ਨਵੀਂ ਦਿੱਲੀ,: ਦਿੱਲੀ ਯੂਨੀਵਰਸਿਟੀ ਦੀ ਵਿਦਿਆਰਥਣ ਗੁਰਮੇਹਰ ਕੌਰ ਨੇ ਏਬੀਵੀਪੀ ਦੇ ਵਿਰੁਧ ਸੋਸ਼ਲ ਮੀਡੀਆ ‘ਤੇ ਅਪਣੀ ਮੁਹਿੰਮ ਵਾਪਸ ਲੈ ਲਈ ਹੈ। ਅਜਿਹਾ ਕਿਹਾ ਜਾਂਦਾ ਹੈ ਕਿ ਗੁਰਮੇਹਰ ਨੇ ਆਰਐਸਐਸ ਪੱਖੀ ਸੰਗਠਨ ਵਲੋਂ ਕਥਿਤ ਤੌਰ ‘ਤੇ ਧਮਕੀਆਂ ਮਿਲਣ ਅਤੇ ਭਾਜਪਾ ਦੇ ਆਗੂਆਂ ਵਲੋਂ ਪਿੱਛਾ ਕੀਤੇ ਜਾਣ ‘ਤੇ ਇਹ ਮੁਹਿੰਮ ਵਾਪਸ ਲਈ ਹੈ।ਸ਼ਹੀਦ ਕੈਪਟਨ ਮਨਦੀਪ ਸਿੰਘ ਦੀ ਧੀ ਗੁਰਮੇਹਰ ਕੌਰ ਨੂੰ ਉਸ ਦੇ ਕਾਲੇਜ ਲੇਡੀ ਸ੍ਰੀ ਰਾਮ ਕਾਲੇਜ ਨੇ ਵੀ ਹਮਾਇਤ ਦਿਤੀ ਹੈ ਅਤੇ ਉਸ ਦੇ ਕਦਮ ਨੂੰ ਸਾਹਸਪੂਰਣ ਦਸਿਆ ਹੈ। ਗੁਰਮੇਹਰ ਨੇ ਟਵੀਟ ਕੀਤਾ, ”ਮੈਂ ਮੁਹਿੰਮ ਤੋਂ ਹਟ ਰਹੀ ਹਾਂ। ਸਾਰਿਆਂ ਨੂੰ ਮੁਬਾਰਕ। ਮੈਨੂੰ ਇਕੱਲਾ ਛੱਡ ਦੇਣ ਦੀ ਅਪੀਲ ਕਰਦੀ ਹਾਂ। ਮੈਂ ਜੋ ਕਹਿਣਾ ਸੀ, ਉਹ ਮੈਂ ਕਹਿ ਚੁੱਕੀ ਹਾਂ। ਇਕ ਚੀਜ਼ ਤੈਅ ਹੈ ਕਿ ਅਗਲੀ ਵਾਰ ਅਸੀਂ ਹਿੰਸਾ ਜਾਂ ਧਮਕੀਆਂ ਦਾ ਸਹਾਰਾ ਲੈਣ ਤੋਂ ਪਹਿਲਾਂ ਦੋ ਵਾਰ ਸੋਚਾਂਗੇ।”
ਗੁਰਮੇਹਰ ਕੌਰ ਨੇ ਕਿਹਾ ਕਿ ਉਸ ਨੂੰ ਬਹੁਤ ਕੁੱਝ ਝੱਲਣਾ ਪਿਆ ਅਤੇ ”20 ਸਾਲ ਦੀ ਉਮਰ ‘ਚ ਮੈਂ ਇੰਨਾ ਹੀ ਬਰਦਾਸ਼ਤ ਕਰ ਸਕਦੀ ਹਾਂ।” ਅਪਣੀ ਮੁਹਿੰਮ ਵਾਪਸ ਲੈਣ ਤੋਂ ਬਾਅਦ ਦਿੱਲੀ ਯੂਨੀਵਰਸਿਟੀ ਦੀ ਇਹ ਵਿਦਿਆਰਥਣ ਹੁਣ ਏਬੀਵੀਪੀ ਵਿਰੁਧ ਕਿਸੇ ਗਤੀਵਿਧੀ ‘ਚ ਹਿੱਸਾ ਨਹੀਂ ਲਵੇਗੀ।ਉਸ ਨੇ ਦਿੱਲੀ ਯੂਨੀਵਰਸਿਟੀ ‘ਚ ਵਿਦਿਆਰਥੀਆਂ ਦੇ ਇਕ ਧੜੇ ਵਲੋਂ ਕਰਵਾਏ ਇਕ ਮਾਰਚ ‘ਚ ਵੀ ਹਿੱਸਾ ਨਾ ਲਿਆ।