ਭਾਰਤੀ ਖੁਫੀਆਂ ਏਜੰਸੀਆਂ ਦੇ ਕਾਰਕੁੰਨਾ ਦੇ ਕਾਰੇ

ਆਈਬੀ ਅਤੇ ਸੀਬੀਆਈ ਦੇ ਅਧਿਕਾਰੀਆਂ ਨੇ ਕੈਨੇਡੀਅਨ ਨੂੰ ਅਗਵਾ ਕਰਕੇ 10 ਕਰੋੜ ਦੀ ਮੰਗੀ ਫਿਰੌਤੀ

ਅੰਮ੍ਰਿਤਸਰ,: ਕੈਨੇਡਾ ਤੋਂ ਆਏ ਐਨਆਰਆਈ ਅਮਨਦੀਪ ਸਿੰਘ ਕੋਲੋਂ ਦਸ ਕਰੋੜ ਰੁਪਏ ਠੱਗਣ ਅਤੇ ਅਗਵਾ ਕਰਨ ਵਾਲੇ ਆਈਬੀ, ਸੀਬੀਆਈ ਦੇ ਮੁਲਾਜ਼ਮਾਂ ਨੂੰ ਰਿਮਾਂਡ ਖਤਮ ਹੋਣ ‘ਤੇ ਜੱਜ ਜੋਗਿੰਦਰ ਸਿੰਘ ਦੀ ਅਦਾਲਤ ਵਿਚ ਪੇਸ਼ ਕੀਤਾ ਗਿਆ। ਅਦਾਲਤ ਨੇ ਗ੍ਰਿਫ਼ਤਾਰ ਕੀਤੇ ਗਏ ਪੰਜ ਦੋਸ਼ੀਆਂ ਹੈਡ ਕਾਂਸਟੇਬਲ ਜਸਮਿੰਦਰ ਸਿੰਘ, ਸੀਬੀਆਈ ਕਾਂਸਟੇਬਲ ਮਨਜੀਤ ਸਿੰਘ, ਡੀਸੀ ਦਫ਼ਤਰ ਦੇ ਸੁਵਿਧਾ ਕੇਂਦਰ ਦੇ ਕਲਰਕ ਵਰੁਣ ਸਰੀਨ ਸਮੇਤ ਪਰਮਜੀਤ ਸਿੰਘ, ਮਨਮੋਹਨ ਸਿੰਘ ਨੂੰ 14 ਦਿਨ ਦੇ ਲਈ ਜੇਲ੍ਹ ਭੇਜ ਦਿੱਤਾ ਹੈ। ਹੁਣ ਪੰਜ ਸਤੰਬਰ ਨੂੰ ਮੁੜ ਦੋਸ਼ੀਆਂ ਦੀ ਪੇਸ਼ੀ ਹੋਵੇਗੀ। ਦੋਸ਼ੀਆਂ ਨੂੰ ਅਦਾਲਤ ਵਿਚ ਪੇਸ਼ ਕਰਦੇ ਸਮੇਂ ਪੁਲਿਸ ਵਲੋਂ ਰਿਮਾਂਡ ਦਿੱਤੇ ਜਾਣ ਦੀ ਮੰਗ ਨਹੀਂ ਕੀਤੀ ਗਈ। ਇਸ ਤੋਂ ਇਲਾਵਾ ਇਸ ਪੂਰੇ ਮਾਮਲੇ ਵਿਚ ਆਈਬੀ ਦਾ ਸਬ ਇੰਸਪੈਕਟਰ ਪਵਨ ਕੁਮਾਰ ਅਤੇ ਉਸ ਦਾ ਇਕ ਸਾਥੀ ਧਰਮਵੀਰ ਵੀ ਸ਼ਾਮਲ ਸੀ। ਇਹ ਦੋਵੇਂ ਹੀ ਅਜੇ ਫਰਾਰ ਹਨ।ਆਈਬੀ ਅਤੇ ਸੀਬੀਆਈ ਦੇ ਅਧਿਕਾਰੀਆਂ ਨੇ ਐਨਆਰਆਈ ਅਮਨਦੀਪ ਸਿੰਘ ਨੂੰ ਰਣਜੀਤ ਐਵਨਿਊ ਤੋਂ ਅਗਵਾ ਕੀਤਾ ਸੀ। ਦੋਸ਼ੀ ਜਾਣਦੇ ਸੀ ਕਿ ਅਮਨਦੀਪ ਦੇ ਕੋਲ ਬਹੁਤ ਪੈਸਾ ਹੈ। ਅਗਵਾਕਾਰ ਸਾਰੇ ਖੁਫ਼ੀਆ ਏਜੰਸੀਆਂ ਨਾਲ ਸਬੰਧ ਰਖਦੇ ਹਨ। ਅਮਨਦੀਪ ਨੂੰ ਅਗਵਾ ਕਰਦੇ ਸਮੇਂ ਉਸ ਦੇ ਭਰਾ ਪ੍ਰਦੀਪ ਸਿੰਘ ਨੇ ਦੇਖ ਲਿਆ ਅਤੇ ਤੁਰੰਤ ਪੁਲਿਸ ਨੂੰ ਸੂਚਿਤ ਕਰ ਦਿੱਤਾ ਸੀ।