ਮਨੋਰੰਜਨ ਡੈਸਕ, ਨਵੀਂ ਦਿੱਲੀ : ਆਮਿਰ ਖਾਨ ਤੇ ਰੀਨਾ ਦੱਤਾ ਦੀ ਬੇਟੀ ਆਇਰਾ ਖਾਨ ਜਲਦ ਹੀ ਦੁਲਹਨ ਬਣਨ ਜਾ ਰਹੀ ਹੈ। ਆਇਰਾ ਆਪਣੇ ਲੰਬੇ ਸਮੇਂ ਦੇ ਬੁਆਏਫ੍ਰੈਂਡ ਨੂਪੁਰ ਸ਼ਿਖਾਰੇ ਨਾਲ ਜਨਵਰੀ ‘ਚ ਵਿਆਹ ਦੇ ਬੰਧਨ ‘ਚ ਬੱਝਣ ਜਾ ਰਹੀ ਹੈ। ਦੋਵਾਂ ਦੇ ਵਿਆਹ ਦੇ ਫੰਕਸ਼ਨ ਸ਼ੁਰੂ ਹੋ ਗਏ ਹਨ, ਜਿਸ ਦੀ ਇਕ ਝਲਕ ਖੁਦ ਆਇਰਾ ਨੇ ਪ੍ਰਸ਼ੰਸਕਾਂ ਨੂੰ ਦਿਖਾਈ ਹੈ।
ਸ਼ੁਰੂ ਹੋਏ ਆਇਰਾ ਖਾਨ ਦੇ ਵਿਆਹ ਦੇ ਫੰਕਸ਼ਨ
ਆਇਰਾ ਖਾਨ ਨੇ ਆਪਣੇ ਸੋਸ਼ਲ ਮੀਡੀਆ ਹੈਂਡਲ ਇੰਸਟਾਗ੍ਰਾਮ ਸਟੋਰੀ ‘ਤੇ ਪ੍ਰਸ਼ੰਸਕਾਂ ਨਾਲ ਆਪਣੇ ਵਿਆਹ ਸਮਾਗਮ ਦੀਆਂ ਕਈ ਝਲਕੀਆਂ ਸਾਂਝੀਆਂ ਕੀਤੀਆਂ ਹਨ। ਵੀਡੀਓ ‘ਚ ਕਈ ਮਹਿਮਾਨਾਂ ਨੂੰ ਡਾਇਨਿੰਗ ਟੇਬਲ ਦੇ ਕੋਲ ਬੈਠ ਕੇ ਮਹਾਰਾਸ਼ਟਰੀ ਪਕਵਾਨਾਂ ਦਾ ਆਨੰਦ ਲੈਂਦਿਆਂ ਦੇਖਿਆ ਜਾ ਸਕਦਾ ਹੈ। ਉੱਥੇ ਹੀ ਵੀਡੀਓ ‘ਚ ਆਮਿਰ ਦੀ ਸਾਬਕਾ ਪਤਨੀ ਕਿਰਨ ਰਾਓ ਅਤੇ ਉਨ੍ਹਾਂ ਦਾ ਬੇਟਾ ਆਜ਼ਾਦ ਰਾਓ ਖਾਨ ਵੀ ਬੈਠੇ ਨਜ਼ਰ ਆ ਰਹੇ ਹਨ। ਵੀਡੀਓ ‘ਚ ਆਇਰਾ ਕਹਿੰਦੀ ਹੋਈ ਨਜ਼ਰ ਆ ਰਹੀ ਹੈ, ‘ਹੇ ਭਗਵਾਨ, ਕਿਸੇ ਮਹਾਰਾਸ਼ਟਰੀ ਨਾਲ ਵਿਆਹ ਕਰ ਲਵੋ ਤੇ ਕੈਲਵਨ ਲੈ ਲਓ। ਇਹ ਕਿੰਨਾ ਮਜ਼ੇਦਾਰ ਹੈ।’
