ ਰਾਹੀਂ ਆਪਣਾ ਫੈਸਲਾ ਦੇਣਗੇ।”
ਵਿਰੋਧ ਪ੍ਰਦਰਸ਼ਨ ‘ਤੇ ਸਿਮਹਾ ਨੇ ਦਿੱਤਾ ਜਵਾਬ
ਸੰਸਦ ਸੁਰੱਖਿਆ ਉਲੰਘਣ ਦੀ ਘਟਨਾ ਤੋਂ ਬਾਅਦ ਕਾਂਗਰਸ ਅਤੇ ਕੁਝ ਸੰਗਠਨਾਂ ਨੇ ਸਿਮਹਾ ਖਿਲਾਫ ਪ੍ਰਦਰਸ਼ਨ ਕੀਤਾ ਸੀ। ਘਟਨਾ ਬਾਰੇ ਪੁੱਛੇ ਜਾਣ ‘ਤੇ ਸਿਮਹਾ ਨੇ ਕਿਹਾ, “ਮੈਂ ਜੋ ਕਹਿਣਾ ਸੀ, ਕਹਿ ਦਿੱਤਾ। ਮੇਰੇ ਕੋਲ ਇਸ ਬਾਰੇ ਕਹਿਣ ਲਈ ਹੋਰ ਕੁਝ ਨਹੀਂ ਹੈ।”
ਸੰਸਦੀ ਮਾਮਲਿਆਂ ਬਾਰੇ ਮੰਤਰੀ ਪ੍ਰਹਿਲਾਦ ਜੋਸ਼ੀ ਨੇ ਸ਼ੁੱਕਰਵਾਰ ਨੂੰ ਕਿਹਾ ਸੀ ਕਿ ਸੰਸਦ ਸੁਰੱਖਿਆ ਉਲੰਘਣਾ ਮਾਮਲੇ ਦੀ ਜਾਂਚ ਦੇ ਹਿੱਸੇ ਵਜੋਂ ਸਿਮਹਾ ਦਾ ਬਿਆਨ ਦਰਜ ਕੀਤਾ ਗਿਆ ਹੈ। ਪੱਤਰਕਾਰ ਤੋਂ ਸਿਆਸਤਦਾਨ ਬਣੀ ਸਿਮਹਾ ਮੈਸੂਰ-ਕੋਡਾਗੂ ਲੋਕ ਸਭਾ ਹਲਕੇ ਤੋਂ ਦੋ ਵਾਰ ਭਾਜਪਾ ਦੀ ਲੋਕ ਸਭਾ ਮੈਂਬਰ ਹੈ।
