ਜਰਗ ਜੌੜੇਪੁਲ/ਪਾਇਲ, (ਜੋਗਿੰਦਰ ਸਿੰਘ ਆਜ਼ਾਦ,ਰੇਖਾ ਰਾਣੀ ਆਜ਼ਾਦ)-ਹਰ ਤੀਜੇ ਦਿਨ ਅਖ਼ਬਾਰ ਦੇ ਪੰਨਿਆਂ ‘ਤੇ ਫ਼ਲਾਣੀ ਜਗਾ ਅਵਾਰਾ ਕੁੱਤੇ ਨੇ ਬੱਚੇ ਨੂੰ ਜਾਂ ਵੱਡੇ ਨੂੰ ਕੱਟ ਲਿਆ ਜਾਂ ਬੋਟੀ ਬੋਟੀ ਕਰਕੇ ਖਾ ਗਏ ਆਦਿ ਦਿਲ ਨੂੰ ਹਲੂਣਾ ਦੇਣ ਵਾਲੀਆਂ ਘਟਨਾ ਵਾਪਰਨ ਦੀਆਂ ਖਬਰਾਂ ਪੜਨ ਸੁਣਨ ਨੂੰ ਮਿਲਦੀਆਂ ਹਨ, ਪਰ ਇਹਨਾਂ ਅਵਾਰਾ ਕੁੱਤਿਆਂ ਨੂੰ ਕਾਬੂ ਕਰਨ ਲਈ ਸਰਕਾਰ ਨੇ ਅਜੇ ਤੱਕ ਕੋਈ ਵੀ ਦਾ ਕੋਈ ਢੁਕਵਾਂ ਹੱਲ ਨਹੀਂ ਕੱਢਿਆ ਜਾ ਰਿਹਾ , ਜਿਸ ਕਾਰਨ ਦਿਨੋਂ ਦਿਨ ਇਨਾਂ ਅਵਾਰਾ ਖੂੰਖਾਰ ਕੁੱਤਿਆਂ ਦੀ ਗਿਣਤੀ ‘ਚ ਬੇਅੱਥਾਹ ਵਾਧਾ ਹੋ ਰਿਹਾ ਜੋ ਸਾਡੇ ਲਈ ਬੇਹੱਦ ਚਿੰਤਾ ਦਾ ਵਿਸ਼ਾ ਹੈ। ਅੱਜ ਹਰ ਪਿੰਡ ‘ਚ, ਹਰ ਕਸਬੇ ‘ਚ , ਹਰ ਗਲੀ ਤੇ ਹਰ ਮਹੱਲੇ ਦੇ ਮੋੜ ਤੇ ਇਨਾਂ ਅਵਾਰਾ ਖੂੰਖਾਰ ਕੁੱਤਿਆਂ ਦੀ ਭਰਮਾਰ ਦੇਖ਼ਣ ਨੂੰ ਮਿਲਦੀ ਹੈ ਤੇ ਇਹ ਦਰਜ਼ਨਾਂ ਦੀ ਤਾਦਾਦ ਵਿੱਚ ਘੁੰਮਦੇ ਆਮ ਦੇਖੇ ਜਾ ਸਕਦੇ ਹਨ ਅਤੇ ਇਨਾਂ ਅਵਾਰਾ ਕੁੱਤਿਆਂ ਦੀ ਦਹਿਸ਼ਤ ਕਾਰਨ ਲੋਕਾਂ ਦਾ ਘਰੋਂ ਨਿਕਲਣਾ ਮੁਸ਼ਕਿਲ ਹੋਇਆ ਪਿਆ, ਰਾਤ ਨੂੰ ਤਾਂ ਕੀ?
ਕਿਸਾਨ ਅਤੇ ਮਜ਼ਦੂਰ ਦਿਨ ਨੂੰ ਵੀ ਆਪਣੇ ਖ਼ੇਤ ਜਾਣ ਤੋਂ ਡਰਦਾ ਹੈ ਅਤੇ ਹਰ ਇੱਕ ਪਿੰਡ ਵਿੱਚ ਇਹਨਾਂ ਦੀ ਗਿਣਤੀ ਸੈਂਕੜਿਆਂ ਨੂੰ ਪਾਰ ਕਰ ਚੁੱਕੀ ਹੈ। ਹਰ ਸਾਲ ਜਿਥੇ ਇਨਾਂ ਅਵਾਰਾ ਕੁੱਤਿਆਂ ਦੀ ਗਿਣਤੀ ਵਿੱਚ ਵੱਡਾ ਵਾਧਾ ਹੋ ਰਿਹਾ, ਉਥੇ ਹੀ ਇਨਾਂ ਦੁਆਰਾ ਕੱਟਣ-ਵੱਢਣ ਦੀਆਂ ਘਟਨਾਵਾਂ ਵੀ ਲਗਾਤਾਰ ਵੱਧ ਰਹੀਆਂ ਹਨ, ਪਰ ਪ੍ਰਸ਼ਾਸਨ ਜਾਂ ਸਰਕਾਰ ਇਸ ਵਿਸ਼ੇ ਨੂੰ ਗੰਭੀਰਤਾ ਨਾਲ ਨਹੀਂ ਲੈ ਰਿਹਾ ਜਿਸ ਕਰਕੇ ਇਨਾਂ ਅਵਾਰਾ ਕੁੱਤਿਆਂ ਦੀ ਗਿਣਤੀ ਤੇਜੀ ਨਾਲ ਵੱਧਦੀ ਜਾ ਰਹੀ ਹੈ ਅਤੇ ਅਵਾਰਾ ਕੁੱਤੇ ਵੀ ਇੱਕ ਨਾਮੁਰਾਦ ਬਿਮਾਰੀ ਵਾਂਗ ਅਨੇਕਾਂ ਕੀਮਤੀ ਜਾਨਾਂ ਖ਼ਤਮ ਰਹੇ ਹੈ। ਇਲਾਕੇ ਦੇ ਵਿੱਚ ਹੀ ਹੁਣ ਤੱਕ ਅਨੇਕਾਂ ਜਾਨਵਰਾਂ ਤੇ ਪਸੂਆਂ ਤੋਂ ਇਲਾਵਾ ਬੱਚਿਆਂ ਅਤੇ ਵੱਡਿਆਂ ਨੂੰ ਕੁੱਤਿਆਂ ਵੱਲੋਂ ਨੋਚ ਨੋਚਕੇ ਮਾਰਨ ਦੀਆਂ ਘਟਨਾਵਾਂ ਵਾਪਰ ਚੁੱਕੀਆਂ ਹਨ।
