‘ਪਥਰਾਅ ਕਰਨ ਵਾਲਿਆਂ ਦੀ ਬਜਾਏ ਲੇਖਿਕਾ ਅਰੁੰਧਾਤੀ ਰਾਏ ਨੂੰ ਫ਼ੌਜ ਦੀ ਜੀਪ ਨਾਲ ਬੰਨ੍ਹੋ’:ਭਾਜਪਾ ਆਗੂ

ਨਵੀਂ ਦਿੱਲੀ,: ਭਾਜਪਾ ਦੇ ਐਮ.ਪੀ. ਅਤੇ ਫ਼ਿਲਮ ਅਦਾਕਾਰ ਪਰੇਸ਼ ਰਾਵਲ ਨੇ ਇਕ ਵਿਵਾਦਤ ਟਿਪਣੀ ਕਰਦਿਆਂ ਕਿਹਾ ਕਿ ਕਸ਼ਮੀਰ ਵਿਚ ਪਥਰਾਅ ਕਰਨ ਵਾਲਿਆਂ ਦੀ ਬਜਾਏ ਪ੍ਰਸਿੱਧ ਲੇਖਿਕਾ ਅਰੁੰਧਾਤੀ ਰਾਏ ਨੂੰ ਫ਼ੌਜ ਦੀ ਜੀਪ ਅੱਗੇ ਬੰਨ੍ਹਣਾ ਚਾਹੀਦਾ ਹੈ।ਪਰੇਸ਼ ਰਾਵਲ ਨੇ ਕਸ਼ਮੀਰ ਦੀ ਇਕ ਘਟਨਾ ਦੇ ਸੰਦਰਭ ਵਿਚ ਇਹ ਵਿਵਾਦਤ ਟਿਪਣੀ ਕੀਤੀ ਜਿਸ ਵਿਚ ਸੁਰੱਖਿਆ ਬਲਾਂ ਨੇ ਭੀੜ ਤੋਂ ਬਚਣ ਲਈ ਇਕ ਵਿਖਾਵਾਕਾਰੀ ਨੂੰ ਜੀਪ ਅੱਗੇ ਬੰਨ੍ਹ ਕੇ ਮਨੁੱਖੀ ਢਾਲ ਵਜੋਂ ਵਰਤਿਆ ਸੀ। ਭਾਜਪਾ ਅਤੇ ਕਸ਼ਮੀਰ ਵਾਦੀ ਵਿਚ ਫ਼ੌਜੀ ਕਾਰਵਾਈ ਦਾ ਤਿੱਖਾ ਵਿਰੋਧ ਕਰਨ ਵਾਲੀ ਅਰੁੰਧਾਤੀ ਰਾਏ ਨੂੰ ਕਰੜੇ ਹੱਥੀਂ ਲੈਂਦਿਆਂ ਪਰੇਸ਼ ਰਾਵਲ ਵਲੋਂ ਟਵਿਟਰ ਰਾਹੀਂ ਜਾਰੀ ਕੀਤੀ ਗਈ ਟਿਪਣੀ ਦੀ ਸੋਸ਼ਲ ਮੀਡੀਆ ‘ਤੇ ਸਰਗਰਮ ਸ਼ਖਸੀਅਤਾਂ ਨੇ ਨਿੰਦਾ ਕੀਤੀ ਹੈ। ਕੁੱਝ ਲੋਕਾਂ ਨੇ ਪਰੇਸ਼ ਰਾਵਲ ‘ਤੇ ਹਿੰਸਾ ਭੜਕਾਉਣ ਦੀ ਕੋਸ਼ਿਸ਼ ਕਰਨ ਦਾ ਦੋਸ਼ ਲਾਇਆ।