ਬੀ ਸੀ ਕਲਚਰਲ ਫਾਊਂਡੇਸ਼ਨ ਵਲੋਂ ਚਾਰ ਪੁਸਤਕਾਂ ਰੀਲੀਜ਼

ਸਰੀ: ਬੀ ਸੀ ਕਲਚਰਲ ਫਾਊਂਡੇਸ਼ਨ ਵਲੋਂ ਸਰੀ ਵਿਚ ਇਕ ਵਿਸ਼ਾਲ ਪੁਸਤਕ ਰੀਲੀਜ਼ ਸਮਾਰੋਹ ਕੀਤਾ ਗਿਆ। 18 ਜੂਨ ਨੂੰ ਨਿਊਟਨ ਲਾਇਬਰੇਰੀ ਵਿਚ ਕੀਤੇ ਗਏ ਇਸ ਸਮਾਗਮ ਵਿਚ ਲੋਅਰ ਮੇਨਲੈਂਡ ਦੇ ਉਘੇ ਤੇ ਜਾਣੇ ਪਹਿਚਾਣੇ ਲਿਖਾਰੀਆਂ ਦੀਆਂ 4 ਪੁਸਤਕਾਂ ਲੋਕ ਅਰਪਣ ਕੀਤੀਆਂ ਗਈਆਂ।ਇਨਾਂ ਵਿਚ ਉਘੇ ਨਾਵਲਕਾਰ ਜਰਨੈਲ ਸਿੰਘ ਸੇਖਾ ਦੇ ਨਾਵਲ ‘ਵਿਗੋਚਾ’ ਦਾ ਹਿੰਦੀ ਐਡੀਸ਼ਨ ‘ਪਿਘਲਤੀ ਯਾਦੇਂ’, ਨਦੀਮ ਪਰਮਾਰ ਦਾ ਨਵਾਂ ਨਾਵਲ ‘ਬੇਅਰ ਕਰੀਕ ਪਾਰਕ’, ਸ਼ੁਰਿੰਦਰਪਾਲ ਕੌਰ ਬਰਾੜ ਦੀ ਸ਼ਾਹਮੁਖੀ ਵਿਚ ਛਪੀ ਪੁਸਤਕ ‘ਟੁਕੜਾ ਟੁਕੜਾ ਜ਼ਿੰਦਗੀ’ ਤੇ ਇੰਦਰਜੀਤ ਕੌਰ ਸਿੱਧੂ ਦੀ ਨਵੀਂ ਕਿਤਾਬ ‘ਜੰਗ ਅਜੇ ਵੀ ਜਾਰੀ ਹੈ’ ਸ਼ਾਮਲ ਸੀ।ਅਰੰਭ ਵਿਚ ਨਦੀਮ ਪਰਮਾਰ ਹੋਰਾਂ ਨੇ ਬੀ ਸੀ ਕਲਚਰਲ ਫਾਉਂਡੇਸ਼ਨ ਬਾਰੇ ਤੇ ਕਿਤਾਬਾਂ ਬਾਰੇ ਸੰਖੇਪ ਵਿਚ ਦਸਿਆ।ਇਸ ਦੇ ਬਾਦ ਕਿਤਾਬਾਂ ਬਾਰੇ ਪਰਚੇ ਪੜੇ ਗਏ।ਸਮਾਗਮ ਨੂੰ ਜਰਨੈਲ ਸਿੰਘ ਸੇਖਾ, ਹੁਮਾ ਸ਼ੋਏਬ, ਜਸਵੰਤ ਸਿੰਘ ਜ਼ਫਰ, ਬਲਦੇਵ ਬਾਠ, ਨਾਵਲਕਾਰ ਨਛੱਤਰ ਸਿੰਘ ਬਰਾੜ, ਬਰਜਿੰਦਰ ਢਿਲੋਂ ਨੇ ਕਿਤਾਬਾਂ ਬਾਰੇ ਵਿਚਾਰ ਪ੍ਰਗਟਾਏ।ਇਸ ਮੌਕੇ ਗੁਰਭਜਨ ਗਿਲ ਨੇ ਬੋਲਦਿਆਂ ਕਿਹਾ ਕਿ ਪੰਜਾਬੀ ਦੀਆਂ ਕਿਤਾਬਾਂ ਸ਼ਾਹਮੁਖੀ ਵਿਚ ਤੇ ਦੂਜੀਆਂ ਭਾਸ਼ਾਵਾਂ ਵਿਚ ਛਪਣਾ ਇਕ ਵਧੀਆ ਗਲ ਹੈ ਜਿਸ ਨਾਲ ਸਾਡੇ ਸਾਹਿਤ ਦੀ ਗਲ ਦੂਜੀਆਂ ਬੋਲੀਆਂ ਤਕ ਵੀ ਪੁਜੇਗੀ। ਸਟੇਜ ਸਕਤਰ ਦੀ ਭੁਮਿਕਾ ਅਮਰੀਕ ਪਲਾਹੀ ਨੇ ਬਖੂਬੀ ਨਿਭਾਈ।