ਸ੍ਰੀਨਗਰ,: ਹਿਜ਼ਬੁਲ ਅਤਿਵਾਦੀ ਬੁਰਹਾਨ ਵਾਨੀ ਦੀ ਮੌਤ ਤੋਂ ਬਾਅਦ ਸ਼ੁਰੂ ਹੋਏ ਵਿਰੋਧ ਪ੍ਰਦਰਸ਼ਨਾਂ ਨੂੰ ਵੇਖਦਿਆਂ ਕਸ਼ਮੀਰ ਦੇ ਕੁੱਝ ਹੋਰ ਇਲਾਕਿਆਂ ਵਿਚ ਕਰਫ਼ਿਊ ਲਗਾਇਆ ਗਿਆ ਹੈ। ਇਸ ਦੌਰਾਨ ਅੱਜ ਇਥੋਂ ਦੇ ਇਕ ਹਸਪਤਾਲ ਦੇ ਬਾਹਰ ਇਕ ਨੌਜਵਾਨ ਦੀ ਲਾਸ਼ ਮਿਲੀ ਜਿਸ ਦੇ ਸਰੀਰ ਵਿਚ ਛੱਰਿਆਂ ਦੇ ਨਿਸ਼ਾਨ ਸਨ। ਇਸ ਤੋਂ ਬਾਅਦ ਵਿਰੋਧ ਪ੍ਰਦਰਸ਼ਨ ਸ਼ੁਰੂ ਹੋ ਗਏ। ਇਕ ਪੁਲੀਸ ਅਧਿਕਾਰੀ ਨੇ ਦਸਿਆ ਕਿ ਰਿਆਜ਼ ਅਹਿਮਦ ਦੀ ਲਾਸ਼ ਐਸ.ਐਮ.ਐਚ.ਐਸ. ਹਸਪਤਾਲ ਦੇ ਬਾਹਰ ਮਿਲੀ। ਉਸ ਦੇ ਪੇਟ ਵਿਚ ਇਕ ਚੌੜਾ ਛੇਕ ਸੀ। ਉਨ੍ਹਾਂ ਕਿਹਾ ਕਿ ਪਹਿਲਾਂ ਇਹ ਸਾਫ਼ ਨਹੀਂ ਸੀ ਕਿ ਨੌਜਵਾਨ ਦੀ ਮੌਤ ਕਿਵੇਂ ਹੋਈ ਪਰ ਉਸ ਦੀ ਲਾਸ਼ ਦਾ ਐਕਸ-ਰੇ ਕਰਨ ‘ਤੇ ਅੰਦਰ ਛੱਰੇ ਮੌਜੂਦ ਹੋਣ ਦਾ ਪਤਾ ਚਲਿਆ। ਲਾਸ਼ ਦਾ ਪੋਸਟਮਾਰਟਮ ਕੀਤਾ ਗਿਆ ਹੈ ਪਰ ਰੀਪੋਰਟ ਆਉਣ ਵਿਚ ਕੁੱਝ ਦਿਨ ਲੱਗ ਜਾਣਗੇ। ਅਧਿਕਾਰੀ ਨੇ ਕਿਹਾ ਕਿ ਨੌਜਵਾਨ ਦੀ ਮੌਤ ਤੋਂ ਬਾਅਦ ਅੱਜ ਸਵੇਰੇ ਬੇਗਿਆਸ ਅਤੇ ਉਸ ਨਾਲ ਲਗਦੇ ਇਲਾਕਿਆਂ ਵਿਚ ਵਿਰੋਧ ਪ੍ਰਦਰਸ਼ਨ ਹੋਏ। ਕਲ ਹੋਏ ਹਿੰਸਕ ਵਿਰੋਧ ਪ੍ਰਦਰਸ਼ਨਾਂ ਕਾਰਨ ਕਾਨੂੰਨੀ-ਵਿਵਸਥਾ ਬਣਾਈ ਰੱਖਣ ਲਈ ਘਾਟੀ ਦੇ ਹੋਰ ਇਲਾਕਿਆਂ ਵਿਚ ਕਰਫ਼ਿਊ ਲਗਾ ਦਿਤਾ ਗਿਆ ਹੈ। ਕਲ ਪ੍ਰਦਰਸ਼ਨ ਦੌਰਾਨ ਪੁਲਵਾਮਾ ਜ਼ਿਲ੍ਹੇ ਦੇ ਲੇਥਪੋਰਾ ਇਲਾਕੇ ਵਿਚ ਇਕ ਨੌਜਵਾਨ ਦੀ ਮੌਤ ਹੋ ਗਈ ਸੀ ਅਤੇ ਕਈ ਹੋਰ ਜ਼ਖ਼ਮੀ ਹੋ ਗਏ।
