ਟੋਰਾਂਟੋ— ਏਅਰ ਕੈਨੇਡਾ ਏਅਰਲਾਈਨ ਆਪਣੇ ਯਾਤਰੀਆਂ ਨੂੰ ਸ਼ਾਨਦਾਰ ਮੌਕਾ ਦੇ ਰਹੀ ਹੈ, ਜਿਸ ਦਾ ਲਾਭ ਉਠਾ ਕੇ ਘੱਟ ਕੀਮਤ ਅਦਾ ਕਰਕੇ ਹੀ ਬਿਜ਼ਨੈੱਸ ਕਲਾਸ ਜਾਂ ਫਿਰ ਵਧੀਆ ਕਲਾਸ ਦੀ ਸੀਟਾਂ ਦਾ ਮਜ਼ਾ ਲਿਆ ਜਾ ਸਕਦਾ ਹੈ। ਇਸ ਲਈ ਤੁਹਾਨੂੰ ਵਧੀਆ ਕਲਾਸ ਦੀ ਸੀਟ ਲਈ ਬੋਲੀ ਲਗਾਉਣੀ ਪਵੇਗੀ। ਏਅਰਲਾਈਨ ਨੇ ਯਾਤਰੀਆਂ ਲਈ ‘ਐਕਸ਼ਨ ਸਟਾਈਲ ਪ੍ਰੋਗਰਾਮ’ ਪੇਸ਼ ਕੀਤਾ ਹੈ। ਇਸ ਪ੍ਰੋਗਰਾਮ ਰਾਹੀਂ ਤੁਸੀਂ ਫਲਾਈਟ ਵਿਚ ਖਾਲੀ ਪਈਆਂ ਵਧੀਆ ਕਲਾਸ ਦੀਆਂ ਸੀਟਾਂ ਲਈ ਇਕੋਨਾਮੀ ਕਲਾਸ ਦੀਆਂ ਸੀਟਾਂ ਤੋਂ ਥੋੜ੍ਹੇ ਜ਼ਿਆਦਾ ਪੈਸੇ ਅਤੇ ਉਨ੍ਹਾਂ ਦੀ ਅਸਲ ਫੀਸ ਤੋਂ ਘੱਟ ਪੈਸੇ ਦੇ ਕੇ ਸਫਰ ਦਾ ਮਜ਼ਾ ਲੈ ਸਕਦੇ ਹੋ। ਇਸ ਲਈ ਤੁਹਾਨੂੰ ਬਿਜ਼ਨੈੱਸ ਕਲਾਸ ਜਾਂ ਫਿਰ ਹੋਰ ਕਲਾਸ ਦੀਆਂ ਸੀਟਾਂ ਦੀ ਪੂਰੀ ਟਿਕਟ ਜਿੰਨੇਂ ਪੈਸੇ ਨਹੀਂ ਭਰਨੇ ਪੈਣਗੇ।
ਸੀਟਾਂ ਲਈ ਬੋਲੀ ਲਗਾਉਣ ਲਈ ਘੱਟ ਤੋਂ ਘੱਟ ਅਤੇ ਵਧ ਤੋਂ ਵਧ ਰਕਮ ਤੈਅ ਕੀਤੀ ਜਾਂਦੀ ਹੈ। ਇਸ ਤੈਅ ਹੱਦ ਦੇ ਅੰਦਰ ਹੀ ਯਾਤਰੀ ਬੋਲੀ ਲਗਾ ਸਕਦੇ ਹਨ। ਜਿਹੜਾ ਯਾਤਰੀ ਜ਼ਿਆਦਾ ਬੋਲੀ ਲਗਾਉਂਦਾ ਹੈ, ਉਹ ਘੱਟ ਪੈਸਿਆਂ ਵਿਚ ਵਧੀਆ ਕਲਾਸ ਦੀ ਸੀਟ ਦਾ ਮਜ਼ਾ ਲੈ ਸਕਦਾ ਹੈ। ਏਅਰ ਕੈਨੇਡਾ ਦਾ ਇਹ ਪ੍ਰੋਗਰਾਮ ਸਿਰਫ ਕੁਝ ਫਲਾਈਟਾਂ ਲਈ ਹੀ ਹੈ। ਬੋਲੀ ਲਗਾਉਣ ਲਈ ਯੋਗ ਉਮੀਦਵਾਰਾਂ ਨੂੰ ਸਫਰ ਤੋਂ 10 ਦਿਨ ਪਹਿਲਾਂ ਹੀ ਈਮੇਲ ਭੇਜ ਕੇ ਇਸ ਦੀ ਜਾਣਕਾਰੀ ਦਿੱਤੀ ਜਾਵੇਗੀ। ਇਸ ਲਈ ਯਾਤਰੀ ਏਅਰ ਕੈਨੇਡਾ ਦੀ ਵੈੱਬਸਾਈਟ ‘ਤੇ ਜਾ ਕੇ ਵੀ ਆਪਣੀ ਯੋਗਤਾ ਪਰਖ ਸਕਦੇ ਹਨ। ਏਅਰਲਾਈਨ ਦਾ ਮਕਸਦ ਇਸ ਪ੍ਰੋਗਰਾਮ ਰਾਹੀਂ ਕੁਝ ਜ਼ਿਆਦਾ ਪੈਸੇ ਕਮਾ ਕੇ ਲਾਭ ਕਮਾਉਣ ਦਾ ਹੈ। ਇਹ ਪ੍ਰੋਗਰਾਮ ਇਨ੍ਹਾਂ ਗਰਮੀਆਂ ਵਿਚ ਪੂਰੀ ਤਰ੍ਹਾਂ ਲਾਗੂ ਕਰ ਦਿੱਤਾ ਜਾਵੇਗਾ।
