ਸਿੱਖ ਪ੍ਰਚਾਰਕ ਉੱਤੇ ਫਾਇਰਿੰਗ ਕਰਨ ਵਾਲੇ ਦੋ ਫੜੇ, ਪਰ ਭੱਜ ਨਿਕਲੇ
ਮਖੂ,- ਉਘੇ ਸਿੱਖ ਪ੍ਰਚਾਰਕ ਤੇ ਸੋਸ਼ਲ ਮੀਡੀਆ ‘ਤੇ ਚਰਚਿਤ ਹੋ ਚੁੱਕੇ ਗਿਆਨੀ ਹਰਪ੍ਰੀਤ ਸਿੰਘ ਮਖੂ ਉੱਤੇ ਮਖੂ ਤੋਂ ਜ਼ੀਰਾ ਰਾਹੀਂ ਲੁਧਿਆਣਾ ਜਾਂਦਿਆਂ ਪਿੰਡ ਬਹਿਕ ਗੁੱਜਰਾਂ ਲਾਗੇ ਕਾਰ ਸਵਾਰ ਹਮਲਾਵਰਾਂ ਨੇ ਕਾਰ ਰੋਕ ਕੇ ਜਾਨਲੇਵਾ ਹਮਲਾ ਕੀਤਾ। ਹਮਲਾਵਰ ਇੱਕ ਕਾਰ ‘ਤੇ ਸਵਾਰ ਹੋ ਕੇ ਆਏ ਸਨ।
ਮਿਲੀ ਜਾਣਕਾਰੀ ਮੁਤਾਬਕ ਹਮਲਾਵਰ ਕਾਰ ਵਿੱਚ ਸਵਾਰ ਹਮਲਾਵਰਾਂ ਨੇ ਗਿਆਨੀ ਹਰਪ੍ਰੀਤ ਸਿੰਘ ਮਖੂ ਦੀ ਕਾਰ ਦੇ ਅੱਗੇ ਆਪਣੀ ਕਾਰ ਲਾ ਲਈ ਤੇ ਫਿਰ ਕਾਰ ਦੀ ਡੋਰ ਕੋਲ ਤਾਬੜਤੋੜ ਇਕ ਤੋਂ ਬਾਅਦ ਇਕ ਕੁੱਲ ਛੇ ਫਾਇਰ ਕੀਤੇ। ਇਸੇ ਮੌਕੇ ਗਿਆਨੀ ਹਰਪ੍ਰੀਤ ਸਿੰਘ ਮਖੂ ਦੇ ਸਾਥੀਆਂ ਨੇ ਹਮਲੇ ਦੀ ਵੀਡੀਓਗ੍ਰਾਫੀ ਕਰ ਲਈ ਤੇ ਇਕ ਹਵਾਈ ਫਾਇਰ ਵੀ ਕੀਤਾ ਅਤੇ ਹਮਲਾਵਰਾਂ ਵਿੱਚੋਂ ਦੋ ਜਣਿਆਂ ਨੂੰ ਕਾਬੂ ਕਰ ਲਿਆ। ਇਸੇ ਦੌਰਾਨ ਨੇੜੇ ਤੇੜੇ ਦੇ ਲੋਕ ਇਕੱਠੇ ਹੋ ਗਏ ਤੇ ਸਥਿਤੀ ਸਾਂਭਣ ਲੱਗੇ, ਪਰ ਇਸ ਦੌਰਾਨ ਫੜੇ ਹੋਏ ਦੋ ਹਮਲਾਵਰ ਵੀ ਉਥੋਂ ਭੱਜ ਨਿਕਲੇ।
ਬਾਅਦ ਵਿੱਚ ਗਿਆਨੀ ਮਖੂ ਨੇ ਦੱਸਿਆ ਕਿ ਉਹ ਠੀਕ ਠਾਕ ਹਨ ਤੇ ਹਮਲੇ ਦੀ ਸੂਚਨਾ ਤੇ ਵੀਡੀਓ ਕਲਿਪ ਥਾਣਾ ਸਦਰ, ਜ਼ੀਰਾ ਨੂੰ ਦੇ ਦਿੱਤੀ ਹੈ। ਵਰਨਣ ਯੋਗ ਹੈ ਕਿ ਗਿਆਨੀ ਹਰਪ੍ਰੀਤ ਸਿੰਘ ਮਖੂ ਸੋਸ਼ਲ ਮੀਡੀਆ ਉੱਤੇ ਚਰਚਿਤ ਹੋਣ ਤੋਂ ਇਲਾਵਾ ਆਪਣੇ ਸਿਧਾਂਤ ਮੁਤਾਬਕ ਸਿੱਖ ਵਿਸ਼ਿਆਂ ਦਾ ਵਖਿਆਨ ਕਰਦੇ ਹਨ। ਇਕ ਚੈਨਲ ਉੱਤੇ ਲਗਾਤਾਰ ਉਨ੍ਹਾਂ ਦੇ ਵਖਿਆਨ ਤੇ ਬਹਿਸ ਸਬੰਧੀ ਪ੍ਰੋਗਰਾਮ ਵਗੈਰਾ ਵਿਖਾਏ ਜਾਂਦੇ ਹਨ।
