ਘਰ ‘ਚ ਵੜ ਕੇ ਹਮਲਾ ਕਰਨ ਦੇ ਦੋਸ਼ ‘ਚ ਪਿਓ-ਪੁੱਤ ਗਿ੍ਫ਼ਤਾਰ

ਜ.ਸ, ਮਲੌਦ : ਥਾਣਾ ਮਲੌਦ ਪੁਲਿਸ ਨੇ ਜਗਦੀਪ ਸਿੰਘ ਵਾਸੀ ਉਕਸੀ ਦੀ ਸ਼ਿਕਾਇਤ ‘ਤੇ ਕਾਰਵਾਈ ਕਰਦੇ ਹੋਏ ਜੋਰਾ ਸਿੰਘ ਤੇ ਜਗਦੇਵ ਸਿੰਘ ਵਾਸੀ ਉਕਸੀ ਖ਼ਿਲਾਫ਼ ਘਰ ‘ਚ ਵੜ ਕੇ ਹਮਲਾ ਕਰਨ ਦੇ ਦੋਸ਼ ‘ਚ ਮਾਮਲਾ ਦਰਜ ਕੀਤਾ ਹੈ। ਸ਼ਿਕਾਇਤਕਰਤਾ ਮੁਤਾਬਕ 10 ਦਸੰਬਰ ਨੂੰ ਉਸ ਦੇ ਤਾਏ ਦਾ ਪੁੱਤਰ ਲਖਵਿੰਦਰ ਸਿੰਘ ਸੈਰ ਕਰਨ ਲਈ ਮੇਨ ਗੇਟ ਖੋਲ੍ਹ ਕੇ ਚਲਾ ਗਿਆ ਤਾਂ ਗੁਆਂਢੀ ਜੋਰਾ ਸਿੰਘ ਘਰ ਅੰਦਰ ਵੜ ਆਇਆ ਤੇ ਉਸ ‘ਤੇ ਹਮਲਾ ਕਰਨ ਲੱਗਾ। ਜਦੋਂ ਉਸ ਨੇ ਬਚਾਅ ਲਈ ਬਾਂਹ ਅੱਗੇ ਕੀਤੀ ਤਾਂ ਤੇਜ਼ਧਾਰ ਪੱਤੀ ਉਸ ਦੀ ਬਾਂਹ ‘ਤੇ ਵੱਜੀ। ਇਸ ਦੌਰਾਨ ਉਸ ਦਾ ਪਿਤਾ ਜਗਦੇਵ ਸਿੰਘ ਵੀ ਉਥੇ ਆ ਗਿਆ, ਜਿਸ ਨੇ ਵੀ ਉਸ ‘ਤੇ ਕਿਰਪਾਨ ਨਾਲ ਹਮਲਾ ਕੀਤਾ। ਇਸ ਕਾਰਨ ਉਹ ਜ਼ਮੀਨ ‘ਤੇ ਡਿੱਗ ਪਿਆ ਤਾਂ ਉਸ ਦੀ ਬੁਰੀ ਤਰ੍ਹਾਂ ਕੁੱਟਮਾਰ ਕੀਤੀ। ਉਸ ਨੇ ਰੋਲਾ ਪਾਇਆ ਤਾਂ ਅੰਦਰੋਂ ਪਰਿਵਾਰਕ ਮੈਂਬਰ ਬਾਹਰ ਆ ਗਏ। ਆਲੇ-ਦੁਆਲੇ ਦੇ ਲੋਕਾਂ ਨੇ ਉਸ ਨੂੰ ਛੁਡਾਇਆ। ਇਸ ਦੌਰਾਨ ਹਮਲਾਵਰ ਮੌਕੇ ਤੋਂ ਫ਼ਰਾਰ ਹੋ ਗਏ। ਉਸ ਨੂੰ ਪਰਿਵਾਰਕ ਮੈਂਬਰਾਂ ਨੇ ਸਿਵਲ ਹਸਪਤਾਲ ਦਾਖ਼ਲ ਕਰਵਾਇਆ। ਮਾਮਲੇ ਦੀ ਜਾਂਚ ਕਰ ਰਹੇ ਆਈਓ ਸੁਰਜੀਤ ਸਿੰਘ ਨੇ ਕਿਹਾ ਦੋਵੇਂ ਮੁਲਜ਼ਮਾਂ ਨੂੰ ਗਿ੍ਫ਼ਤਾਰ ਕਰ ਲਿਆ ਹੈ।