ਨਵੀਂ ਦਿੱਲੀ। ਭਾਰਤ ਲਈ 18 ਨਵੰਬਰ ਦਾ ਦਿਨ ਇਤਿਹਾਸ ਦੇ ਪੰਨਿਆਂ ‘ਚ ਸੁਨਹਿਰੀ ਅੱਖਰਾਂ ਵਿੱਚ ਲਿਖਿਆ ਜਾਵੇਗਾ। ਇਸ ਦਿਨ ਭਾਰਤ ਦਾ ਕੁੱਲ ਘਰੇਲੂ ਉਤਪਾਦ (Gross Domestic Product) ਪਹਿਲੀ ਵਾਰ 4 ਟ੍ਰਿਲੀਅਨ ਡਾਲਰ (ਕੁੱਲ 4,000,119,138,960) ਨੂੰ ਪਾਰ ਕਰ ਗਿਆ। ਇਸ ਨਾਲ ਅਸੀਂ ਦੁਨੀਆ ਦੀ ਪੰਜਵੀਂ ਸਭ ਤੋਂ ਵੱਡੀ ਅਰਥਵਿਵਸਥਾ ਬਣੇ ਹੋਏ ਹਾਂ।
ਅਮਰੀਕਾ 26,708,784,456,360 ਡਾਲਰ ਦੇ ਨਾਲ ਜੀਡੀਪੀ ਦੇ ਮਾਮਲੇ ਵਿੱਚ ਪਹਿਲੇ ਸਥਾਨ ‘ਤੇ ਬਣਿਆ ਹੋਇਆ ਹੈ। ਚੀਨ 19,240,000,114,470 ਡਾਲਰ ਨਾਲ ਦੂਜੇ ਸਥਾਨ ‘ਤੇ, ਜਾਪਾਨ 4,391,255,819,569 ਡਾਲਰ ਨਾਲ ਤੀਜੇ ਸਥਾਨ ‘ਤੇ ਤੇ ਜਰਮਨੀ 4,284,365,740,288 ਡਾਲਰ ਨਾਲ ਚੌਥੇ ਸਥਾਨ ‘ਤੇ ਹੈ।
ਵਿਕਾਸ ਦੀ ਰਫ਼ਤਾਰ ਨੂੰ ਦੇਖਦੇ ਹੋਏ ਅਰਥਸ਼ਾਸਤਰੀਆਂ ਦਾ ਅਨੁਮਾਨ ਹੈ ਕਿ ਭਾਰਤ ਅਗਲੇ ਚਾਰ ਸਾਲਾਂ ਵਿੱਚ ਯਾਨੀ 2027 ਤੱਕ ਦੁਨੀਆ ਦੀ ਤੀਜੀ ਸਭ ਤੋਂ ਵੱਡੀ ਅਰਥਵਿਵਸਥਾ ਬਣ ਜਾਵੇਗਾ ਤੇ ਆਉਣ ਵਾਲੇ ਦਹਾਕਿਆਂ ਵਿੱਚ, ਅਮਰੀਕਾ, ਚੀਨ ਤੇ ਭਾਰਤ ਦੁਨੀਆ ਦੀਆਂ ਤਿੰਨ ਸਭ ਤੋਂ ਵੱਡੀਆਂ ਅਰਥਵਿਵਸਥਾਵਾਂ ਹੋਣਗੇ।
ਜੀਡੀਪੀ ਕੀ ਹੈ
ਜੀਡੀਪੀ ਦਾ ਪੂਰਾ ਰੂਪ ਕੁੱਲ ਘਰੇਲੂ ਉਤਪਾਦ ਹੈ। ਇਹ ਇੱਕ ਦਿੱਤੀ ਮਿਆਦ ਦੇ ਦੌਰਾਨ ਕਿਸੇ ਦੇਸ਼ ਵਿੱਚ ਪੈਦਾ ਕੀਤੀਆਂ ਸਾਰੀਆਂ ਅੰਤਿਮ ਵਸਤਾਂ ਤੇ ਸੇਵਾਵਾਂ ਦਾ ਕੁੱਲ ਮੁਦਰਾ ਮੁੱਲ ਹੈ। ਆਮ ਤੌਰ ‘ਤੇ ਕਿਸੇ ਦੇਸ਼ ਦੀ ਜੀਡੀਪੀ ਨੂੰ ਮਾਪਣ ਲਈ ਇੱਕ ਸਾਲ ਦੀ ਮਿਆਦ ਵਰਤੀ ਜਾਂਦੀ ਹੈ।
ਜੀਡੀਪੀ ਇੱਕ ਦੇਸ਼ ਦੀ ਆਰਥਿਕ ਸਿਹਤ ਦਾ ਇੱਕ ਵਿਆਪਕ ਸਕੋਰਕਾਰਡ ਹੈ। ਇਹ ਕਿਸੇ ਦੇਸ਼ ਦੇ ਵਿਕਾਸ ਅਤੇ ਆਰਥਿਕ ਤਰੱਕੀ ਦੀ ਪਛਾਣ ਕਰਦਾ ਹੈ। ਜੀਡੀਪੀ ਵਿਕਾਸ ਦਰ ਕਿਸੇ ਦੇਸ਼ ਦੀ ਆਰਥਿਕ ਕਾਰਗੁਜ਼ਾਰੀ ਦਾ ਇੱਕ ਮਹੱਤਵਪੂਰਨ ਸੂਚਕ ਹੈ। GDP ਦੀ ਗਣਨਾ ਆਮ ਤੌਰ ‘ਤੇ ਦੇਸ਼ ਦੀ ਰਾਸ਼ਟਰੀ ਅੰਕੜਾ ਏਜੰਸੀ ਦੁਆਰਾ ਅੰਤਰਰਾਸ਼ਟਰੀ ਮਾਪਦੰਡਾਂ ਦੀ ਪਾਲਣਾ ਕਰਦੇ ਹੋਏ ਕੀਤੀ ਜਾਂਦੀ ਹੈ। GDP ਦੀ ਗਣਨਾ ਤਿੰਨ ਤਰੀਕਿਆਂ ਨਾਲ ਕੀਤੀ ਜਾਂਦੀ ਹੈ, ਖਰਚ, ਉਤਪਾਦਨ ਜਾਂ ਆਮਦਨ।
