ਨਵੀਂ ਦਿੱਲੀ (ਮਨਪ੍ਰੀਤ ਸਿੰਘ ਖਾਲਸਾ) : ਜੈਕਾਰਾ ਲਹਿਰ ਦੇ ਕਾਰਜਕਾਰੀ ਡਾਇਰੈਕਟਰ ਨੈਨਦੀਪ ਸਿੰਘ ਨੇ ਪ੍ਰੈਸ ਨਾਲ ਮਿਲਣੀ ਵਿਚ ਕਿਹਾ ਕਿ ਫ਼ਰਿਜ਼ਨੋ ਵਿਚ ਸਿੱਖ ਇਤਿਹਾਸਲ ਦਾ ਨਵਾਂ ਅਧਿਆਏ ਲਿਖਿਆ ਗਿਆ ਹੈ, ਜਦੋ ਕੈਲੇਫ਼ੋਰਨੀਆ ਦੀ ਫ਼ਰਿਜ਼ਨੋ ਸਿਟੀ ਕੌਂਸਲ ਨੇ 1984 ਦੇ ਸਿੱਖ ਕਤਲੇਆਮ ਨੂੰ ਨਸਲਕੁਸ਼ੀ ਕਰਾਰ ਦੇ ਦਿੱਤਾ ਹੈ। ਉਨਾਂ ਕਿਹਾ ਕਿ ਹਿੰਦੁਸਤਾਨ ਵਰਗਾ ਮੁਲਕ ਇਸ ਤੋਂ ਮੁਨਕਰ ਹੈ ਕਿ 1984 ਵਿਚ ਦਿੱਲੀ ਅਤੇ ਹੋਰਨਾਂ ਸ਼ਹਿਰ ਵਿਚ ਸਿੱਖਾਂ ਦਾ ਕਤਲੇਆਮ ਅਤੇ ਉਨਾਂ ਦੀ ਅਰਬਾਂ ਖਰਬਾਂ ਦੀ ਜਾਇਦਾਦ ਲੁਟੀ ਅਤੇ ਸਾੜੀ ਗਈ ਸੀ।
ਮਿਲੀ ਜਾਣਕਾਰੀ ਅਨੁਸਾਰ ਕੌਂਸਲ ਮੈਂਬਰ ਕਲਿੰਟ ਓਲੀਵੀਅਰ ਵੱਲੋਂ ਪੇਸ਼ ਮਤੇ ‘ਤੇ ਵੋਟਿੰਗ ਦਾ ਨਤੀਜਾ ਜਾਣਨ ਲਈ ਸੈਕਰਾਮੈਂਟੋ ਸਮੇਤ ਆਲੇ-ਦੁਆਲੇ ਦੇ ਇਲਾਕਿਆਂ ਤੋਂ ਸੈਂਕੜੇ ਸਿੱਖ ਫ਼ਰਿਜ਼ਨੋ ਪੁੱਜੇ ਹੋਏ ਸਨ। ਸਿਟੀ ਕੌਂਸਲ ਦੇ ਚੈਂਬਰ ਵਿਚ ਸਿਰਫ਼ 250 ਲੋਕਾਂ ਦੇ ਬੈਠਣ ਦੀ ਸਮਰੱਥਾ ਹੋਣ ਕਾਰਨ ਜ਼ਿਆਦਾਤਰ ਲੋਕ ਬਾਹਰ ਖੜੇ ਹੋ ਕੇ ਨਤੀਜੇ ਦੀ ਉਡੀਕ ਕਰ ਰਹੇ ਸਨ। ਮੀਡੀਆ ਵਿਚ ਜਾਰੀ ਖਬਰ ਮੁਤਾਬਿਕ ਇਕ ਘੰਟਾ ਚੱਲੀ ਕਾਰਵਾਈ ਤੋਂ ਬਾਅਦ ਮਤਾ ਪਾਸ ਹੋਣ ਦਾ ਐਲਾਨ ਕੀਤਾ ਗਿਆ ਤਦ ਚੈਂਬਰ ਵਿਚ ਉਸ ਸਮੇਂ ‘ਬੋਲੇ ਸੋ ਨਿਹਾਲ- ਸਤਿ ਸ੍ਰੀ ਅਕਾਲ’ ਦੇ ਜੈਕਾਰੇ ਗੂੰਜ ਉਠੇ । ਕੌਂਸਲ ਦੇ ਪੰਜ ਮੈਂਬਰਾਂ ਨੇ ਮਤੇ ਤੇ ਹੱਕ ਵਿਚ ਵੋਟ ਪਾਈ ਜਦਕਿ ਦੋ ਮੈਂਬਰ ਵੋਟਿੰਗ ਤੋਂ ਦੂਰ ਰਹੇ। ਜੂਨ ਵਿਚ ਮਤੇ ਦਾ ਵਿਰੋਧ ਕਰਨ ਵਾਲੇ ਕੌਂਸਲ ਮੈਂਬਰ ਲੀ ਬਰੈਂਡ ਨੇ ਇਸ ਦਾ ਸਮਰਥਨ ਕੀਤਾ।