ਮਿਆਂਮਾਰ ਨੇ ਭਾਰਤੀ ਸਰਹੱਦ ਅੰਦਰ ਗੱਡਿਆ ਪਿੱਲਰ

ਨਵੀਂ ਦਿੱਲੀ, : ਭਾਰਤ ਦੇ ਗੁਆਂਢੀ ਦੇਸ਼ ਮਿਆਂਮਾਰ ਵਲੋਂ ਇਕ ਬਾਰਡਰ ਪਿੱਲਰ ਮਣੀਪੁਰ ਵਿਚ ਭਾਰਤ-ਮਿਆਂਮਾਰ ਬਾਰਡਰ ‘ਤੇ ਭਾਰਤੀ ਸਰਹੱਦ ਦੇ 3 ਕਿਲੋਮੀਟਰ ਅੰਦਰ ਗੱਡ ਦਿੱਤਾ ਗਿਆ ਹੈ। ਜਿਸ ‘ਤੇ ਸਥਾਨਕ ਲੋਕਾਂ ਵਿਚ ਕਾਫੀ ਨਾਰਾਜ਼ਗੀ ਹੈ। ਫਿਲਹਾਲ ਸਥਿਤੀ ਨੂੰ ਦੇਖਦੇ ਹੋਏ ਮਣੀਪੁਰ ਸਰਕਾਰ ਨੇ ਮਾਮਲੇ ਦੀ ਜਾਂਚ ਦੇ ਲਈ ਇਕ ਕਮੇਟੀ ਦਾ ਗਠਨ ਕੀਤਾ ਹੈ। ਦਰਅਸਲ ਹਾਲ ਹੀ ਵਿਚ ਮਿਆਂਮਾਰ ਸਰਕਾਰ ਨੇ ਭਾਰਤੀ ਸਰਹੱਦ ‘ਤੇ ਕੁਝ ਬਾਰਡਰ ਪਿੱਲਰ ਦਾ Îਨਿਰਮਾਣ ਕੀਤਾ ਹੈ। ਜਿਸ ਵਿਚੋਂ ਮਣੀਪੁਰ ਦੇ ਤੇਂਗਨੁਪਾਲ ਜ਼ਿਲ੍ਹੇ ਦੇ ਕਵਾਥਾ ਇਲਾਕੇ ਵਿਚ ਬਣਾਏ ਗਏ ਬਾਰਡਰ ਪਿੱਲਰ ‘ਤੇ ਸਥਾਨਕ ਲੋਕਾਂ ਵਿਚ ਗੁੱਸਾ ਹੈ। ਲੋਕਾਂ ਦਾ ਕਹਿਣਾ ਹੈ ਕਿ ਇਹ ਭਾਰਤੀ ਸਰਹੱਦ ਹੈ, ਲੇਕਿਨ ਸਰਕਾਰ ਨੇ ਮਿਆਂਮਾਰ ਨੂੰ ਖੁਸ਼ ਕਰਨ ਦੇ ਲਈ ਇਸ ‘ਤੇ ਕੋਈ ਇਤਰਾਜ਼ ਨਹੀਂ ਜਤਾਇਆ ਹੈ।
ਮਣੀਪੁਰ ਦੀ ਕਾਂਗਲਾਪੇਕ ਕਾਂਬਾ ਲੁਪ ਅਤੇ ਪੀਪਲੁਲਸ ਰਿਸਰਜੈਂਸ ਐਂਡ ਜਸਟਿਸ ਅਲਾਇੰਸ ਪਾਰਟੀਆਂ ਦੇ ਕੁਝ ਨੇਤਾਵਾਂ ਅਤੇ ਕੁਝ ਪੱਤਰਕਾਰਾਂ ਨੇ ਵਿਵਾਦਤ ਸਥਾਨ ਦਾ ਦੌਰਾ ਵੀ ਕੀਤਾ ਹੈ। ਇਸ ਦੌਰਾਨ ਵਿਵਾਦਤ ਪਿੱਲਰ ਦੀ ਸੁਰੱਖਿਆ ਵਿਚ ਅਸਾਮ ਰਾਈਫਲਸ ਅਤੇ ਪੁਲਿਸ ਦੇ ਜਵਾਨ ਤੈਨਾਤ ਸਨ। ਹੁਣ ਇਸ ਮਸਲੇ ‘ਤੇ ਕੇਂਦਰ ਅਤੇ ਰਾਜ ਵਿਚ ਵਿਰੋਧੀ ਪਾਰਟੀ ਕਾਂਗਰਸ ਨੇ ਸਰਕਾਰ ਦੀ ਆਲੋਚਨਾ ਕੀਤੀ ਹੈ ਅਤੇ ਸਰਕਾਰ ‘ਤੇ ਭਾਰਤੀ ਜ਼ਮੀਨ ਨੂੰ ਮਿਆਂਮਾਰ ਨੂੰ ਦੇਣ ਦਾ ਦੋਸ਼ ਲਗਾਇਆ ਹੈ। ਇਸ ਪੂਰੇ ਵਿਵਾਦ ‘ਤੇ ਮਣੀਪੁਰ ਦੇ ਮੁੱਖ ਮੰਤਰੀ ਨੇ ਕਾਂਗਰਸ ਦੇ ਦੋਸ਼ਾਂ ਨੂੰ ਬੇਬੁਨਿਆਦ ਦੱਸਿਆ ਹੈ। ਬੀਰੇਨ ਸਿੰਘ ਅਨੁਸਾਰ ਇਲਾਕੇ ਦਾ ਮਿਆਂਮਾਰ ਅਤੇ ਭਾਰਤੀ ਟੀਮਾਂ ਦੁਆਰਾ ਸਰਵੇ ਕੀਤਾ ਗਿਆ ਸੀ। ਜਿਸ ਤੋਂ ਬਾਅਦ ਹੀ ਦੋਵੇਂ ਧਿਰਾਂ ਵਿਚ ਰਜ਼ਾਮੰਦੀ ਬਣੀ ਸੀ।ਹਾਲਾਂਕਿ ਬੀਰੇਨ ਸਿੰਘ ਨੇ ਕਿਹਾ ਕਿ ਅਜੇ ਤੱਕ ਦੋਵੇਂ ਦੇਸ਼ਾਂ ਦੇ ਵਿਚ ਬਾਰਡਰ ਤੈਅ ਨਹੀਂ ਕੀਤਾ ਗਿਆ ਹੈ ਅਤੇ ਵਿਵਾਦਤ ਪਿੱਲਰ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਕਾਂਗਰਸ ਦੇ 6 ਵਿਧਾਇਕਾਂ ਦੀ ਇਕ ਟੀਮ ਨੇ ਵਿਵਾਦਤ ਸਥਾਨ ਦਾ ਦੌਰਾ ਕੀਤਾ। ਉਨ੍ਹਾਂ ਕਿਹਾ ਕਿ ਉਹ ਇਸ ਖ਼ਿਲਾਫ਼ ਜਨਤਾ ਨਾਲ ਮਿਲ ਕੇ ਅੰਦੋਲਨ ਕਰਨਗੇ।