ਇੰਫਾਲ,: ਮਨੀਪੁਰ ਵਿਧਾਨ ਸਭਾ ਚੋਣਾਂ ਵਿਚ ਪਹਿਲੀ ਵਾਰ ਚੋਣ ਮੈਦਾਨ ਵਿਚ ਉਤਰੀ ਇਰੋਮ ਸ਼ਰਮੀਲਾ ਨੇ ਅੱਜ ਕਿਹਾ ਕਿ ਉਨ੍ਹਾਂ ਨੇ ਵਿਵਾਦਤ ਅਫ਼ਸਪਾ ਵਿਰੁਧ ਅਪਣੀ ਲੜਾਈ ਨਹੀਂ ਛੱਡੀ, ਸਗੋਂ ਅਪਣੀ ਰਣਨੀਤੀ ਵਿਚ ਤਬਦੀਲੀ ਕੀਤੀ ਹੈ। ਇਰੋਮ ਨੇ ਕਿਹਾ ਕਿ ਲੋਕਾਂ ਦਾ ਇਕ ਤਬਕਾ ਹਥਿਆਰਬੰਦ ਬਲ ਵਿਸ਼ੇਸ਼ ਅਧਿਕਾਰ ਕਾਨੂੰਨ (ਅਫ਼ਸਪਾ) ਵਿਰੁਧ 16 ਸਾਲ ਲੰਮੀ ਹੜਤਾਲ ਦੌਰਾਨ ਉਨ੍ਹਾਂ ਦੀ ‘ਸ਼ਹਾਦਤ’ ਚਾਹੁੰਦਾ ਸੀ।
ਇਸ ਹੜਤਾਲ ਨੂੰ ਉਨ੍ਹਾਂ ਨੇ ਪਿਛਲੇ ਸਾਲ ਖ਼ਤਮ ਕਰਨ ਦਾ ਫ਼ੈਸਲਾ ਕੀਤਾ ਹੈ।ਉਨ੍ਹਾਂ ਨੇ ਪੀਪਲਜ਼ ਰੀਸਰਜੈਂਸ ਐਂਡ ਜਸਟਿਸ ਅਲਾਇੰਸ (ਪੀ.ਆਰ.ਜੇ.ਏ.) ਦਾ ਗਠਨ ਕੀਤਾ ਹੈ ਅਤੇ ਮਾਰਚ ਵਿਚ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਲੜਨ ਦਾ ਫ਼ੈਸਲਾ ਕੀਤਾ ਹੈ ਜਿਸ ਦਾ ਇਕੋ-ਇਕ ਏਜੰਡਾ ਮਨੀਪੁਰ ਤੋਂ ਅਫ਼ਸਪਾ ਹਟਾਉਣਾ ਹੈ। ਇਕ ਇੰਟਰਵਿਊ ਦੌਰਾਨ ਉਨ੍ਹਾਂ ਕਿਹਾ, ”ਅਫ਼ਸਪਾ ਚੋਣਾਂ ਵਿਚ ਕਦੇ ਇਕ ਮੁੱਦਾ ਨਹੀਂ ਰਿਹਾ, ਪਰ ਮੈਂ ਚੋਣਾਂ ਵਿਚ ਇਹ ਗੱਲ ਰਖਣਾ ਚਾਹੁੰਦੀ ਹਾਂ ਕਿ ਅਫ਼ਸਪਾ ਨਾ ਸਿਰਫ਼ ਕਰੂਰ ਹੈ ਸਗੋਂ ਅਜਿਹਾ ਹੈ ਜੋ ਮਨੁੱਖੀ ਅਧਿਕਾਰਾਂ ਦਾ ਗੰਭੀਰ ਉਲੰਘਣ ਕਰਦਾ ਹੈ।”
