ਇਕ ਹੋਰ ਇਟਾਲੀਅਨ ਗੋਰਾ ਅੰਮ੍ਰਿਤ ਛੱਕ ਕੇ ਸਿੰਘ ਸਜਿਆ

ਵੀਨਸ (ਇਟਲੀ), (ਹਰਦੀਪ ਸਿੰਘ ਕੰਗ)- ਸਿੱਖ ਧਰਮ ਦੀ ਮਹਾਨਤਾ ਤੇ ਵਿਸ਼ਾਲਤਾ ਤੋਂ ਪ੍ਰਭਾਵਿਤ ਹੋ ਕੇ ਵਿਦੇਸ਼ੀ ਲੋਕਾਂ ਦਾ ਸਿੱਖੀ ਨੂੰ ਅਪਨਾਉਣ ਦਾ ਰੁਝਾਨ ਜਾਰੀ ਹੈ। ਕਨੇਡਾ, ਅਮਰੀਕਾ ਅਤੇ ਯੂਰਪ ਦੇ ਵੱਖ-ਵੱਖ ਦੇਸ਼ਾਂ ਦੇ ਜੰਮਪਲ ਗੋਰੇ-ਗੋਰੀਆਂ ਸਿੱਖ ਧਰਮ ਨੂੰ ਅਪਣਾ ਕੇ ਬਕਾਇਦਾ ਅੰਮਿ੍ਤ ਛਕ ਕੇ ਸਿੱਖੀ ਨੂੰ ਸਮਰਪਿਤ ਹੋ ਚੁੱਕੇ ਹਨ। ਇਸੇ ਤਰ੍ਹਾਂ ਇਟਲੀ ਵਿਚ ਵੀ ਬੀਤੇ ਦਿਨ ਇਕ ਹੋਰ ਇਟਾਲੀਅਨ ਨੌਜਵਾਨ ਨੇ ਸਿੱਖੀ ਸਿਧਾਂਤਾਂ ਤੋਂ ਪ੍ਰਭਾਵਿਤ ਹੋ ਕੇ ਅੰਮਿ੍ਤ ਛੱਕ ਲਿਆ ਹੈ। ਵੀਨਸ ਨੇੜਲੇ ਸ਼ਹਿਰ ਮਾਏਸਟਰੇ ਦੇ ਰਹਿਣ ਵਾਲੇ ਇਸ ਨੌਜਵਾਨ ਨੇ ਹੁਣ ਆਪਣਾ ਨਾਂਅ ਬਦਲ ਕੇ ਕਰਤਾਰ ਸਿੰਘ ਖਾਲਸਾ ਰੱਖ ਲਿਆ ਹੈ ਅਤੇ ਉਹ ਪੰਜ ਕਕਾਰਾਂ ਦਾ ਧਾਰਨੀ ਹੋ ਕੇ ਸਿੱਖੀ ਪਹਿਰਾਵਾ ਪਹਿਨ ਕੇ ਅਥਾਹ ਮਾਣ ਮਹਿਸੂਸ ਕਰ ਰਿਹਾ ਹੈ।ਵਿਸ਼ੇਸ਼ ਗੱਲਬਾਤ ਦੌਰਾਨ ਇਸ ਇਟਾਲੀਅਨ ਨੌਜਵਾਨ ਨੇ ਦੱਸਿਆ ਕਿ ਉਹ ਦੋ ਸਾਲ ਪਹਿਲਾਂ ਵਿਚੈਸਾ ਨੇੜਲੇ ਕਾਸਤਲਗੌਮਬੈਰਤੋ ਅਤੇ ਲੋਨੀਗੋ ਗੁਰਦੁਆਰਿਆਂ ਵਿਚ ਗਿਆ ਸੀ। ਅੰਮਿਰਤ ਛਕਣ ਵਾਲੀ ਇਟਾਲੀਅਨ ਲੜਕੀ ਹਰਗੁਣ ਕੌਰ ਖਾਲਸਾ ਨੇ ਵੀ ਉਸ ਨੂੰ ਇਟਾਲੀਅਨ ਭਾਸ਼ਾ ਵਿਚ ਸਿੱਖੀ ਬਾਰੇ ਚੋਖੀ ਜਾਣਕਾਰੀ ਮੁਹੱਈਆ ਕਰਵਾਈ ਸੀ।