ਉਨ੍ਹਾਂ ਕਿਹਾ ਕਿ ਪੁਰਾਣੇ ਸ਼ਹਿਰ ਦੇ ਪੰਜ ਥਾਣਾ ਖੇਤਰਾਂ ਵਿਚ ਕਰਫ਼ਿਊ ਜਾਰੀ ਰਿਹਾ ਜਦਕਿ ਬਟਮਾਲੂ, ਸ਼ਹੀਦਗੰਜ, ਸੌਰਾ, ਜਦਿਬਲ, ਕਮਰਬਾੜੀ ਅਤੇ ਬੇਮਿਨਾ ਇਲਾਕਿਆਂ ਵਿਚ ਵੀ ਕਰਫ਼ਿਊ ਲਗਾ ਦਿਤਾ ਗਿਆ ਹੈ। ਅਧਿਕਾਰੀ ਨੇ ਕਿਹਾ ਕਿ ਬਾਰਾਮੂਲਾ ਜ਼ਿਲ੍ਹੇ ਦੇ ਖਾਨਪੋਰਾ ਇਲਾਕੇ, ਪੁਲਵਾਮਾ ਜ਼ਿਲ੍ਹੇ ਦੇ ਅਵੰਤੀਪੋਰਾ ਅਤੇ ਪੰਪੋਰ ਵਿਚ ਵੀ ਕਰਫ਼ਿਊ ਲਗਾ ਦਿਤਾ ਗਿਆ ਹੈ, ਜਦਕਿ ਦਖਣੀ ਕਸ਼ਮੀਰ ਦੇ ਅਨੰਤਨਾਮ ਸ਼ਹਿਰ ਵਿਚ ਕਰਫ਼ਿਊ ਹੁਣ ਵੀ ਜਾਰੀ ਹੈ। ਵੱਖਵਾਦੀਆਂ ਦੀ ਹੜਤਾਲ ਅਤੇ ਪ੍ਰਸ਼ਾਸਨ ਵਲੋਂ ਲਗਾਈਆਂ ਗਈਆਂ ਪਾਬੰਦੀਆਂ ਕਾਰਨ ਵਾਦੀ ਵਿਚ ਲਗਾਤਾਰ 26ਵੇਂ ਦਿਨ ਵੀ ਜਨਜੀਵਨ ਪ੍ਰਭਾਵਤ ਰਿਹਾ। ਸਕੂਲ, ਕਾਲਜ, ਕਾਰੋਬਾਰੀ ਸੰਸਥਾ, ਬੈਂਕ ਅਤੇ ਨਿਜੀ ਦਫ਼ਤਰ ਬੰਦ ਰਹੇ ਜਦਕਿ ਸੜਕਾਂ ‘ਤੇ ਆਵਾਜਾਈ ਵਾਹਨ ਨਹੀਂ ਚੱਲ ਸਕੇ। ਪੂਰੀ ਘਾਟੀ ਵਿਚ ਮੋਬਾਈਲ ਇੰਟਰਨੈੱਟ ਸੇਵਾਵਾਂ ਬੰਦ ਰਹੀਆਂ ਜਦਕਿ ਸਾਰੇ ਨੈੱਟਵਰਕਾਂ ‘ਤੇ ਪੋਸਟਪੇਡ ਸੇਵਾ ਬਹਾਲ ਕਰ ਦਿਤੀ ਗਈ ਹੈ। ਵੱਖਵਾਦੀਆਂ ਨੇ ਹੜਤਾਲ ਨੂੰ ਪੰਜ ਅਗੱਸਤ ਤਕ ਵਧਾ ਦਿਤਾ ਹੈ ਅਤੇ ਸ਼ੁਕਰਵਾਰ ਨੂੰ ਹਜ਼ਰਤ ਬਲ ਤਕ ਰੈਲੀ ਦਾ ਸੱਦਾ ਦਿਤਾ ਗਿਆ ਹੈ।