ਮਨੁੱਖੀ ਪੂੰਜੀ ਸੂਚਕ ਅੰਕ ਵਿਚ ਭਾਰਤ ਦਾ ਸਥਾਨ 105ਵਾਂ, ਫ਼ਿਨਲੈਂਡ ਸਿਖਰ ‘ਤੇ

ਤਿਆਂਜਿਨ (ਚੀਨ), 28 ਜੂਨ: ਭਾਰਤ ਵਿਸ਼ਵ ਆਰਥਕ ਮੰਚ (ਡਬਲਿਊਈਐਫ਼) ਦੇ ਤਾਜ਼ਾ ਮਾਨਵ ਪੂੰਜੀ ਸੂਚਕ ਅੰਕ ਵਿਚ 130 ਦੇਸ਼ਾਂ ਦੀ ਸੂਚੀ ‘ਚ 105ਵੇਂ ਸਥਾਨ ‘ਤੇ ਹੈ। ਇਸ ਸੂਚੀ ਵਿਚ ਫ਼ਿਨਲੈਂਡ ਪਹਿਲੇ ਸਥਾਨ ‘ਤੇ ਹੈ। ਇਹ ਸੂਚਕ ਅੰਕ ਇਸ ਗੱਲ ਦੇ ਸੰਕੇਤ ਹਨ ਕਿ ਕਿਹੜਾ ਦੇਸ਼ ਅਪਣੇ ਲੋਕਾਂ ਦੇ ਪਾਲਣ-ਪੋਸਣ, ਸਿਖਿਆ-ਸਿਖਲਾਈ ਅਤੇ ਵਿਕਾਸ ਅਤੇ ਪ੍ਰਤਿਭਾਵਾਂ ਦੀ ਵਰਤੋਂ ਵਿਚ ਕਿੰਨਾ ਅੱਗੇ ਹੈ।

ਜਨੇਵਾ ਦੇ ਗ਼ੈਰ-ਸਰਕਾਰੀ ਸੰਗਠਨ, ਕੌਮਾਂਤਰੀ ਆਰਥਕ ਮੰਚ ਨੇ ਇਥੇ ‘ਨਵੇਂ ਚੈਂਪੀਅਨ’ ਨਾਮ ਤੋਂ ਕਰਾਏ ਜਾਣ ਵਾਲੇ ਸਾਲਾਨਾ ਸੰਮੇਲਨ ਵਿਚ ਇਹ ਰੀਪੋਰਟ ਜਾਰੀ ਕੀਤੀ। ਤਿਆਂਜਿਨ ਸੰਮੇਲਨ ਨੂੰ ਦਾਵੋਸ ਸਿਖਰ ਬੈਠਕ ਕਿਹਾ ਜਾਂਦਾ ਹੈ। ਡਬਲਿਊਈਐਫ਼ ਦੀ ਇਸ ਬੈਠਕ ਵਿਚ ਚੀਨ 71ਵੇਂ ਸਥਾਨ ਅਤੇ ਪਾਕਿਸਤਾਨ 118ਵੇਂ ਸਥਾਨ ‘ਤੇ ਰਖਿਆ ਗਿਆ ਹੈ। ਬੰਗਾਲਾਦੇਸ਼, ਭੂਟਾਨ ਅਤੇ ਸ੍ਰੀਲੰਕਾ ਦਾ ਸਥਾਨ ਭਾਰਤ ਤੋਂ ਕਾਫ਼ੀ ਉਪਰ ਹੈ। ਮੰਚ ਨੇ ਭਾਰਤ ਨੂੰ 105ਵੇਂ ਸਥਾਨ ‘ਤੇ ਰਖਦਿਆਂ ਕਿਹਾ ਹੈ ਕਿ ਦੇਸ਼ ਅਪਣੀ ਮਾਨਵ ਪੂੰਜੀ ਦੀਆਂ ਸੰਭਾਵਨਾਵਾਂ ਦੀ ਸਿਰਫ਼ 57 ਫ਼ੀ ਸਦੀ ਹੀ ਵਰਤੋਂ ਕਰ ਰਿਹਾ ਹੈ। ਭਾਰਤ ਪਿਛਲੇ ਸਾਲ ਇਸ ਸੂਚਕ ਅੰਕ ਵਿਚ ਸ਼ਾਮਲ 124 ਦੇਸ਼ਾਂ ਵਿਚ 100ਵੇਂ ਸਥਾਨ ‘ਤੇ ਸੀ।