ਪੀਟੀਆਈ, ਪਣਜੀ : ਆਪਣੇ ਚਾਰ ਸਾਲ ਦੇ ਬੇਟੇ ਦੀ ਹੱਤਿਆ ਦੇ ਦੋਸ਼ ‘ਚ ਗ੍ਰਿਫ਼ਤਾਰ AI ਸਟਾਰਟਅਪ ਦੀ ਸੀਈਓ ਸੂਚਨਾ ਸੇਠ ਨੂੰ ਲੈ ਕੇ ਇਕ ਹੋਰ ਖੁਲਾਸਾ ਹੋਇਆ ਹੈ। ਦਰਅਸਲ ਉਹ ਜਿਸ ਟੈਕਸੀ ਵਿਚ ਗੋਆ ਤੋਂ ਕਰਨਾਟਕ ਜਾ ਰਹੀ ਸੀ, ਉਸ ਦੇ ਡਰਾਈਵਰ ਨਾਲ ਗੱਲ ਕਰਨ ਤੋਂ ਬਾਅਦ ਪਤਾ ਲੱਗਿਆ ਕਿ ਪੂਰੀ ਯਾਤਰਾ ਦੌਰਾਨ ਔਰਤ ਕਾਫ਼ੀ ਸ਼ਾਂਤ ਸੀ।
ਇਕ ਸ਼ਬਦ ਵੀ ਨਹੀਂ ਬੋਲਿਆ
ਵੀਰਵਾਰ ਨੂੰ ਉੱਤਰੀ ਗੋਆ ਦੇ ਕੈਂਡੋਲਿਮ ਵਿਚ ਮੀਡੀਆ ਨਾਲ ਗੱਲ ਕਰਦਿਆਂ ਟੈਕਸੀ ਡਰਾਈਵਰ ਰੇ ਜੌਨ ਨੇ ਕਿਹਾ ਕਿ ਔਰਤ ਸ਼ਾਂਤ ਸੀ ਅਤੇ 10 ਘੰਟੇ ਤੋਂ ਵੱਧ ਲੰਬੇ ਸਫ਼ਰ ਦੌਰਾਨ ਇਕ ਵੀ ਸ਼ਬਦ ਨਹੀਂ ਬੋਲਿਆ। ਸੂਚਨਾ ਸੇਠ (39) ਨੂੰ ਸੋਮਵਾਰ ਰਾਤ ਨੂੰ ਕਰਨਾਟਕ ਦੇ ਚਿਤਰਦੁਰਗਾ ਤੋਂ ਉਸ ਸਮੇਂ ਗ੍ਰਿਫ਼ਤਾਰ ਕੀਤਾ ਗਿਆ, ਜਦੋਂ ਉਹ ਆਪਣੇ ਬੇਟੇ ਦੀ ਲਾਸ਼ ਨੂੰ ਬੈਗ ਵਿਚ ਲੈ ਕੇ ਟੈਕਸੀ ਵਿਚ ਸਫ਼ਰ ਕਰ ਰਹੀ ਸੀ ਅਤੇ ਮੰਗਲਵਾਰ ਨੂੰ ਗੋਆ ਲਿਆਂਦਾ ਗਿਆ। ਮਾਪੁਸਾ ਸ਼ਹਿਰ ਦੀ ਅਦਾਲਤ ਨੇ ਉਸ ਨੂੰ ਛੇ ਦਿਨਾਂ ਲਈ ਪੁਲਿਸ ਹਿਰਾਸਤ ਵਿਚ ਭੇਜ ਦਿੱਤਾ ਹੈ।
ਬੈਗ ਬਹੁਤ ਜ਼ਿਆਦਾ ਭਾਰੀ ਸੀ