ਇਸ ਤੋਂ ਇਲਾਵਾ ਇਕ ਤਸਵੀਰ ‘ਚ ਦੁਲਹਨ ਬਣਨ ਵਾਲੀ ਆਇਰਾ ਆਪਣੇ ਦੋਸਤਾਂ ਨਾਲ ਪੋਜ਼ ਦਿੰਦੀ ਨਜ਼ਰ ਆ ਰਹੀ ਹੈ। ਫੋਟੋ ‘ਚ ਦੇਖਿਆ ਜਾ ਸਕਦਾ ਹੈ ਕਿ ਆਮਿਰ ਦੀ ਬੇਟੀ ਗੋਲਡਨ ਸੀਕੁਇਨ ਬਲਾਊਜ਼ ਦੇ ਨਾਲ ਲਾਲ ਸਾੜੀ ‘ਚ ਬੇਹੱਦ ਖੂਬਸੂਰਤ ਲੱਗ ਰਹੀ ਹੈ। ਆਪਣੀ ਇਸ ਦਿਖ ਨੂੰ ਪੂਰਾ ਕਰਨ ਲਈ ਉਸ ਨੇ ਮੱਥੇ ‘ਤੇ ਬਿੰਦੀ ਅਤੇ ਕੰਨਾਂ ‘ਚ ਝੁਮਕੇ ਪਾਏ ਹੋਏ ਹਨ।
ਇਨ੍ਹਾਂ ਫੰਕਸ਼ਨਾਂ ‘ਚ ਆਇਰਾ ਖਾਨ ਦੀ ਦੋਸਤ ਅਤੇ ਲਿਟਲ ਥਿੰਗਸ ਦੀ ਅਦਾਕਾਰਾ ਮਿਥਿਲਾ ਪਾਲਕਰ ਵੀ ਮੌਜੂਦ ਸੀ। ਉਨ੍ਹਾਂ ਨੇ ਆਇਰਾ ਅਤੇ ਨੂਪੁਰ ਨਾਲ ਦੋ ਤਸਵੀਰਾਂ ਪੋਸਟ ਕੀਤੀਆਂ ਹਨ। ਫੋਟੋ ਸ਼ੇਅਰ ਕਰਦਿਆਂ ਉਨ੍ਹਾਂ ਨੇ ਕੈਪਸ਼ਨ ‘ਚ ਲਿਖਿਆ, ‘ਵਿਆਹ ਦੇ ਜਸ਼ਨ ਸ਼ੁਰੂ ਹੋ ਗਏ ਹਨ’।
ਕਦੋਂ ਹੈ ਆਇਰਾ ਦਾ ਵਿਆਹ?
ਪਹਿਲਾਂ ਆਇਰਾ ਖਾਨ ਅਤੇ ਨੂਪੁਰ ਸ਼ਿਖਾਰੇ ਦੇ ਵਿਆਹ ਨੂੰ ਲੈ ਕੇ ਖਬਰਾਂ ਆ ਰਹੀਆਂ ਸਨ ਕਿ ਦੋਵੇਂ 3 ਜਨਵਰੀ ਨੂੰ ਵਿਆਹ ਕਰਨ ਜਾ ਰਹੇ ਹਨ ਪਰ ਬਾਅਦ ‘ਚ ਤਰੀਕ ‘ਚ ਕੁਝ ਬਦਲਾਅ ਦੇਖਣ ਨੂੰ ਮਿਲਿਆ। ਈ-ਟਾਈਮਜ਼ ਦੀ ਰਿਪੋਰਟ ਮੁਤਾਬਕ ਦੱਸਿਆ ਗਿਆ ਕਿ ਆਮਿਰ ਖਾਨ ਦੀ ਬੇਟੀ 13 ਜਨਵਰੀ ਨੂੰ ਦੁਲਹਨ ਬਣੇਗੀ।
