ਚੰਡੀਗੜ੍ਹ (ਭੁੱਲਰ)— ਜਨਰਲ ਕੈਟਾਗਰੀ ਨਾਲ ਸਬੰਧਤ ਕੁੱਝ ਸੰਗਠਨਾਂ ਵਲੋਂ ਅੱਜ ਜਾਤੀ ਆਧਾਰਿਤ ਰਾਖਵੇਂਕਰਨ ਦੇ ਵਿਰੋਧ ‘ਚ ਦਿੱਤੇ ਗਏ ਦੇਸ਼ ਵਿਆਪੀ ਬੰਦ ਦਾ ਪੰਜਾਬ ਵਿਚ ਵੀ ਅਸਰ ਦਿਖਿਆ। ਕੁੱਝ ਕੁ ਥਾਵਾਂ ‘ਤੇ ਜਬਰੀ ਦੁਕਾਨਾਂ ਬੰਦ ਕਰਵਾਉਣ ਕਾਰਨ ਕੁੱਝ ਗਰੁੱਪਾਂ ਵਿਚ ਆਪਸੀ ਝੜਪਾਂ ਵੀ ਹੋਈਆਂ ਪਰ ਸਮੁੱਚੇ ਤੌਰ ‘ਤੇ ਇਹ ਬੰਦ ਸ਼ਾਂਤੀਪੂਰਵਕ ਰਿਹਾ। ਜ਼ਿਕਰਯੋਗ ਹੈ ਕਿ ਇਸ ਬੰਦ ਦਾ ਸੱਦਾ ਜਨਰਲ ਕੈਟਾਗਰੀ ਨਾਲ ਸਬੰਧਤ ਕਿਸੇ ਖਾਸ ਪ੍ਰਮੁੱਖ ਸੰਗਠਨ ਵਲੋਂ ਭਾਵੇਂ ਨਹੀਂ ਦਿੱਤਾ ਗਿਆ ਸੀ ਪਰ ਸੋਸ਼ਲ ਮੀਡੀਆ ‘ਤੇ ਕੁੱਝ ਗਰੁੱਪਾਂ ਦੇ ਸੱਦੇ ‘ਤੇ ਹੀ ਇਹ ਬੰਦ ਹੋਇਆ।
ਇਸ ਬੰਦ ਦਾ ਵਧੇਰੇ ਅਸਰ ਵਪਾਰਕ ਕਾਰੋਬਾਰ ‘ਤੇ ਹੋਇਆ, ਜਦਕਿ ਟਰਾਂਸਪੋਰਟ ਸੇਵਾਵਾਂ ਤੋਂ ਇਲਾਵਾ ਸਕੂਲ ਤੇ ਸਰਕਾਰੀ ਦਫ਼ਤਰ ਆਦਿ ਆਮ ਵਾਂਗ ਖੁੱਲ੍ਹੇ ਰਹੇ। ਉਚ ਸਿੱਖਿਆ ਵਿਭਾਗ ਵਲੋਂ ਯੂਨੀਵਰਸਿਟੀਆਂ ਤੇ ਸਬੰਧਤ ਕਾਲਜ ਅਹਿਤਿਆਤੀ ਕਦਮ ਵਜੋਂ ਪਹਿਲਾਂ ਹੀ ਬੰਦ ਕਰਨ ਦਾ ਐਲਾਨ ਕਰ ਦਿੱਤਾ ਗਿਆ ਸੀ।
ਪ੍ਰਾਪਤ ਰਿਪੋਰਟਾਂ ਅਨੁਸਾਰ ਇਸ ਬੰਦ ਦਾ ਜ਼ਿਆਦਾ ਅਸਰ ਮਾਲਵਾ ਖੇਤਰ ਦੇ ਜ਼ਿਲਿਆਂ ‘ਚ ਹੋਇਆ। ਭਾਵੇਂ ਕਿ ਮਾਝੇ ਤੇ ਦੁਆਬੇ ਦੇ ਪ੍ਰਮੁੱਖ ਕਸਬਿਆਂ ਤੇ ਸ਼ਹਿਰਾਂ ਵਿਚ ਵੀ ਇਸ ਬੰਦ ਦਾ ਰਲਿਆ-ਮਿਲਿਆ ਅਸਰ ਰਿਹਾ। ਮਾਲਵਾ ‘ਚ ਬਠਿੰਡਾ, ਪਟਿਆਲਾ, ਫਿਰੋਜ਼ਪੁਰ, ਅਬੋਹਰ, ਸੰਗਰੂਰ ਤੇ ਮਾਨਸਾ ਆਦਿ ਸ਼ਹਿਰਾਂ ਤੇ ਕਸਬਿਆਂ ਵਿਚ ਜ਼ਿਆਦਾਤਰ ਵਪਾਰਕ ਅਦਾਰੇ ਤੇ ਬਾਜ਼ਾਰ ਆਦਿ ਬੰਦ ਰਹੇ। ਫਿਰੋਜ਼ਪੁਰ ਵਿਚ ਜਿਥੇ ਇਕ ਗਰੁੱਪ ਵਲੋਂ ਦੁਕਾਨਾਂ ਜਬਰੀ ਬੰਦ ਕਰਵਾਉਣ ਕਾਰਨ ਭੰਨ-ਤੋੜ ਤੇ ਹਿੰਸਾ ਹੋਈ, ਉਥੇ ਹੀ ਅੰਮ੍ਰਿਤਸਰ, ਫਗਵਾੜਾ ਅਤੇ ਨਕੋਦਰ ਤੋਂ ਇਲਾਵਾ ਕੁੱਝ ਹੋਰ ਥਾਵਾਂ ‘ਤੇ ਵੀ ਦੁਕਾਨਾਂ ਬੰਦ ਕਰਵਾਉਣ ਦੇ ਮੁੱਦੇ ‘ਤੇ ਕੁਝ ਗਰੁੱਪਾਂ ‘ਚ ਆਪਸੀ ਵਿਵਾਦ ਹੋਇਆ ਪਰ ਪੁਲਸ ਵਲੋਂ ਸਥਿਤੀ ‘ਤੇ ਕਾਬੂ ਪਾ ਲਿਆ ਗਿਆ।