ਵਾਸ਼ਿੰਗਟਨ:-ਰਿਪਬਲਿਕਨ ਪਾਰਟੀ ਦੇ ਰਾਸ਼ਟਰਪਤੀ ਅਹੁਦੇ ਦੇ ਉਮੀਦਵਾਰ ਡੋਨਲਡ ਟਰੰਪ (70) ਨੇ ਹਿੰਦੂ ਭਾਈਚਾਰੇ ਵੱਲੋਂ ਆਲਮੀ ਸੱਭਿਅਤਾ ਅਤੇ ਅਮਰੀਕੀ ਸਭਿਆਚਾਰ ‘ਚ ਪਾਏ ਗਏ ਸ਼ਾਨਦਾਰ ਯੋਗਦਾਨ ਦੀ ਸ਼ਲਾਘਾ ਕੀਤੀ ਹੈ। ਉਨ੍ਹਾਂ ਅਗਲੇ ਮਹੀਨੇ ਨਿਊਜਰਸੀ ‘ਚ ਭਾਰਤੀ-ਅਮਰੀਕੀ ਸਮਾਗਮ ਨੂੰ ਸੰਬੋਧਨ ਕਰਨ ਦੀ ਤਸਦੀਕ ਕੀਤੀ ਹੈ ਜਿਸ ਦਾ ਫਾਇਦਾ ਇਸਲਾਮਿਕ ਅਤਿਵਾਦ ਦੇ ਦੁਨੀਆਂ ਭਰ ਦੇ ਪੀੜਤਾਂ ਨੂੰ ਮਿਲੇਗਾ। ਟਰੰਪ ਨੇ ਆਪਣੇ ਬਿਆਨ ‘ਚ ਕਿਹਾ,”ਅਸੀਂ ਆਪਣੇ ਮੁਕਤ ਉੱਦਮ, ਸਖ਼ਤ ਮਿਹਨਤ, ਪਰਿਵਾਰਕ ਕਦਰਾਂ ਕੀਮਤਾਂ ਅਤੇ ਮਜ਼ਬੂਤ ਅਮਰੀਕੀ ਵਿਦੇਸ਼ ਨੀਤੀ ਰਾਹੀਂ ਸਾਂਝ ਵਧਾਉਣਾ ਚਾਹੁੰਦੇ ਹਾਂ।” ਉਨ੍ਹਾਂ 24 ਸਕਿੰਟਾਂ ਦੇ ਵੀਡੀਓ ਸੁਨੇਹੇ ਰਾਹੀਂ ਭਾਰਤੀ-ਅਮਰੀਕੀਆਂ ਨੂੰ 15 ਅਕਤੂਬਰ ਨੂੰ ਪ੍ਰੋਗਰਾਮ ‘ਚ ਹਾਜ਼ਰ ਰਹਿਣ ਦਾ ਸੱਦਾ ਦਿੱਤਾ ਹੈ। ਟਰੰਪ ਦੀ ਪ੍ਰਚਾਰ ਮੁਹਿੰਮ ਮੁਤਾਬਿਕ ਦਿਨ ਭਰ ਚਲਣ ਵਾਲੇ ਇਸ ਪ੍ਰੋਗਰਾਮ ‘ਚ ਬਾਲੀਵੁੱਡ ਦੇ ਕਲਾਕਾਰਾਂ, ਡਾਂਸਰਾਂ ਅਤੇ ਗਾਇਕਾਂ ਨੂੰ ਵੀ ਸੱਦਾ ਭੇਜਿਆ ਗਿਆ ਹੈ। ਇਨ੍ਹਾਂ ਤੋਂ ਇਲਾਵਾ ਹਿੰਦੂ ਸੰਤਾਂ ਅਤੇ ਹੋਰ ਆਗੂਆਂ ਨੂੰ ਵੀ ਪ੍ਰੋਗਰਾਮ ਲਈ ਸੁਨੇਹੇ ਭੇਜੇ ਗਏ ਹਨ।
‘ਅਤਿਵਾਦ ਖ਼ਿਲਾਫ਼ ਮਨੁੱਖੀ ਏਕਤਾ’ ਨਾਮ ਦੇ ਇਸ ਪ੍ਰੋਗਰਾਮ ਦਾ ਪ੍ਰਬੰਧ ਰਿਪਬਲਿਕਨ ਹਿੰਦੂ ਕੁਲੀਸ਼ਨ ਵੱਲੋਂ ਕੀਤਾ ਗਿਆ ਹੈ ਜਿਸ ਦੇ ਮੋਢੀ ਸ਼ਲਭ ਕੁਮਾਰ ਹਨ ਜੋ ਇਲੀਨੌਇ ਦੇ ਰਹਿਣ ਵਾਲੇ ਹਨ। ਰਾਸ਼ਟਰਪਤੀ ਅਹੁਦੇ ਲਈ ਪਿਛਲੀਆਂ ਦੋ ਚੋਣਾਂ ‘ਚ ਇਹ ਪਹਿਲੀ ਵਾਰ ਹੈ ਜਦੋਂ ਕਿਸੇ ਉਮੀਦਵਾਰ ਨੇ ਭਾਰਤੀ-ਅਮਰੀਕੀ ਪ੍ਰੋਗਰਾਮ ‘ਚ ਸ਼ਾਮਲ ਨੂੰ ਮਨਜ਼ੂਰੀ ਦਿੱਤੀ ਹੈ। ਟਰੰਪ ਦੇ ਇਸ ਫ਼ੈਸਲੇ ਨੂੰ ਭਾਰਤੀ-ਅਮਰੀਕੀ ਭਾਈਚਾਰੇ ਨੂੰ ਲੁਭਾਉਣ ਦੀ ਕੋਸ਼ਿਸ਼ ਵਜੋਂ ਦੇਖਿਆ ਜਾ ਰਿਹਾ ਹੈ।
ਟਰੰਪ ਦੀ ਏਸ਼ੀਅਨ ਪੈਸੇਫਿਕ ਅਮਰੀਕੀ ਸਲਾਹਕਾਰ ਕਮੇਟੀ ‘ਚ ਭਾਰਤੀ ਵੀ ਸ਼ਾਮਲ: ਡੋਨਲਡ ਟਰੰਪ ਨੇ ਆਪਣੀ ਏਸ਼ੀਅਨ ਪੈਸੇਫਿਕ ਅਮਰੀਕੀ ਸਲਾਹਕਾਰ ਕਮੇਟੀ ਚ ਭਾਰਤੀ-ਅਮਰੀਕੀਆਂ ਨੂੰ ਵੀ ਸ਼ਾਮਲ ਕੀਤਾ ਹੈ। ਕਮੇਟੀ ਚ 30 ਮੈਂਬਰ ਸ਼ਾਮਲ ਹਨ ਜਿਨ੍ਹਾਂ ਵਿੱਚ ਵਰਜੀਨੀਆ ਦੇ ਪੁਨੀਤ ਆਹਲੂਵਾਲੀਆ, ਕੈਲੀਫੋਰਨੀਆ ਦੇ ਕੇ ਵੀ ਕੁਮਾਰ ਅਤੇ ਇਲੀਨੌਇ ਦੇ ਸ਼ਲਭ ਕੁਮਾਰ ਨੂੰ ਵੀ ਲਿਆ ਗਿਆ ਹੈ। ਸ਼ਲਭ ਕੁਮਾਰ ਨੇ ਦਾਅਵਾ ਕੀਤਾ ਕਿ ਰਾਸ਼ਟਰਪਤੀ ਚੋਣਾਂ ਵਿੱਚ ਟਰੰਪ ਜੇਤੂ ਬਣਨਗੇ।