ਔਰਤ ‘ਤੇ ਗੋਆ ਦੇ ਕੈਂਡੋਲਿਮ ‘ਚ ਸਰਵਿਸ ਅਪਾਰਟਮੈਂਟ ‘ਚ ਬੱਚੇ ਦੀ ਹੱਤਿਆ ਕਰਨ ਦਾ ਦੋਸ਼ ਹੈ। ਜੌਨ ਨੇ ਦੱਸਿਆ ਕਿ ਸਰਵਿਸ ਅਪਾਰਟਮੈਂਟ ਦੇ ਸਟਾਫ ਨੇ ਸੇਠ ਲਈ ਉਸ ਦੀ ਟੈਕਸੀ ਬੁੱਕ ਕੀਤੀ ਸੀ। ਟੈਕਸੀ ਡਰਾਈਵਰ ਨੇ ਕਿਹਾ,’ਜਦੋਂ ਮੈਂ ਸਰਵਿਸ ਅਪਾਰਟਮੈਂਟ ਪਹੁੰਚਿਆ ਤਾਂ ਉਸ (ਸੇਠ) ਨੇ ਮੈਨੂੰ ਆਪਣਾ ਬੈਗ ਰਿਸੈਪਸ਼ਨ ਤੋਂ ਟੈਕਸੀ ਤੱਕ ਲਿਜਾਣ ਲਈ ਕਿਹਾ। ਇਹ ਭਾਰਾ ਸੀ।’
ਡਰਾਈਵਰ ਨੇ ਕਿਹਾ, ‘ਮੈਂ ਉਸ ਨੂੰ ਪੁੱਛਿਆ ਕਿ ਕੀ ਅਸੀਂ ਇਸ ਨੂੰ ਹਲਕਾ ਕਰਨ ਲਈ ਬੈਗ ਵਿੱਚੋਂ ਕੁਝ ਸਮਾਨ ਕੱਢ ਸਕਦੇ ਹਾਂ ਤਾਂ ਉਸ ਨੇ ਇਨਕਾਰ ਕਰ ਦਿੱਤਾ। ਸਾਨੂੰ ਬੈਗ ਨੂੰ ਕਾਰ ਦੀ ਡਿੱਘੀ ਤੱਕ ਖਿੱਚਣਾ ਪਿਆ। ਡਰਾਈਵਰ ਨੇ ਕਿਹਾ ਕਿ ਉੱਤਰੀ ਗੋਨਾ ਦੇ ਬਿਚੋਲਿਮ ਕਸਬੇ ਵਿਚ ਪਹੁੰਚਣ ਤੋਂ ਬਾਅਦ ਔਰਤ ਨੂੰ ਪਿਆਸ ਲੱਗੀ, ਇਸ ਲਈ ਉਸ ਨੇ ਉਸ ਨੂੰ ਪਾਣੀ ਦੀ ਬੋਤਲ ਲਿਆਉਣ ਲਈ ਕਿਹਾ।
ਸੜਕ ਰਾਹੀਂ ਸਫ਼ਰ ਕਰਨ ‘ਤੇ ਜ਼ੋਰ ਦਿੱਤਾ
ਜੌਨ ਨੇ ਦੱਸਿਆ ਕਿ ਸੋਮਵਾਰ ਨੂੰ ਜਦੋਂ ਉਹ ਬੈਂਗਲੁਰੂ ਜਾ ਰਿਹਾ ਸੀ ਤਾਂ ਕਰਨਾਟਕ-ਗੋਆ ਸਰਹੱਦ ‘ਤੇ ਚੋਰਲਾ ਘਾਟ ‘ਤੇ ਭਾਰੀ ਟ੍ਰੈਫਿਕ ਜਾਮ ਸੀ। ਪੁਲਿਸ ਨੇ ਉਨ੍ਹਾਂ ਨੂੰ ਦੱਸਿਆ ਕਿ ਟ੍ਰੈਫਿਕ ਨੂੰ ਠੀਕ ਕਰਨ ਲਈ ਘੱਟੋ-ਘੱਟ ਚਾਰ ਘੰਟੇ ਦਾ ਸਮਾਂ ਲੱਗੇਗਾ।
