ਆਨਲਾਈਨ ਡੈਸਕ, ਨਵੀਂ ਦਿੱਲੀ : ਭਾਰਤੀ ਕਪਤਾਨ ਰੋਹਿਤ ਸ਼ਰਮਾ ਨੇ 17 ਜਨਵਰੀ ਨੂੰ ਬੇਂਗਲੁਰੂ ‘ਚ ਅਫ਼ਗਾਨਿਸਤਾਨ ਖ਼ਿਲਾਫ਼ ਭਾਰਤ ਬਨਾਮ ਅਫ਼ਗਾਨਿਸਤਾਨ ‘ਚ ਆਪਣੇ ਕਰੀਅਰ ਦੀ ਸਰਵੋਤਮ ਪਾਰੀ ਖੇਡੀ।
ਧੋਨੀ ਦੇ ਰਿਕਾਰਡ ਦੀ ਕੀਤੀ ਬਰਾਬਰੀ
ਇਸ ਮੈਚ ‘ਚ ਸੁਪਰ ਓਵਰ ‘ਚ ਜਿੱਤ ਨਾਲ ਰੋਹਿਤ ਨੇ ਐੱਮਐੱਸ ਧੋਨੀ ਦਾ ਵੱਡਾ ਰਿਕਾਰਡ ਆਪਣੇ ਨਾਂ ਕਰ ਲਿਆ ਹੈ। ਰੋਹਿਤ ਨੇ ਟੀ-20 ਵਿੱਚ ਜਿੱਤ ਦੇ ਮਾਮਲੇ ਵਿੱਚ ਐੱਮਐੱਸ ਧੋਨੀ ਦੀ ਬਰਾਬਰੀ ਕਰ ਲਈ ਹੈ। ਟੀ-20 ਵਿਸ਼ਵ ਕੱਪ 2022 ਦੇ ਸੈਮੀਫਾਈਨਲ ਤੋਂ ਬਾਅਦ ਰੋਹਿਤ ਨੇ ਕਈ ਟੀ-20 ਮੈਚ ਨਹੀਂ ਖੇਡੇ ਹਨ।
14 ਮਹੀਨਿਆਂ ਬਾਅਦ ਸੀਰੀਜ਼ ‘ਚ ਕੀਤੀ ਵਾਪਸੀ
ਇਸ ਦੌਰਾਨ ਅਫ਼ਗਾਨਿਸਤਾਨ ਖ਼ਿਲਾਫ਼ ਭਾਰਤ ਬਨਾਮ ਅਫ਼ਗਾਨਿਸਤਾਨ ਸੀਰੀਜ਼ ‘ਚ ਕਪਤਾਨ ਰੋਹਿਤ ਨੇ 14 ਮਹੀਨਿਆਂ ਬਾਅਦ ਸਭ ਤੋਂ ਛੋਟੇ ਫਾਰਮੈਟ ‘ਚ ਵਾਪਸੀ ਕੀਤੀ। 54 ਟੀ-20 ਮੈਚਾਂ ‘ਚ ਰੋਹਿਤ ਨੇ 42 ਜਿੱਤੇ ਹਨ ਤੇ 12 ’ਚ ਹਾਰ ਦਾ ਸਾਹਮਣਾ ਕੀਤਾ ਹੈ। 72 ਟੀ-20 ਮੈਚਾਂ ‘ਚ ਧੋਨੀ ਨੇ 41 ਜਿੱਤੇ ਹਨ ਤੇ 28 ਹਾਰੇ ਹਨ।
ਰੋਹਿਤ ਦੇ ਟੀ-20 ਕਰੀਅਰ ਦੀ ਸਰਵੋਤਮ ਪਾਰੀ
ਰੋਹਿਤ ਸ਼ਰਮਾ ਨੇ ਵਾਪਸੀ ਕਰਦੇ ਹੋਏ ਟੀ-20 ‘ਚ ਆਪਣਾ ਪੰਜਵਾਂ ਸੈਂਕੜਾ ਲਗਾਇਆ। ਭਾਰਤ ਦੀ ਖ਼ਰਾਬ ਸ਼ੁਰੂਆਤ ਤੋਂ ਬਾਅਦ ਰੋਹਿਤ ਨੇ ਪਾਰੀ ਨੂੰ ਸੰਭਾਲਿਆ ਤੇ 69 ਗੇਂਦਾਂ ‘ਤੇ 121 ਦੌੜਾਂ ਬਣਾਈਆਂ, ਜਿਸ ‘ਚ 11 ਚੌਕੇ ਅਤੇ 8 ਛੱਕੇ ਸ਼ਾਮਲ ਸਨ। ਇਸ ਦੇ ਨਾਲ ਹੀ ਰੋਹਿਤ ਨੇ ਟੀ-20 ਵਿੱਚ ਆਪਣੇ ਕਰੀਅਰ ਦੀ ਸਰਵੋਤਮ ਪਾਰੀ ਖੇਡੀ।
ਰਿੰਕੂ ਨਾਲ ਮਿਲ ਕੇ ਖੇਡੀ ਤੂਫਾਨੀ ਪਾਰੀ
ਕਪਤਾਨ ਨੇ ਰਿੰਕੂ ਸਿੰਘ ਦੇ ਨਾਲ ਮਿਲ ਕੇ ਪੰਜਵੇਂ ਵਿਕਟ ਲਈ 39 ਗੇਂਦਾਂ ਵਿੱਚ 69 ਦੌੜਾਂ ਦੀ ਅਜੇਤੂ ਪਾਰੀ ਖੇਡੀ ਜਿਸ ਨਾਲ ਭਾਰਤ ਦਾ ਸਕੋਰ 212 ਤੱਕ ਪਹੁੰਚ ਗਿਆ। ਇਸ ਮੈਚ ‘ਚ ਰੋਹਿਤ ਨੂੰ ਇਕ ਵਾਰ ਨਹੀਂ ਸਗੋਂ ਦੋ ਵਾਰ ਬੱਲੇਬਾਜ਼ੀ ਕਰਨੀ ਪਈ। ਮੈਚ ਦਾ ਸਕੋਰ 20 ਓਵਰਾਂ ਵਿੱਚ ਬਰਾਬਰ ਹੋਣ ਤੋਂ ਬਾਅਦ ਇਸਨੂੰ ਸੁਪਰ ਓਵਰ ਵਿੱਚ ਖੇਡਿਆ ਗਿਆ। ਰੋਹਿਤ ਨੇ ਪਹਿਲੇ ਸੁਪਰ ਓਵਰ ਵਿੱਚ ਬੱਲੇਬਾਜ਼ੀ ਕਰਦੇ ਹੋਏ ਦੋ ਛੱਕੇ ਜੜੇ। ਰਵੀ ਬਿਸ਼ਨੋਈ ਨੇ ਦੂਜੇ ਓਵਰ ਵਿੱਚ 2 ਵਿਕਟਾਂ ਲੈ ਕੇ ਭਾਰਤ ਨੂੰ ਜਿੱਤ ਦਿਵਾਈ।
