ਬੈਲਜੀਅਮ ਨੂੰ ਮਾਤ ਦੇ ਕੇ ਹਾਕੀ ਵਿਸ਼ਵ ਲੀਗ ਦੇ ਸੈਮੀਫਾਈਨਲ ‘ਚ ਪੁੱਜਾ ਭਾਰਤ
ਚੰਡੀਗੜ੍ਹ: ਭਾਰਤ ਨੇ ਹਾਕੀ ਵਿਸ਼ਵ ਲੀਗ ਦੇ ਸੈਮੀਫਾਈਨਲ ‘ਚ ਥਾਂ ਬਣਾ ਲਈ ਹੈ। ਕੁਆਟਰ ਫਾਈਨਲ ਮੁਕਾਬਲੇ ‘ਚ ਪੈਨੇਲਟੀ ਸ਼ੂਟ ਆਊਟ ਰਾਹੀਂ ਬੈਲਜੀਅਮ ਨੂੰ 3-2 ਨਾਲ ਮਾਤ ਦਿੱਤੀ। ਹਾਕੀ ਵਿਸ਼ਵ ਲੀਗ ‘ਚ ਭਾਰਤ ਨੇ ਦੂਜੀ ਵਾਰ ਆਪਣੀ ਥਾਂ ਪੱਕੀ ਕੀਤੀ ਹੈ। ਤੈਅ ਸਮੇਂ ਤੱਕ ਦੋਵੇਂ ਟੀਮਾਂ 3-3 ਗੋਲ ਦੀ ਬਰਾਬਰੀ ‘ਤੇ ਸਨ। ਇਸ ਲਈ ਮੈਚ ਦਾ ਫੈਸਲਾ ਸ਼ੂਟ ਆਊਟ ਰਾਹੀਂ ਕੀਤਾ ਗਿਆ।
ਇਸ ਦੌਰਾਨ ਦੋਵੇਂ ਟੀਮਾਂ ਨੂੰ ਪੰਜ-ਪੰਜ ਮੌਕੇ ਮਿਲੇ ਤੇ ਦੋਵੇਂ ਟੀਮਾਂ ਨੇ ਹੀ ਪੰਜਾਂ ਮੌਕਿਆਂ ਨੂੰ 2-2 ਗੋਲ ਵਿੱਚ ਤਬਦੀਲ ਕਰਨ ਵਿੱਚ ਸਫਲਤਾ ਹਾਸਲ ਕੀਤੀ। ਇਸ ਤੋਂ ਬਾਅਦ ਮੈਚ ਸਡਨ ਡੈਥ ‘ਚ ਗਿਆ। ਅੰਤ ਵਿੱਚ ਕਪਤਾਨ ਹਰਮਨਪ੍ਰੀਤ ਸਿੰਘ ਨੇ ਭਾਰਤ ਵੱਲੋਂ ਗੋਲ ਕੀਤਾ ਤੇ ਗੋਲਕੀਪਰ ਆਕਾਸ਼ ਚਿਤਕੇ ਨੇ ਬੈਲਜੀਅਮ ਦੇ ਕੀਤੇ ਵਾਰ ਨੂੰ ਰੋਕ ਕੇ ਭਾਰਤ ਨੂੰ ਜਿੱਤ ਦਵਾ ਦਿੱਤੀ।
ਦੁਨੀਆ ‘ਚ ਤੀਜੇ ਨੰਬਰ ਦੀ ਟੀਮ ਆਪਣੇ ਗਰੁੱਪ ਏ ‘ਚ ਸਿਖਰ ‘ਤੇ ਰਹੀ ਸੀ। ਜਦਕਿ ਭਾਰਤ ਆਸਟ੍ਰੇਲੀਆ ਨਾਲ ਡਰਾਅ ਖੇਡਣ ਤੋਂ ਬਾਅਦ ਇੰਗਲੈਂਡ ਤੇ ਜਰਮਨੀ ਤੋਂ ਹਾਰ ਗਈ ਸੀ। ਭਾਰਤ ਲਈ ਇਹ ਮੈਚ ਕਰੋ ਜਾਂ ਮਰੋ ਦੀ ਹਾਲਤ ਵਾਲਾ ਸੀ ਤੇ ਬੈਲਜੀਅਮ ਖਿਲਾਫ਼ ਭਾਰਤ ਨੇ ਦਮਦਾਰ ਖੇਡ ਦਿਖਾਉਂਦਿਆਂ ਜਿੱਤ ਹਾਸਿਲ ਕੀਤੀ। ਮੈਚ ‘ਚ ਗੁਰਜੰਟ, ਹਰਮਨਪ੍ਰੀਤ ਤੇ ਰੁਪਿੰਦਰਪਾਲ ਸਿੰਘ ਨੇ ਇੱਕ-ਇੱਕ ਗੋਲ ਕੀਤਾ। ਸ਼ੂਟਆਊਟ ‘ਚ ਭਾਰਤ ਦੇ ਲਲਿਤ ਉਪਾਧਿਆਏ ਤੇ ਰੁਪਿੰਦਰ ਪਾਲ ਸਿੰਘ ਨੇ ਗੋਲ ਦਾਗੇ, ਜਦਕਿ ਹਰਮਨਪ੍ਰੀਤ, ਸੁਮੀਤ ਤੇ ਆਕਾਸ਼ਦੀਪ ਨਿਸ਼ਾਨੇ ਤੋਂ ਖੁੰਝ ਗਏ।
ਪਿਛਲੇ ਮੈਚਾਂ ਦੇ ਆਖਰੀ ਮਿੰਟਾਂ ‘ਚ ਢਿੱਲੀ ਪੈਣ ਵਾਲੀ ਭਾਰਤੀ ਟੀਮ ਇਸ ਵਾਰ ਕਾਫ਼ੀ ਚੁਸਤ ਦਿਖਾਈ ਦਿੱਤੀ। ਟੀਮ ‘ਚ ਅੱਠ ਮਹੀਨੇ ਬਾਅਦ ਵਾਪਸੀ ਕਰ ਰਹੇ ਰੁਪਿੰਦਰਪਾਲ ਸਿੰਘ ਤੇ ਵਰੁਣ ਕੁਮਾਰ ਨੇ ਬੈਲਜੀਅਮ ਦੀਆਂ ਕਈ ਕੋਸ਼ਿਸ਼ਾਂ ਨੂੰ ਨਾਕਾਮ ਕਰ ਦਿੱਤਾ। ਗੋਲਕੀਪਰ ਆਕਾਸ਼ ਨੇ ਵੀ ਸ਼ਾਨਦਾਰ ਖੇਡ ਦਾ ਮੁਜ਼ਾਹਰਾ ਕੀਤਾ। ਹਾਕੀ ਵਿਸ਼ਵ ਲੀਗ ਦਾ ਖਿਤਾਬ ਜਿੱਤਣ ‘ਤੋਂ ਭਾਰਤੀ ਟੀਮ ਕੇਵਲ ਦੋ ਕਦਮ ਦੂਰ ਹੈ।