ਉਸ ਨੇ ਕਿਹਾ, ‘ਮੈਂ ਸਮੇਂ ਨੂੰ ਵਧਾ-ਚੜ੍ਹਾ ਕੇ ਦੱਸਿਆ ਅਤੇ ਮੈਡਮ (ਸੇਠ) ਨੂੰ ਕਿਹਾ ਕਿ ਸੜਕ ਨੂੰ ਕਲੀਅਰ ਕਰਨ ਵਿਚ ਛੇ ਘੰਟੇ ਲੱਗਣਗੇ ਤੇ ਸੁਝਾਅ ਦਿੱਤਾ ਕਿ ਅਸੀਂ ਵਾਪਸ ਮੁੜ ਸਕਦੇ ਹਾਂ ਤੇ ਏਅਰਪੋਰਟ ਵੱਲ ਜਾ ਸਕਦੇ ਹਾਂ ਪਰ ਉਸ ਨੇ ਸਾਨੂੰ ਸੜਕ ਦੁਆਰਾ ਅੱਗੇ ਵਧਣ ਦੀ ਸਲਾਹ ਦਿੱਤੀ।’ ਇਸ ਕਾਰਨ ਉਸ ਨੂੰ ਲੱਗਾ ਕਿ ਕੁਝ ਗ਼ਲਤ ਹੈ।
ਕਾਫੀ ਭਾਲ ਤੋਂ ਬਾਅਦ ਮਿਲਿਆ ਪੁਲਿਸ ਸਟੇਸ਼ਨ
ਟੈਕਸੀ ਡਰਾਈਵਰ ਨੇ ਦੱਸਿਆ ਕਿ ਬਾਅਦ ‘ਚ ਉਸ ਨੂੰ ਗੋਆ ਪੁਲਿਸ ਦਾ ਫੋਨ ਆਇਆ ਕਿ ਉਸ ਦੇ ਯਾਤਰੀ ‘ਤੇ ਕੁਝ ਸ਼ੱਕ ਹੈ। ‘ਕੈਲੰਗੁਟ ਪੁਲਿਸ ਨੇ ਮੈਨੂੰ ਨੇੜਲੇ ਪੁਲਿਸ ਸਟੇਸ਼ਨ ਦੀ ਭਾਲ ਕਰਨ ਅਤੇ ਉਸ ਨੂੰ ਉਥੇ ਲਿਜਾਣ ਲਈ ਕਿਹਾ। ਮੈਂ Google Map ਅਤੇ GPS ‘ਤੇ ਖੋਜ ਕਰਨ ਦੀ ਕੋਸ਼ਿਸ਼ ਕੀਤੀ ਪਰ ਨੇੜੇ-ਤੇੜੇ ਕੁਝ ਵੀ ਨਹੀਂ ਲੱਭ ਸਕਿਆ। ਮੈਂ ਟੋਲ ਪਲਾਜ਼ਾ ‘ਤੇ ਪੁਲਿਸ ਵਾਲਿਆਂ ਨੂੰ ਵੀ ਲੱਭਿਆ ਪਰ ਉੱਥੇ ਕੋਈ ਨਹੀਂ ਸੀ।’
ਪੁਲਿਸ ਕਾਲ ਤੋਂ ਡਰੇ ਹੋਏ ਟੈਕਸੀ ਡਰਾਈਵਰ ਨੇ ਕਿਹਾ ਕਿ ਉਸ ਨੇ ਸੜਕ ਕਿਨਾਰੇ ਇਕ ਰੈਸਟੋਰੈਂਟ ਵਿਚ ਰੁਕਣ ਦੇ ਬਹਾਨੇ ਕੁਝ ਹੋਰ ਸਮਾਂ ਬਿਤਾਇਆ। ਉਥੇ ਉਸ ਨੂੰ ਪਤਾ ਲੱਗਿਆ ਕਿ ਉਸ ਤੋਂ ਮਹਿਜ਼ 500 ਮੀਟਰ ਦੀ ਦੂਰੀ ‘ਤੇ ਪੁਲਿਸ ਸਟੇਸ਼ਨ ਹੈ। ‘ਅਸੀਂ ਬੈਂਗਲੁਰੂ ਤੋਂ ਡੇਢ ਘੰਟੇ ਦੀ ਦੂਰੀ ‘ਤੇ ਸੀ। ਮੈਂ ਅਯਾਮੰਗਲਾ ਪੁਲਿਸ ਸਟੇਸ਼ਨ (ਕਰਨਾਟਕ ਦੇ ਚਿਤਰਦੁਰਗਾ ਜ਼ਿਲੇ ਵਿਚ) ਗਿਆ, ਜਦੋਂਕਿ ਕੈਲੰਗੁਟ ਪੁਲਿਸ ਦੇ ਇੱਕ ਅਧਿਕਾਰੀ ਨੇ ਮੈਨੂੰ ਫੋਨ ਕੀਤਾ ਸੀ।’
ਔਰਤ ਨੇ ਪੁਲਿਸ ਸਾਹਮਣੇ ਕਬੂਲਿਆ ਗੁਨਾਹ
ਜੌਹਨ ਨੇ ਕਿਹਾ ਕਿ ਸਬੰਧਤ ਇੰਸਪੈਕਟਰ ਨੂੰ ਬਾਹਰ ਆਉਣ ਵਿਚ ਲਗਭਗ 15 ਮਿੰਟ ਲੱਗ ਗਏ ਪਰ ਮੈਡਮ ਸ਼ਾਂਤ ਸੀ ਅਤੇ ਕਾਰ ਵਿਚ ਬੈਠੀ ਸੀ। ਜੌਹਨ ਨੇ ਕਿਹਾ, ‘ਪੁਲਿਸ ਨੇ ਉਸ ਦੇ ਬੈਗ ਦੀ ਤਲਾਸ਼ੀ ਲਈ ਅਤੇ ਉਸ ਵਿੱਚੋਂ ਬੱਚੇ ਦੀ ਲਾਸ਼ ਮਿਲੀ।’ ਉਸ ਨੇ ਕਿਹਾ, “ਜਦੋਂ ਪੁਲਿਸ ਨੇ ਉਸਨੂੰ ਪੁੱਛਿਆ ਕਿ ਕੀ ਇਹ ਉਸਦਾ ਪੁੱਤਰ ਹੈ। ਉਸ ਨੇ ਸ਼ਾਂਤੀ ਨਾਲ ‘ਹਾਂ’ ਕਿਹਾ।
ਪਿਤਾ ਨੇ ਆਪਣੇ ਪੁੱਤਰ ਦਾ ਕੀਤਾ ਅੰਤਿਮ ਸੰਸਕਾਰ
ਅਧਿਕਾਰੀਆਂ ਅਨੁਸਾਰ ਦੋਸ਼ੀ ਜੋ ਪੱਛਮੀ ਬੰਗਾਲ ਦੀ ਰਹਿਣ ਵਾਲਾ ਹੈ, ਨੇ ਪੁਲਿਸ ਨੂੰ ਦੱਸਿਆ ਹੈ ਕਿ ਉਹ ਅਤੇ ਉਸ ਦਾ ਪਤੀ ਵੱਖ ਹੋ ਗਏ ਹਨ ਅਤੇ ਉਨ੍ਹਾਂ ਦੇ ਤਲਾਕ ਦੀ ਕਾਰਵਾਈ ਚੱਲ ਰਹੀ ਹੈ। ਉਸ ਨੇ 6 ਜਨਵਰੀ ਨੂੰ ਆਪਣੇ ਬੇਟੇ ਨਾਲ ਉੱਤਰੀ ਗੋਆ ਦੇ ਸਰਵਿਸ ਅਪਾਰਟਮੈਂਟ ਵਿਚ ਚੈਕਇਨ ਕੀਤਾ ਸੀ।
